អាជ្ញាធរប្រគល់ឈើឱ្យព្រះសង្ឃវត្តអធ្ធាវិញ ក្រោយរឹបអូសទៅទុកមួយសប្ដាហ៍

ជាតិ

អាជ្ញាធរប្រគល់ឈើឱ្យព្រះសង្ឃវត្តអធ្ធាវិញ ក្រោយរឹបអូសទៅទុកមួយសប្ដាហ៍

24, Oct 2019 , 3:34 pm

រូបភាព

រូបភាព៖ មន្ទីរកសិកម្ម រុក្ខាប្រមាញ់ និងនេសាទខេត្តសៀមរាប

ដោយ: អុីសា រ៉ហានី (Isa Rohany)

សៀមរាប៖ ទីបំផុតទៅ ករណីរឿងព្រះសង្ឃវត្តអធ្ធាលួចកាប់ឈើក្នុងបរិវេណវត្ត បានបិទបញ្ចប់ហើយ។ អាជ្ញាធរបានប្រគល់ឈើដែលរឹបអូសទាំងកណ្ដាលយប់កើតហេតុ ឱ្យព្រះសង្ឃវិញ ដោយទុកឈើទាំងនោះជាការប្រគេនដល់វត្តស្របពេលមានតម្រូវការសាងសង់កុដិស្រាប់។

ក្នុងសេចក្ដីប្រកាសព័ត៌មានរបស់មន្ទីរកសិកម្ម រុក្ខាប្រមាញ់ និងនេសាទ នាថ្ងៃទី២២ តុលា បានសរសេរយ៉ាងដូច្នេះថា «... ដោយមានស្នើសុំបិណ្ឌបាតពីព្រះសង្ឃនិងគណៈកម្មការអាចារ្យវត្ត សមត្ថកិច្ចបានសម្រេចប្រគេនឈើទៅព្រះសង្ឃវិញ និងបានចូលរួមបច្ច័យសាងសង់កុដិចំនួនមួយលានរៀល»។

អាជ្ញាធរបំភ្លឺករណីរឹបអូសទៅរក្សាទុកនៅយប់ថ្ងៃទី១៥ តុលាកន្លងមកថា ដោយសារមានការរាយការណ៍ពីករណីកាប់ឈើនៅយប់ម៉ោងជាង១០ កម្លាំងចម្រុះមាន កម្លាំងនគរបាលប្រឆាំងបទល្មើសសេដ្ឋកិច្ច សហការជាមួយខណ្ឌរដ្ឋបាលព្រៃឈើសៀមរាប និងអាជ្ញាធរពាក់ព័ន្ធ បានចុះពិនិត្យនិងប្រទះឃើញ មានឈើទាលអាររួច៤៦សន្លឹក និងឈើមូល២កំណាត់។ ក្នុងលិខិតដដែលបានបញ្ជាក់ថា ដោយពេលវេលាយប់ជ្រៅ ហើយទីតាំងកើតហេតុនៅក្រៅបរិវេណវត្ត សមត្ថកិច្ចសម្រេចដឹកឈើទាំងនោះទៅរក្សាទុកបណ្ដោះអាសន្ននៅផ្នែកខណ្ឌរដ្ឋបាលព្រៃឈើបន្ទាយស្រី ស្ថិតនៅភូមិព្រះដាក់ ឃុំព្រះដាក់ ស្រុកបន្ទាយស្រី។

ក្រោយមកអាជ្ញាធរបានចុះមកស្រាវជ្រាវ និងបានរកឃើញថា ពិតជាមានការលួចកាប់ឈើខុសច្បាប់ក្នុងវត្តអធ្ធាពិតប្រាកដមែន តែការបំភ្លឺរបស់ព្រះសង្ឃព្រះនាម ភ្លឿន រ័ត្ន គ្រូសូត្រស្ដាំវត្តអធ្ធាមានសង្ឃដីកាថា ការកាប់នេះដោយសារដើមឈើនោះត្រូវរន្ទះបាញ់ ចាប់ផ្តើមងាប់ និងមានមែកឈើធ្លាក់មកលើដី ដែលការណ៍នេះអាចបង្កគ្រោះថ្នាក់ជាយថាហេតុ ទើបគណៈកម្មការវត្តសម្រេចកាប់ តែពុំបានជូនដំណឹងដល់អាជ្ញាធរ៕