ជាតិ
សង្គមជាតិ
សាច់ជ្រូកខូចគុណភាពជាងមួយតោន ត្រូវបានគយចល័តខេត្តសៀមរាបកម្ទេចចោល រូបភាពមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប
× សៀមរាប៖ គម្លាំងគយចល័តខេត្តសៀមរាប សហការជាមួយការិយាល័យបង្ការ និងបង្ក្រាបអំពើរត់ពន្ធតំបន់៥ និងការិយាល័យប្រឆាំងបទល្មើសសេដ្ឋកិច្ច បានឃាត់រថយន្តមួយគ្រឿងដឹកសាច់ជ្រូកខូចគុណភាព ដែលមានទម្ងន់ជាងមួយតោន។ ហេតុការណ៍បានធ្វើឡើងនៅរសៀលថ្ងៃទី២៤ តុលា នៅកំណាត់ផ្លូវជាតិលេខ៦ ក្នុងភូមិដូនទ្រ ឃុំល្វា ស្រុកពួក ខេត្តសៀមរាប។
ផលិតផលសាច់ជ្រូក ដែលរួមមាន ក្រពះ ជើង ត្រចៀក កន្ទុយ ពោះវៀនធំ អណ្ដាត ខួរ ឆ្អឹងក ឆ្អឹងជំនី.ល. ត្រូវបានឈ្មួញវេចខ្ចប់ដាក់ក្នុងកេសសរុប ២១កេស ដែលមានទម្ងន់សរុប ១,៣៣០គីឡូក្រាម ចេញពីប្រទេសថៃ កាត់តាមច្រកប៉ោយប៉ែត ក្នុងគោលដៅទៅរាជធានីភ្នំពេញ តែត្រូវកម្លាំងជំនាញចាប់បាន។ ក្រោយឃាត់និងពិនិត្យឃើញថាខូចគុណភាព អាជ្ញាធរបានធ្វើការកម្ទេចចោលហើយនៅរសៀលថ្ងៃទី២៥ តុលា នៅស្ថានីយ៍កសិកម្មទឹកវិល ក្រុងសៀមរាប។
កម្លាំងជំនាញកំពុងធ្វើការសាកសួរម្ចាស់រថយន្តសាំយ៉ុងឈ្មោះ ឆុង ចាន់ដា ដើម្បីរកប្រភពនិងធ្វើការផាកពិន័យឬផ្តន្ទាទោសតាមផ្លូវច្បាប់៕
Tag:
គយ
សាច់ជ្រូក
ខូចគុណភាព
© រក្សាសិទ្ធិដោយ thmeythmey.com