ជាតិ
អ្នកនេសាទ ឃើញសពអណ្តែតក្បែរកោះស្ដេច តែមិនប្រាកដថាជានារីជនជាតិអង់គ្លេសដែលបាត់ខ្លួន
Bambridge Amelia Louise (ប្រភពរូបភាពពីទំព័រហ្វេសប៊ុករបស់ Bambridge Amelia Louise )
×![]()
ដោយ: ឡាយ សុភាវតី
អ្នកនេសាទប្រទះឃើញសាកសពអណ្ដែតនៅក្បែរកោះស្ដេច កាលពីម៉ោងប្រមាណ១០ព្រឹក ថ្ងៃទី២៧តុលា ដែលសនិដ្ឋានថាអាចជាសាកសពមនុស្សស្រី តែមិនប្រាកដថាជាសាកសពរបស់នារីជនជាតិអង់គ្លេស Bambridge Amelia Louise ដែលបាត់ខ្លួន កាលពីថ្ងៃ២៤តុលា នៅកោះរ៉ុងសន្លឹមនោះទេ។ 
អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ បានប្រាប់សារព័ត៌មានថ្មីៗតាមទូរស័ព្ទនៅថ្ងៃទី៣០តុលានេះថា អ្នកនេសាទម្នាក់បានរាយការណ៍ទៅកងទ័ពជើងទឹកនៅតំបន់ខេត្តកោះកុង បន្ទាប់ពីប្រទះឃើញសាកសពអណ្ដែតនៅក្បែរកោះស្ដេច ចំណុចទឹកដីខេត្តកោះកុង កាលពីម៉ោងប្រមាណ១០ព្រឹក ដែលមានចម្ងាយប្រមាណជាង៦០គីឡូម៉ែត្រ ពីកោះរ៉ុង។ អ្នកនេសាទមើលឃើញសាកសពអណ្តែតផ្ងារ ដែលទូទៅអ្នកនេសាទសនិដ្ឋានថា សពអណ្តែតផ្ងារ ជាសពមនុស្សស្រី។
លោក បញ្ជាក់ថា៖«នៅថ្ងៃទី២៩ ទើបសមត្ថកិច្ច ទទួលបានដំណឹងថា អ្នកនេសាទប្រទះឃើញសាកសពអណ្ដែតកាលពីថ្ងៃទី២៧តុលានេះ។ អ្នកនេសាទគ្រាន់តែប្រទះឃើញ ហើយមករាយការណ៍ប៉ុណ្ណោះ។ មកដល់ពេលនេះ នៅមិនទាន់រកឃើញសាកសពនៅឡើងទេ ហើយយើងក៏មិនទាន់ប្រាកដថាសាកសពនោះ ជានារីជនជាតិអង់គ្លេសដែលបាត់ខ្លួនដែរ»។ លោក បន្ថែមថា សមត្ថកិច្ចកំពុងស្វែងរកសាកសព ដែលអ្នកនេសាទនោះ ប្រទះឃើញ។
គិតមកដល់ថ្ងៃនេះ មានរយៈពេល៧ថ្ងៃហើយ ដោយអ្នកនាំពាក្យរដ្ឋបាលខេត្តព្រះសីហនុ បានអះអាងថា នៅមិនទាន់រកឃើញនារីជនជាតិអង់គ្លេស Bambridge Amelia Louise ដែលបានបាត់ខ្លួនននោះទេ។
សូមបញ្ជាក់ថា នារីដែលបាត់ខ្លួន បានចេញពីខេត្តព្រះសីហនុ ទៅកោះរ៉ុងសន្លឹម កាលពីល្ងាចថ្ងៃទី១៩ខែតុលា ហើយចូលស្នាក់នៅផ្ទះសំណាក់ Ness Beach។ កម្លាំងជំនាញថា គេប្រទះឃើញនាងលើកចុងក្រោយនៅក្នុងកម្មវិធីជប់លៀង នៅឆ្នេរកោះរ៉ុងសន្លឹមប្រមាណម៉ោង៣កន្លះទៀបភ្លឺ ឈានចូលថ្ងៃទី២៤តុលា ឆ្នាំ២០១៩។ ក្រោយពេលកើតហេតុ សមត្ថកិច្ច បានរកឃើញកាបូប និងសម្ភារមួយចំនួន នៅលើផ្ទាំងថ្មក្បែរឆ្នេរជិតកន្លែងជប់លៀង៕
Tag:
បាត់ខ្លួន
ជនជាតិអង់គ្លេស
© រក្សាសិទ្ធិដោយ thmeythmey.com
