អន្តរជាតិ
ស្ត្រីជប៉ុនដំបូងដែលកាន់តំណែងប្រធាន UNHCR ទទួលមរណភាពក្នុងអាយុ៩២ឆ្នាំ
លោកស្រី Sadako Ogata នាកិច្ចសម្ភាសមួយកាលពីឆ្នាំ២០១៥ និងរូបនាពេលចុះទៅស្ថានភាពពលរដ្ឋខ្មែរនៅជំរុំភៀសខ្លួនកាលពីឆ្នាំ១៩៧៩។ រូបថត Asahi Shimbun
×![]()
ដោយ: រួបរួម
លោកស្រី Ogata Sadako ស្ត្រីដំបូងរបស់ជប៉ុនដែលកាន់តំណែងជាឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) បានទទួលមរណភាពក្នុងអាយុ៩២ឆ្នាំ កាលពីថ្ងៃទី២២ ខែតុលា ឆ្នាំ២០១៩ នៅក្រុងតូក្យូ ដែលជាទីកំណើតរបស់លោកស្រី។
លោកស្រី Ogata ដែលជាអ្នកវិទ្យាសាស្ត្រនយោបាយ អ្នកការទូត និងជាសាស្ត្រាចារ្យផងដែរនោះ បានបំពេញតួនាទីជាច្រើនក្នុងការជួយដោះស្រាយបញ្ហាជនភៀសខ្លួន ជាពិសេសនៅតំបន់ឈូងសមុទ្រពែក្ស តំបន់អាហ្វ្រិក ក៏ដូចជាកម្ពុជា ផងដែរ។
នៅឆ្នាំ១៩៧៦ លោកស្រីក្លាយជាស្ត្រីជប៉ុនដំបូង ដែលទទួលបានបំពេញបេសកកម្មការទូតប្រចាំអង្គការសហប្រជាជាតិ និងជាតំណាងរដ្ឋាភិបាលជប៉ុនក្នុងគណៈកម្មាធិការសិទ្ធិមនុស្សប្រចាំអង្គការសហប្រជាជាតិ ក៏ដូចជាតំណែងផ្សេងៗទៀត។
ពីឆ្នាំ១៩៩១ ដល់ឆ្នាំ២០០០ លោកស្រី Ogata បានកាន់តំណែងជាឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) និងបន្តកាន់តួនាទីជាប្រធានទីភ្នាក់ងារសហប្រតិបត្តិការអន្តរជាតិជប៉ុន (JICA) ចន្លោះពីឆ្នាំ២០០៣ ដល់ឆ្នាំ២០១២។
ក្នុងបេសកកម្មមនុស្សធម៌អន្តរជាតិ លោកស្រី Ogata បានដើរតួនាទីយ៉ាងសំខាន់ក្នុងកិច្ចគាំពារប្រជាពលរដ្ឋពីបញ្ហាជម្លោះ ភាពក្រីក្រ និងការគំរាមកំហែងផ្សេងៗ ដូចជាការគាំទ្រដល់ជនជាតិឃឺតក្នុងប្រទេសអ៊ីរ៉ាក់ ដែលរងគ្រោះដោយសារសង្គ្រាមឈូងសមុទ្រពែក្ស ជាដើម។
ទាក់ទងនឹងកម្ពុជា ស្ថានទូតជប៉ុនប្រចាំកម្ពុជា បានរំលឹកថា លោកស្រី Ogata បានដឹកនាំការិយាល័យUNHCR ដើម្បីសម្រេចបាននូវមាតុភូមិនិវត្តន៍ជនភៀសខ្លួនកម្ពុជាប្រមាណ៣៧០.០០០ នាក់ពីជំរុំជនភៀសខ្លួននៅតំបន់ព្រំដែនជាមួយថៃមកកម្ពុជាវិញក្នុងឆ្នាំ១៩៩២-១៩៩៣ ដើម្បីឲ្យអ្នកទាំងនោះអាចចូលរួមការបោះឆ្នោតដែលរៀបចំដោយអ៊ុនតាក់។
«បន្ទាប់ពីចាកចេញពីតំណែងជាឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន លោកស្រីបានចូលរួមយ៉ាងសកម្មក្នុងកិច្ចការពាក់ព័ន្ធនឹងជំនួយរបស់ជប៉ុនដល់ប្រទេសកម្ពុជាក្នុងនាមជាប្រធានអង្គការJICA ចាប់ពីឆ្នាំ២០០៣ ដល់ឆ្នាំ២០១២»។ នេះបើតាមការអះអាងរបស់ស្ថានទូតជប៉ុនប្រចាំកម្ពុជា។
ស្វាមីរបស់លោកស្រី Ogata គឺលោក Shijuro Ogata អតីតប្រធានធនាគារអភិវឌ្ឍជប៉ុន ដែលបានទទួលមរណភាពកាលពីឆ្នាំ២០១៤ ក្នុងអាយុ៨៤ឆ្នាំ។ ពួកគាត់មានកូនប្រុសម្នាក់ និងស្រីម្នាក់។
តាមរយៈបេសកកម្មរបស់ខ្លួន លោកស្រី Ogata បានទទួលពានរង្វាន់ និងឥស្សរិយយសជាច្រើន ក្នុងនោះមានដូចជា ពាន UNESCO Felix Houphovet-Boigny Peace Prize, ពាន Asahi Prize Special Award និង Japanese Order of Culture ជាដើម៕
Tag:
UNHCR
© រក្សាសិទ្ធិដោយ thmeythmey.com
