អន្តរជាតិ
តួកគីព្រមឲ្យរុស្ស៊ីពង្រាយទ័ពនៅស៊ីរីភាគខាងជើងដេញពួកឃើដ ប្រធានាធិបតីរុស្ស៊ី វ្លាឌីមៀ ពូទីន (ស្តាំ) ចាប់ដៃជាមួយសមភាគីតួកគី អ៊ែរដូហ្គាន អំឡុងសន្និសីទព័ត៌មាន ក្រោយជំនួបក្នុងក្រុង សូឈី នៅថ្ងៃ២២ តុលា ២០១៩ (AFP)
× កងទ័ពរុស្ស៊ីនិងស៊ីរី នឹងត្រូវដាក់ពង្រាយក្នុងស៊ីរីភាគខាងជើង ប្រកៀកស្មាជាមួយតួកគី ក្នុងគោលដៅដេញសកម្មប្រយុទ្ធឃើដចេញពីតំបន់ព្រំដែន ដែលក្រុងអង់ការ៉ាចង់យកធ្វើជាតំបន់សុវត្ថិភាព។ ការយល់ព្រមនេះ ធ្វើឡើងក្រោមកិច្ចព្រមព្រៀងមួយចុះហត្ថលេខានៅថ្ងៃអង្គារ ២២ តុលា ដែលតួកគីនិងរុស្ស៊ីចាត់ទុកជាជោគជ័យដ៏ធំធេង។
ក្រោមកិច្ចព្រមព្រៀងដែលបានចុះហត្ថលេខារវាងប្រធានាធិបតីរុស្ស៊ី វ្លាឌីមៀ ពូទីន និងសមភាគីតួកគី រៃស៊ីប អ៊ែដូហ្កាន់ នៅរីសតសមុទ្រខ្មៅនៃទីក្រុង សូឈ៊ី (Sochi) ប្រទេសទាំងពីរ បញ្ជាក់ថា កងទ័ពរុស្ស៊ីនិងកងល្បាតព្រំដែនរបស់ស៊ីរី នឹងបើកប្រតិបត្តិបោសសម្អាតតំបន់៣០គីឡូម៉ែត្រដែលកាន់កាប់ដោយក្រុមសកម្មប្រយុទ្ធឃើដចាប់ពីថ្ងៃពុធ ២៣ តុលា តទៅ។ ៦ថ្ងៃក្រោយ កងទ័ពរុស្ស៊ីនិងតួកគីនឹងចាប់ផ្តើមធ្វើសកម្មភាពល្បាតក្នុងទឹកដីដែលក្រុងអង់ការ៉ាចង់បង្កើតជា «តំបន់សុវត្ថិភាព» ក្នុងតំបន់ភាគខាងជើងស៊ីរី ជាប់ព្រំដែនតួកគី។
ប៉ុន្មានម៉ោងក្រោយកិច្ចព្រមព្រៀងនេះ បានប្រកាសឡើង ក្រសួងការពារជាតិតួកគី បញ្ជាក់ឲ្យដឹងទៀតថា សហរដ្ឋអាមេរិកបានប្រាប់តួកគីថា សកម្មប្រយុទ្ធឃើដបានដកកម្លាំងចេញទាំងស្រុងពី «តំបន់សុវត្ថិភាព» តាមការចង់បានរបស់ក្រុងអង់ការ៉ា។ ក្នុងសេចក្តីថ្លែងការណ៍ ដែលដកស្រង់ចុះផ្សាយដោយទីភ្នាក់ងារព័ត៌មាន Reuters ក្រសួងការពារជាតិតួកគី សង្កត់ធ្ងន់ថា គ្មានឡើយការចាំបាច់នឹងផ្តួចផ្តើមប្រតិបត្តិដទៃទៀតនៅក្រៅតំបន់ប្រតិបត្តិបច្ចុប្បន្ននៅកាលៈទេសៈនេះ ហើយខ្លួនក៏បញ្ចប់ប្រតិបត្តិការយោធាភ្លាមៗដែលបានចាប់ផ្តើមកាលពីថ្ងៃ៩ តុលាមក ផងដែរ។
ពីទីក្រុងវ៉ាស៊ីនតោន អនុប្រធានាធិបតីអាមេរិក លោក មៃ ផេន បានបង្ហាញការគាំទ្រចំពោះការបង្កើត«តំបន់សុវត្ថិភាព» ដែលមានជម្រៅ៣០គីឡូម៉ែត្រក្នុងព្រំដែនស៊ីរីភាគខាងជើង និងលាតសន្ធឹង ៤៤០គីឡូម៉ែត្រ តាមបណ្តោយព្រំដែនតួកគី-ស៊ីរី។ លោក លើកឡើងបែបនេះ៖«នេះជាហេតុផលល្អដែលយើងផ្តល់ឱកាសឲ្យសហគមន៍អន្តរជាតិបង្កើតតំបន់សុវត្ថិភាពមួយរវាងតួកគីនិងប្រជាជនឃើដក្នុងប្រទេសស៊ីរី ដែលនឹងធានាបាននូវសន្តិភាពនិងសន្តិសុខ»។
សូមបញ្ជាក់ថា កិច្ចព្រមព្រៀងតួកគី-រុស្ស៊ី ធ្វើឡើងក្រោយបទឈប់បាញ់ដែលក្រុងអាង់ការ៉ាយល់ព្រម ក្រោមការសម្របសម្រួលរបស់អាមេរិក អស់សុពលភាពនៅថ្ងៃអង្គារ ២២ តុលា។ វាក៏បញ្ជាក់ពីការផ្លាស់ប្តូរដ៏ធំមួយផងដែរក្នុងប្រទេសស៊ីរី គិតចាប់ពីក្រុងវ៉ាស៊ីនតោន បានប្រកាសដកទ័ពអាមេរិកកាលពីពីរសប្តាហ៍មុន នៅមុនពេលការបើកការវាយប្រហារពីសំណាក់យោធាតួកគីលើក្រុមឃើដ។
អង្គការឃ្លាំមើលស៊ីរីទទួលបន្ទុកសិទ្ធិមនុស្ស ដែលមានមូលដ្ឋាននៅចក្រភពអង់គ្លេស ប្រជាជនស្លូតត្រង់ជាង៣០ម៉ឺននាក់ បានភៀសខ្លួនចេញពីផ្ទះសំបែង គិតចាប់ពីតួកគីបានចាប់ផ្តើមវាយប្រហារទៅក្នុងទឹកដីស៊ីរីភាគខាងជើងមក។ អង្គការនេះ បានហៅប្រតិបត្តិការយោធានេះជាការបង្កចលាចលធំបំផុតមួយ ចាប់តាំងពីសង្គ្រាមស៊ីវិលបានផ្ទុះឡើងក្នុងឆ្នាំ២០១១មក។ ម្យ៉ាងវិញទៀត ខ្លួន ក៏បានបញ្ជាក់ឲ្យដឹងទៀតថា មនុស្ស៥០០នាក់ បានបាត់បង់ជីវិត ដែលក្នុងនោះក៏មានជនស៊ីវិលផងដែរ ហើយភាគច្រើន គឺសុទ្ធសឹងជាពួកឃើដ៕
Tag:
សហរដ្ឋអាមេរិក
តួកគី
ស៊ីរី
ឃើដ
© រក្សាសិទ្ធិដោយ thmeythmey.com