ជាតិ
សង្គមជាតិ
រូបសំណាកព្រះបរមរតនៈកោដ្ឋទ្រង់ព្រះរាជសារ ក្នុងសាលារចនា មានអត្ថន័យដូចម្ដេច? រូបសំណាកព្រះបរមរតនៈកោដ្ឋ តាំងក្នុងបរិវេណសាលារចនា ដោយព្រះហស្តឆ្វេងទ្រង់ព្រះរាជសារ
× ភ្នំពេញ៖ គ្រោងព្រះពស្ត្របែបប្រពៃណីខ្មែរ បង្ហាញពីព្រះកាយដ៏អង់អាចក្លាហានតែទន់ភ្លន់ ក្នុងទម្រង់ ព្រះហស្តឆ្វេងទ្រង់ព្រះរាជសារ ហើយព្រះហស្តស្ដាំលើកឡើងឆ្ពោះទៅមុខ ដោយព្រះនេត្រសំឡឹងឆ្ងាយ និងមានវង់ព្រះភក្ត្រញញឹមនោះ ជារូបសំណាកព្រះករុណា ព្រះបាទសម្ដេចព្រះនរោត្តម សីហនុ ព្រះបរមរតនៈកោដ្ឋ។ រូបសំណាកព្រះអង្គ ត្រូវបានគេកសាងដាក់នៅក្នុងបរិវេនសាលារចនា។ ក្នុងព្រះឥរិយាបទបែបនេះ តើជាងចម្លាក់ចង់បង្ហាញអត្ថន័យអ្វី?
សូមទស្សនាវីដេអូខាងក្រោម៖
រូបសំណាកព្រះបរមរតនៈកោដ្ឋ ដែលមានតួព្រះកាយកម្ពស់ប្រមាណជា២ម៉ែត្រ ហើយកម្ពស់គិតពីព្រះទម្រប្រមាណជា៤ម៉ែត្រ តាំងក្នុងបរិវេណសកលវិទ្យាល័យភូមិន្ទវិចិត្រសិល្បៈនេះ ជាស្នាដៃរបស់និស្សិតប្រឡងបញ្ចប់ថ្នាក់បរិញ្ញាឯកទេសចម្លាក់កាលពីពេលកន្លងទៅ។
សាស្ត្រាចារ្យដឹកនាំស្នាដៃនៃមហាវិទ្យាល័យសូនរូបលោក សុផុន សំខាន់ បានបកស្រាយពីអត្ថន័យរូបសំណាកព្រះបរមរតនៈកោដ្ឋ ប្រាប់សារព័ត៌មានថ្មីៗថា រូបសំណាកនេះនិស្សិតចង់បង្ហាញពីការដោះស្រាយព្រះរាជកិច្ចរបស់ព្រះអង្គ ទាមទារឯករាជ្យពីបារាំង កាលពីថ្ងៃទី៩ វិច្ឆិកាឆ្នាំ១៩៥៣ ធ្វើឡើងដោយសន្តិវិធី។
រូបសំណាកព្រះបរមរតនកោដ្ឋតាំងក្នុងបរិវេណសាលារចនាដោយព្រះហស្តឆ្វេងទ្រង់ព្រះរាជសារ
លោក សុផុន សំខាន់ បានពន្យល់បន្ថែមថា៖«សិស្សបកស្រាយថា ព្រះរាជសារក្នុងព្រះហស្តព្រះអង្គ បានបញ្ជាក់ថាព្រះអង្គដោះស្រាយបញ្ហាដោយមិនប្រើហឹង្សា។ យើងដឹងគ្រប់គ្នាថាព្រះអង្គមានភាពទន់ភ្លន់ និងរោះរាយ ដូច្នេះព្រះភក្ត្ររបស់ព្រះអង្គមានស្នាមញញឹម ហើយព្រះកាយព្រះអង្គមានភាពអង់អាចក្លាហាន»។
ក្រៅពីការទាមទារឯករាជពីបារាំង កិច្ចព្រមព្រៀងនៅទីក្រុងប៉ារីសពីបញ្ហាកម្ពុជា កាលពីថ្ងៃទី២៣តុលាឆ្នាំ១៩៩១ ក៏ព្រះអង្គបានដោះស្រាយបញ្ហាដោយសន្តិវិធីដែរ ដើម្បីរក្សានិងការពារអធិបតេយ្យភាព ឯករាជ បូរណភាព ភាពមិនអាចរំលោភបាននៃដែនដីអព្យាក្រឹតភាព និងឯកភាពជាតិកម្ពុជា បន្ទាប់ពីប្រទេសក៏កម្សត់មួយនេះ បានឆ្លងកាត់សង្គ្រាមស៊ីវិលអស់ជាច្រើនទសវត្សរ៍មកនោះ៕
Tag:
ព្រះបរមរតនៈកោដ្ឋ
សាលារចនា
ចម្លាក់
សំណាក
© រក្សាសិទ្ធិដោយ thmeythmey.com