កីឡាអន្តរជាតិ
អន្តរជាតិ
Pacquiao ឌឺ Floyd៖ បើវ៉ៃលំៗ Jack Ma កំដរបាន តែបើមែនទែន មកវ៉ៃជាមួយខ្ញុំ!
× Manny Pacquiao និងមិត្តភ័ក្ត្រថ្មីរបស់ខ្លួនគឺមហាសេដ្ឋី Jack Ma បានបង្ហោះវីដេអូរួមគ្នាមួយដើម្បីឌឺដងទៅកំពូលអ្នកប្រដាល់អាមេរិក Floyd Mayweather Jr។ ក្នុងវីដេអូនោះ អ្នកប្រដាល់ហ្វីលីពីន អះអាងថាមិត្តរបស់ខ្លួនដែលជា «Real Money Team» ចង់ឡើងប្រកួតជាមួយអ្នកប្រដាល់មិនស្គាល់ចាញ់របស់អាមេរិក។
Pacquiao បានបង្ហោះវីដេអូរយៈពេល ២៧ វិនាទីលើបណ្តាញសង្គម Instagram របស់ខ្លួននៅថ្ងៃទី២៧ ខែតុលា ដែលបង្ហាញពីការហ្វឹកហាត់ប្រដាល់រួមគ្នាជាមួយលោក Ma សហស្ថាបនិកក្រុមហ៊ុន Alibaba។ លោក Ma បានប្រើកណ្តាប់ដៃវាយជាច្រើនលើកទៅលើ Pacquiao ដែលជាអ្នកបង្វឹកអមជាមួយបទភ្លេង rock ផង។
ឆ្លៀតពេលនោះ Pacquiao បានហៅឈ្មោះ Floyd Mayweather ហើយនិយាយថា៖«Mayweather ប្រសិនបើអ្នកចង់បានការប្រកួតពិតប្រាកដ ឡើងមកវ៉ៃជាមួយខ្ញុំមក តែបើសិនអ្នកចង់វ៉ៃបែបសម្តែងច្បោលៗ មិត្តរបស់ខ្ញុំ Jack Ma អាចកំដរបាន គាត់ជាក្រុមអ្នកមានពិត «Real Money Team»»។
ក្រោយស្តេចប្រដាល់អាស៊ីនិយាយចប់ លោកមហាសេដ្ឋីចិនវ័យ៥៥ឆ្នាំ ដែលមានទ្រព្យសរុប ៣៨,៥ពាន់លានដុល្លារអាមេរិក ក៏បានរៀបរាប់តាមក្រោយថា៖« មែនហើយ, ខ្ញុំបានត្រៀមរួចរាល់គ្រប់ពេលវេលា គ្រប់ទីកន្លែង ក្រុមរបស់ Pacquiao (Manny Team) បានត្រៀមខ្លួនរួចរាល់ហើយ»។ វីដេអូដែលបានបង្ហោះនោះទទួលបានការចុច Like ជិត១៩ម៉ឺនដងឯណោះ គិតត្រឹមថ្ងៃទី២៩ ខែតុលានេះ។
Pacquiao ក៏បានសរសេរសារលើវីដេអូដែលខ្លួនបង្ហោះលើ Instagram នោះថា វីដេអូនេះគឺផ្ញើជូន Mayweather ខណៈដែលសមាជិកព្រឹទ្ធសភាហ្វីលីពីនរូបនេះ ចង់ឡើងសង្វៀនសារជាថ្មីដើម្បីតទល់ជាមួយ អ្នកប្រដាល់មិនទាន់ស្គាល់ចាញ់សញ្ជាតិអាមេរិកវ័យ៤២ឆ្នាំ Floyd សម្រាប់ជំនួបសងសឹក។
Pacquiao ដែលសព្វថ្ងៃមានវ័យ៤០ឆ្នាំ បានបង្ហាញខ្លួនលើកចុងក្រោយលើសង្វៀនប្រដាល់ដោយយកឈ្នះកីឡាករមេរិក Keith Thurman ដោយពិន្ទុ នាជំនួបដណ្តើមខ្សែក្រវាត់ WBA Super Welterweight។ Pacquiao ក្លាយជាម្ចាស់ខ្សែក្រវាត់ WBA Supr Welterweight ដែល Thurman បានគ្រប់គ្រងតាំងពីឆ្នាំ២០១៥ មក និងជាខ្សែក្រវាត់ទី១៣លំដាប់ពិភពលោករបស់ខ្លួនផងដែរ។ ដោយឡែក Floyd ធ្លាប់ឡើងប្រកួត៥០លើក ឈ្នះទាំង៥០ដង៕
Tag:
Boxer
Manny Pacquiao
Jack Ma
Floyd Mayweather
© រក្សាសិទ្ធិដោយ thmeythmey.com