វិសាខាត្រូវការឈ្នះណាហ្គាវើល ដើម្បីបានលេខ២ ខណៈអង្គរថាយហ្គឺរសងសឹកភ្នំពេញក្រោន

កីឡាជាតិ

ជាតិ

វិសាខាត្រូវការឈ្នះណាហ្គាវើល ដើម្បីបានលេខ២ ខណៈអង្គរថាយហ្គឺរសងសឹកភ្នំពេញក្រោន

26, Oct 2019 , 11:59 am

រូបភាព

ដោយ:

ការប្រកួតបាល់ទាត់ក្របខណ្ឌមិត្តហ្វូនខេមបូឌានលីគបានឈានដល់សប្តាហ៍ទី២៥ ដោយនៅថ្ងៃសៅរ៍ ទី២៦ ខែតុលា នេះ មានការប្រកួតចំនួន៣គូ ដែលរៀបចំនៅទីលានផ្សេងៗគ្នា។ វិសាខាត្រូវបើកទ្វារកីឡដ្ឋានខ្លួនទទួលភ្ញៀវណាហ្គាវើលនៅម៉ោង៦ល្ងាច ខណៈក្រសួងការពារជាតិប៉ះអគ្គិសនីកម្ពុជានៅកីឡដ្ឋានស្តាតចាស់ ក្រោយអង្គរថាយហ្គឺរ ស្វាគមន៍ភ្នំពេញក្រោននៅម៉ោង៣:៣០នាទីរសៀលនៅកីឡដ្ឋានខេត្តសៀមរាប។

វិសាខាត្រូវការឈ្នះណាហ្គាវើលនៅថ្ងៃនេះ ដើម្បីគ្រងតំណែងជើងឯករងពានរង្វាន់ក្របខណ្ឌមិត្តហ្វូនខេមបូឌានលីគរដូវកាលឆ្នាំ២០១៩ ដែលមានព្រះខ័នរាជស្វាយរៀងជាម្ចាស់ជើងឯក។ ការជួបគ្នារវាងក្រុមទាំងពីរ នឹងក្លាយជាជំនួបដ៏ជក់ចិត្ត និងតានតឹងបំផុត ដ្បិតណាហ្គាវើល ក៏ត្រូវការជ័យជម្នះដើម្បីឡើងឈរលេខ២បណ្តោះអាសន្ន ក៏ដូចជាសងសឹកវិសាខា ដែលបានធ្វើឲ្យពួកគេរងការខកចិត្តជាមួយលទ្ធផល ៣-២ នៅជើងទី១លើទឹកដីខ្លួនផងដែរ។

បច្ចុប្បន្នវិសាខាស្ថិតនៅលេខរៀងទី២មាន៥៤ពិន្ទុ ខណៈណាហ្គាវើលស្ថិតនៅលេខរៀងទី៣មាន៥១ពិន្ទុ។ បើសិនវិសាខាទទួលបានជ័យជម្នះ ឬស្មើនៅថ្ងៃនេះ នោះពួកគេនឹងក្លាយជាជើងឯករងនៅរដូវនេះតែម្តង ទោះបីពួកគេនៅសល់ការប្រកួតមួយទៀតក៏ដោយ។ ប៉ុន្តែបើជ័យជម្នះធ្លាក់ទៅលើណាហ្គាវើល នោះតំណែងជើងឯករងត្រូវរងចាំជំនួបកាត់សេចក្តីនៅសប្តាហ៍ទី២៦ ដោយវិសាខាប៉ះជាមួយអគ្គស្នងការដ្ឋាននគរបាលជាតិ រីឯណាហ្គាវើលត្រូវតតាំងជាមួយព្រះខ័នរាជស្វាយរៀង។

នៅម៉ោង៦ល្ងាចថ្ងៃសៅរ៍នេះដែរ កីឡដ្ឋានស្តាតចាស់ នឹងក្លាយជាទីតាំងកាត់សេចក្តីជំនួបរវាងក្រសួងការពារជាតិជាមួយអគ្គិសនីកម្ពុជា។ នេះគ្រាប់តែជាជំនួបបង្គ្រប់កិច្ចតែប៉ុណ្ណោះ ដ្បិតក្រុមទាំងពីរសុទ្ធតែអស់ឱកាសក្នុងការប្រជែងដណ្តើមសូម្បីតែលេខ៣។ តែវាជាឱកាសសងសឹកសម្រាប់អគ្គិសនី បន្ទាប់ពីពួកគេបានចាញ់ក្រសួងការពារជាតិ ៣-០ នៅជើងទី១។ បច្ចុប្បន្នក្រសួងការពារជាតិនៅលេខរៀងទី៧មាន៣៥ពិន្ទុ ខណៈអគ្គិសនីកម្ពុជាស្ថិតនៅលេខ១២ មាន១៦ពិន្ទុ។

អង្គរថាយហ្គឺរត្រូវបើកទ្វារកីឡដ្ឋានខេត្តសៀមរាបទទួលភ្ញៀវភ្នំពេញក្រោននៅម៉ោង៣:៣០នាទីរសៀល។ នេះក៏ជាជំនួបដ៏ជក់ចិត្តមួយផងដែរ ដ្បិតអង្គរថាយត្រូវការឈ្នះ ដើម្បីជម្រះបញ្ជីចាស់ជាមួយភ្នំពេញក្រោន ដែលធ្វើឲ្យពួកគេរងការខកចិត្តក្នុងលទ្ធផល ១-០ នៅជើងទី១ នាជំនួបក្រៅដី។ ក្រុមមានមូលដ្ឋាននៅខេត្តសៀមរាបមួយនេះ ក៏ត្រូវការជ័យជម្នះដើម្បីឡើងឈរលេខរៀងទី៤បណ្តោះអាសន្នផងដែរ។ បច្ចុប្បន្នពួកគេស្ថិតនៅលេខរៀងទី៥មាន៤៥ពិន្ទុ ខណៈភ្នំពេញក្រោនឈរលេខ៦មាន៤១ពិន្ទុ៕