វិទ្យាសាស្រ្ត និង បច្ចេកវិទ្យា
អន្តរជាតិ
ផ្កាថ្មសមុទ្រមានសារសំខាន់ ប៉ុន្តែកំពុងរងការបំផ្លិចបំផ្លាញពីសំណាក់មនុស្ស
×![]()
ដោយ: គី ចំណា
ក្រៅពីតំបន់ទេសចរណ៍ដ៏មានសម្រស់ស្រស់ស្អាតនៅតាមឆ្នេរល្បីនានាជុំវិញពិភពលោក តំបន់ផ្កាថ្ម ឬជាភាសាអង់គ្លេសហៅថា«Coral Reef»មាននាទីសំខាន់មិនអាចខ្វះបាននៅក្នុងប្រព័ន្ធអេកូឡូស៊ី។ ប៉ុន្តែផ្កាថ្មនេះកំពុងស្ថិតក្រោមការបំផ្លិចបំផ្លាញ។ 
គេហទំព័រអង្គការក្រៅរដ្ឋាភិបាលមួយដែលមានឈ្មោះថា Reef Relief ពន្យល់ថា តំបន់ផ្កាថ្មមានមុខងារក្នុងការទប់ស្កាត់ការបោកបក់ខ្លាំងពីរលកសមុទ្រ ការពារតំបន់ព្រៃលិចទឹក រុក្ខជាតិនៅបាតសមុទ្ររាក់នានាៗ និងជាពិសេសឆ្នេរសមុទ្រដែលជាទីក្រុងមានមនុស្សរស់នៅច្រើនម៉ឺន ច្រើនសែននាក់។
ដោយដើរតួរជាអ្នកការពារលំហសមុទ្រ តំបន់ផ្កាថ្មក៏ជាអ្នកការពារសង្វាក់នៃបណ្តាញអាហារផងដែរ។ តាំងពីពពួកត្រី ស្លែ សិប្បីសត្វ (ដូចជាមឹក) និងគ្រូស្តាសេ (ពពួកក្តាម បង្កង់) រហូតដល់សត្វធំៗជាច្រើនទៀតដែលហៅតំបន់ផ្កាថ្មនេះជាផ្ទះរបស់ពួកគេ។ សត្វទាំងឡាយនេះសុទ្ធតែមានមុខងារសំខាន់ៗរៀងៗខ្លួននៅក្នុងបណ្តាញអាហារ ក្នុងការគ្រប់គ្រងចំនួននៃពូជសត្វនីមួយៗឲ្យនៅមានតុល្យភាពល្អ។ តំបន់ផ្កាថ្មក៏ជួយចម្រោះទឹកសមុទ្រផងដែរ។
មិនត្រឹមតែប៉ុណ្ណោះ ជាមួយនឹងប្រភពអាហារដ៏សម្បូរបែប តំបន់ផ្កាថ្មក៏ជាកន្លែងនេសាទដ៏សំខាន់នៅតាមប្រទេសមានព្រំដែនជាប់សមុទ្រផងដែរ ក្នុងការលើកស្ទួយជីវភាពសេដ្ឋកិច្ចជាតិ។ តែក្នុងរយៈពេលប៉ុន្មានទសវត្សរ៍ចុងក្រោយនេះ សកម្មភាពរបស់មនុស្សបានបង្កឲ្យមានការបំផ្លិចបំផ្លាញយ៉ាងធ្ងន់ធ្ងរទៅកាន់តំបន់ផ្កាថ្ម ដែលត្រូវបានសមាគមន៍បរិស្ថាននានាជុំវិញពិភពលោកមានការព្រួយបារម្ភយ៉ាងខ្លាំង។
គេហទំព័ររបស់អង្គការការពារសត្វព្រៃពិភពលោក WWF ក៏បានលើកឡើងដែរថា តំបន់ផ្កាថ្មមិនអាចរស់នៅក្នុងកម្រិតសីតុណ្ហភាពក្តៅដែលបង្កដោយការកើនឡើងកម្តៅផែនដីនោះទេ។ បើកម្តៅភពផែនដីនៅតែបង្កកើនឡើង នោះគេរំពឹងទុកថា ផ្កាថ្មជាច្រើនតំបន់ទៀតនឹងត្រូវបាត់បង់ជីវិតក្នុងពេលដីខ្លីខាងមុខ។ សកម្មភាពនេសាទមួយចំនួនក៏ជួយពន្លើនល្បឿននៃការបំផ្លាញផ្កាថ្មផងដែរ ដូចជាការនេសាទដោយប្រើប្រាស់គ្រាប់បែកផ្ទុះ ការវាយកម្ទេចផ្កាថ្ម និងការនេសាទហួសកម្រិតជាច្រើនករណី
ទៀត។
សកម្មភាពទេសចរណ៍មួយចំនួនក៏មានអំពើអវិជ្ជមានទៅកាន់តំបន់ធម្មជាតិនេះដែរ។ ការសាងសង់សំណង់នៅតាមតំបន់ផ្កាថ្ម ការទម្លាក់យុទ្ធការពីកប៉ាល់ ការចុះទៅលេងក្នុងទឹកដោយគ្មានការប្រុងប្រយ័ត្ន និងការបង្ហូរសារធាតុកខ្វក់ចូលទៅក្នុងទឹកជាដើម និងមួយវិញទៀតការនេសាទផ្កាថ្មជាវត្ថុអនុស្សវរីយ៍ សុទ្ធសឹងតែជាសកម្មភាពដែលមនុស្សកំពុងតែមើលរំលងផលប៉ះពាល់របស់ពួកវា៕
Tag:
ចំណេះដឹងទូទៅ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
