ជាតិ
សង្គមជាតិ
×![]()
សៀមរាប៖ ក្រុមចោរមកពីតំបន់ឆ្ងាយ បានចូលលួចក្របីរបស់អ្នកភូមិបុស្សធំ ឃុំអំពិល ស្រុកប្រាសាទបាគង អស់ជាច្រើនក្បាល។ លោកយាយ ឈឿន ម៉ៃ ម្នាក់ក្នុងចំណោមអ្នកភូមិឯទៀតដែលបាត់ក្របី បានរៀបរាប់ថា ការបាត់ក្របីនេះធ្វើឱ្យលោកយាយបាត់បង់ចំណូលប្រចាំឆ្នាំ ដែលធ្លាប់លក់សម្រាប់ដោះទាល់ជីវភាព។ សព្វថ្ងៃ ក្របីដែលបាត់នោះ នៅសល់ត្រឹមរូបថតតែប៉ុណ្ណោះ។
ការនឹករឭកដល់ក្របីមេទាំង៦ក្បាល បានកើតឡើងសាជាថ្មី បន្ទាប់ពីផ្ទាំងរូបថតសត្វក្របី អមដោយចៅៗ២នាក់កំពុងដឹកចេញពីស្រែ ដែលត្រូវបានជាងថតមួយរូប ផ្តិតបានកាលពីជិត២ឆ្នាំមុន។ លោកយាយ ម៉ៃ បានផ្ចិតផ្ចង់ទៅនឹងរូបភាពនោះយ៉ាងយកចិត្តទុកដាក់ និងដោយអារម្មណ៍នឹងរឭកក្របីជាខ្លាំង។ ការឃ្លាតឆ្ងាយនៅពេលនេះ មិនមែនដោយសារការលក់ដូរទេ តែត្រូវក្រុមចោរមួយក្រុមចូលលួចកាលពីដើមខែ កក្កដា កន្លងទៅ ដែលធ្វើឱ្យលោកយាយ ម៉ៃ សោកសៅជាខ្លាំង។
លោកយាយ ម៉ៃ ពោលថា៖« ពេលបាត់មានអារម្មណ៍ស្ដាយ កើតជាឈឺ គិតអត់ឃើញទេ វាអស់ច្រើនពេក»។ លោកយាយបន្តថា យប់ថ្ងៃកើតហេតុខ្លួនបានគេងនៅលើគ្រែក្រោមផ្ទះ និងបានក្រោកមើលជាប្រចាំដោយគ្មានសកម្មភាពអ្វីសោះ លុះដល់ម៉ោង៣ក្រោយពេលលោកយាយឆ្លៀតគេងមួយភ្លែត ក៏បាត់ក្របីទាំង១០ក្បាលតែម្ដង។ ភ្លាមៗ គ្រួសារលោកយាយ ម៉ៃ បានរាយការណ៍ដល់អាជ្ញាធរមូលដ្ឋាន និងបានចុះរកទាំងយប់ ក៏ប្រទះឃើញក្របី៤ក្បាល ដែលរួចពីការឃ្វៀលរបស់ចោរមកវិញ។ យ៉ាងណា ក្របីដែលមកវិញ ជាក្របីកូនៗ ឯ៦ក្បាលដែលបាត់ សុទ្ធតែមេធំៗ។
«វាខាតបង់ច្រើន ដូចជា ធ្លាប់មានចិញ្ចឹមទៅ ម៉ាឆ្នាំខ្ញុំលក់បាន១ឬ២ ខ្ញុំចេះតែចិញ្ចឹមចៅ ចិញ្ចឹមកូនវាទៀត ដល់ពេលវាបាត់អស់ចឹងទៅ ក៏មានអ៊ីហ្នឹងចិញ្ចឹមទៀត។ បើខ្ញុំលក់ មួយក្បាលអាចបាន៩០០ទៅ១០០០ដុល្លារ»។ នេះបើតាមការបញ្ជាក់របស់លោកយាយ ម៉ៃ។
អភិបាលស្រុកប្រាសាទបាគង លោក សូរ ប្លាតុង ប្រាប់ថា ពិតជាមានករណីបាត់គោក្របីក្នុងភូមិសាស្ដ្រខាងលើមែន ប៉ុន្តែជនល្មើសត្រូវចាប់បានហើយកន្លងទៅប្រមាណ២ខែមកនេះ ហើយក៏លែងមានករណីនេះទៀតដែរ។ លោកអភិបាលស្រុកមិនបានបញ្ជាក់ពីចំនួនគោក្របីដែលបានបាត់ក្នុងភូមិសាស្ដ្រលោកទេ តែថាមានច្រើនក្បាលនិងច្រើនករណីដែរ។ តាមចម្លើយសារភាពរបស់ជនសង្ស័យ ដែលបានចាប់បានក្នុងក្រុងសៀមរាប មេខ្លោងក្នុងករណីនេះគឺឈ្មួញរកស៊ីគោនៅខេត្តពោធិ៍សាត់។
តាមការលើកឡើងរបស់លោកយាយ ម៉ៃ មុននោះប្រមាណថ្ងៃ ផ្ទះប្អូនលោកយាយដែលនៅក្បែរនោះ ក៏បានបាត់ក្របី៣ក្បាល និងផ្ទះប្អូនថ្លៃដែលនៅភូមិជិតគ្នានោះ ធ្លាប់បាត់៥ក្បាលផងដែរ។ អាជ្ញាធរមូលដ្ឋានប្រាប់លោកយាយ ម៉ៃថា ឱ្យចេះថែរក្សាទ្រព្យសម្បត្តិដោយខ្លួនឯង ព្រោះថាកម្លាំងមិនអាចចុះការពារតាមផ្ទះអស់បានទេ៕
Tag:
ភូមិបុស្សធំ
ក្របី
ឈឿន ម៉ៃ
© រក្សាសិទ្ធិដោយ thmeythmey.com
