ជាតិ
សង្គមជាតិ
អូឌីស៊ី រៀបចំវគ្គបណ្តុះបណ្តាលស្តីពី«អក្ខរកម្មទិន្នន័យ»ដើម្បីចូលរួមបង្កើនប្រសិទ្ធភាពនៃការបើកចំហព័ត៌មាន
រូបភាព៖ ពីអង្គការទិន្នន័យអំពីការអភិវឌ្ឍន៍
×![]()
ដោយ: ថ្មីៗ
អង្គការទិន្នន័យអំពីការអភិវឌ្ឍ ហៅកាត់ថា អូឌីស៊ី បានរៀបចំកម្មវិធីបណ្តុះបណ្តាលមួយស្តីពី«អក្ខរកម្មទិន្នន័យ» ដល់សិក្ខាកាមជាង៣០នាក់ មកពីស្ថាប័នផ្សេងៗគ្នា រួមមានមន្ត្រីសង្គមស៊ីវិលជាតិ និងអន្តរជាតិ, អ្នកស្រាវជ្រាវ, អ្នកសារព័ត៌មាន និងបុគ្គលិកក្រុមហ៊ុនឯកជន និងអ្នកធ្វើការឯករាជ្យជាដើម។ 
លោក គុណ ចិន្តា ប្រធានកម្មវិធី និងមាតិកា នៃអង្គការទិន្នន័យអំពីការអភិវឌ្ឍ បានលើកឡើងថា វគ្គបណ្តុះបណ្តាលមានគោលបំណងឲ្យអ្នកចូលរួម ដែលជាអ្នកសារព័ត៌មាន អ្នកស្រាវជ្រាវ និងមន្ត្រីអង្គការសង្គមស៊ីវិលជាដើមនោះ ចេះប្រើប្រាស់ទិន្នន័យ ក្នុងការរាយការណ៍ព័ត៌មានរបស់គាត់ឲ្យកាន់តែស៊ីជម្រៅ និងឲ្យពួកគាត់ចេះប្រើប្រាស់ទិន្នន័យដើម្បីប្រាប់ទៅសាធារណជនថា រឿងរ៉ាវទាំងឡាយនៅក្នុងសង្គម គឺកើតចេញដោយមានភស្តុតាងច្បាស់លាស់ ហើយវាជាទណ្ហីករណ៍ឲ្យពលរដ្ឋ សម្រេចចិត្តប្រកបដោយតម្លាភាព។
រូបភាព៖ ពីអង្គការទិន្នន័យអំពីការអភិវឌ្ឍន៍
លោក គុណ ចិន្តា បន្ថែម៖«ពួកគាត់ ពិសេសអ្នកសារព័ត៌មាន គាត់មានមធ្យោបាយផ្សព្វផ្សាយរបស់គាត់។ អ៊ីចឹងយើងសង្ឃឹមថាគាត់នាំរឿងរ៉ាវដែលកើតឡើងក្នុងសង្គម ទៅដល់អ្នកដែលគ្មានលទ្ធភាពទទួលបានព័ត៌មាន។ មួយទៀតវគ្គបណ្តុះបណ្តាលនេះក៏ផ្តោតលើអ្នកសិក្សាស្រាវជ្រាវ និងអ្នកតាក់តែងគោលនយោបាយដែរ ព្រោះគាត់ជាបុគ្គលកសំខាន់ក្នុងការផ្តល់មតិយោបល់ ផ្តល់ជាសូចនាករ និងផ្តល់ជាព័ត៌មាន ទៅក្នុងការសិក្សាស្រាវជ្រាវរបស់គាត់ដែលវាមានឥទ្ធិពលដល់ការតាក់តែងគោលនយោបាយ»។
រូបភាព៖ ពីអង្គការទិន្នន័យអំពីការអភិវឌ្ឍន៍
សូមជម្រាបថា កម្មវិធីបណ្តុះបណ្តាលនេះ ត្រូវធ្វើឡើង៤ វគ្គផ្សេងគ្នា ដោយវគ្គទី១ ត្រូវបានធ្វើឡើងរយៈពេល៥ថ្ងៃ ពីថ្ងៃទី២១ ដល់ថ្ងៃទី២៥ ខែតុលា នៅរាជធានីភ្នំពេញ ផ្តោតលើប្រធានបទ«ភស្តុតាងទៅជាអត្ថបទ និងការស្វែងរកទិន្នន័យ និងទម្រង់ទិន្នន័យ»។ ចំណែកវគ្គទី២ នឹងត្រូវរៀបចំឡើងពីថ្ងៃទី ២ ដល់៦ធ្នូ ឆ្នាំ២០១៩ ដោយផ្តោតលើ«ការយល់ពីទិន្នន័យ និងការបង្ហាញទិន្នន័យជារូបភាព»។ ហើយវគ្គទី៣ នឹងត្រូវធ្វើឡើងនៅ ថ្ងៃទី១៣ ដល់ ទី១៧ ខែមករា ឆ្នាំ២០២០ ផ្តោតលើប្រធានបទ«ការគិតដូចជាអ្នកសារព័ត៌មានទិន្នន័យ»។ រីឯវគ្គទី៤ នឹងប្រព្រឹត្តទៅ នៅថ្ងៃទី៧ ខែមេសា ឆ្នាំ២០២។ អង្គការទិន្នន័យអំពីការអភិវឌ្ឍ រំពឹងថា សិក្ខាកាមដែលចូលរួម នឹងប្រើប្រាស់ចំណេះដឹងដែលទទួលបានពីវគ្គបណ្តុះបណ្តាល ទៅអនុវត្តផ្ទាល់ទៅក្នុងគម្រោងរបស់ពួកគេ ដើម្បីចូលរួមចំណែកឲ្យកាន់តែមានប្រសិទ្ធភាពនៃការបើកចំហព័ត៌មាន ទៅកាន់សាធារណជន៕
រូបភាព៖ ពីអង្គការទិន្នន័យអំពីការអភិវឌ្ឍន៍
© រក្សាសិទ្ធិដោយ thmeythmey.com
