អន្តរជាតិ
រដ្ឋាភិបាលហ្វីលីពីន បង្កើនការទិញស្រូវពីកសិករដែលរងផលប៉ះពាល់ដោយការនាំចូលច្រើនពេក ប្រភពរូប៖ Reuters
× រដ្ឋាភិបាលហ្វីលីពីន នឹងទិញស្រូវពីកសិករក្នុងស្រុកយ៉ាងច្រើនក្នុងឆ្នាំ២០១៩នេះ បន្ទាប់ពីខ្លួនបានច្រានចោលសំណើដើម្បីអនុវត្តពន្ធការពារ (Safeguard duty) កាលពីសប្តាហ៍មុន។
អាជ្ញាធរអាហារជាតិរបស់ហ្វីលីពីន (NFA) បានបញ្ជាក់ឲ្យដឹងថា ខ្លួននឹងទិញអង្កររហូតដល់ ១,១៤ លានតោនពីកសិករក្នុងស្រុក ដែលរងផលប៉ះពាល់ដោយការលុបបំបាត់ការរឹតបន្តឹងបរិមាណនៃការនាំចូល។ តួលេខនេះកើតឡើងជិត៣ដងឯណោះ បើធៀបនឹងគោលដៅកាលពីលើកមុន ដែលមានចំនួន ៣៨៩ ០០០ តោន។ បើតាមអ្នកនាំពាក្យ លោកស្រី Rebecca Olarte ការបញ្ជាទិញស្រូវរបស់ភ្នាក់ងាររដ្ឋសម្រាប់ឆ្នាំនេះ គឺលើសពាក់កណ្តាលនៃគោលដៅថ្មិីរួចទៅហើយ។
តាមការចុះផ្សាយរបស់ទីភ្នាក់ងារព័ត៌មាន Reuters អាជ្ញាធរខាងលើ ក៏បញ្ជាក់ទៀតថា ខ្លួនត្រូវបានអនុញ្ញាតឲ្យទិញគ្រាប់ស្រូវក្នុងតម្លៃ ១៩ ប៉េសូ (០,៣៧៦ដុល្លារ) ក្នុងមួយគីឡូក្រាម ហើយលក់វាទៅឱ្យអ្នកលក់រាយក្នុងតម្លៃ ២៣ ប៉េសូ (០,៤៥ដុល្លារ) ក្នុងមួយគីឡូក្រាម។
ការប្រកាសនេះ ធ្វើឡើងក្រោយពីរដ្ឋមន្ត្រីរៀបចំសេដ្ឋកិច្ចហ្វីលីពីន Ernesto Pernia បានលើកឡើងកាលពីសុក្រ ២៥ តុលា ថា «គំនិតឆោតល្ងង់» នៃការដាក់ពន្ធលើការនាំចូលអង្ករដែលអាចជំរុញឱ្យមានអតិផរណានោះ ត្រូវបានលុបចោល។ រដ្ឋមន្ត្រីកសិកម្មហ្វីលីពីន William Dar បានជំរុញឲ្យអនុវត្តពន្ធការពារ (Safeguard duty) លើពន្ធគយដែលមានស្រាប់ដូចដែលបានស្នើដោយក្រុមកសិករមួយចំនួន ដោយមានគោលដៅ បន្ធូរបន្ថយផលប៉ះពាល់របស់អ្នកផលិតក្នុងស្រុក ដែលរងគ្រោះដោយសារការកើនឡើងនៃការនាំចូលអង្ករ។
សូមបញ្ជាក់ថា ហ្វីលីពីន ជាប្រទេសនាំចូលអង្ករធំជាងគេបំផុតលើពិភពលោក ហើយជារឿយៗទិញគ្រាប់ស្រូវពីប្រទេសជិតខាងរបស់ខ្លួន ជាពិសេស វៀតណាមនិងថៃ។ កាលពីដើមឆ្នាំ២០១៩ ហ្វីលីពីន បានដកហូតការរឹតបន្តឹងក្នុងការទិញអង្ករពីបរទេសដែលមានអាយុកាល២០ឆ្នាំ ហើយជំនួសដោយការដាក់ពន្ធវិញ។
ការផ្លាស់ប្តូរគោលនយោបាយនេះ បាននាំឱ្យមានការនាំចូលអង្ករពីវិស័យឯកជនច្រើនសន្ធឹកសន្ធាប់ ដោយការបញ្ជាទិញសម្រប់ឆ្នាំនេះឈានដល់បរិមាណកំណត់ត្រាប្រចាំឆ្នាំ ជាង៣លានតោនលើសពីអ្វីដែលប្រទេសហ្វីលីពីនត្រូវការដើម្បីបំពេញការផ្គត់ផ្គង់។ ខណៈគោលនយោបាយនេះបានជួយទម្លាក់តម្លៃលក់រាយ និងកាត់បន្ថយអតិផរណានោះ កសិករក្នុងស្រុកបែរជាទទួលរងប៉ះពាល់ដ្បិតតម្លៃកសិផលទិញផ្ទាល់ពីកសិដ្ឋានដាំក្បាលចុះខ្លាំង៕
© រក្សាសិទ្ធិដោយ thmeythmey.com