អន្តរជាតិ
អាមេរិកបញ្ចេញវីដេអូវាយឆ្មក់សម្លាប់មេក្រុម ISIS បាក់ដាឌី
× មន្ទីរបញ្ចកោណអាមេរិក បានបញ្ចេញវីដេអូ និងរូបភាពប្រតិបត្តិការវាយឆ្មក់កាលពីសៅរ៏ទី២៦ តុលា ដែលបានសម្លាប់ប្រមុខក្រុម ISIS អាប៊ូ អាកើ អាល់-បាក់ដាឌី (Abu Bakr al-Baghdadi) ។
កងកម្លាំងពិសេសអាមេរិក ប្រើកាំភ្លើងបាញ់រះហ៊ុមព័ទ្ធទីតាំងរបស់លោក បាក់ដាឌី ខណៈឧទ្ធម្ភាគចក្រជាច្រើនគ្រឿងហោះសំកាំងពីលើនោះ។ វីដេអូដែលថតចេញពីដ្រូន ក៏បង្ហាញពីទិដ្ឋភាពការវាយប្រហារពីលើអាកាសដែលបាញ់ចេញពីយន្តហោះចម្បាំង F-15 អាមេរិកផងដែរ។ ចុងក្រោយ ដ្រូនប្រយុទ្ធប្រភេទ MQ-9 Reaper បានបាញ់មីស៊ីលកម្ទេចទីតាំងនោះចោលនៅពេលប្រតិបត្តិការសម្រេចជោគជ័យ។
បើតាមវីដេអូ ស-ខ្មៅ ហើយព្រាលៗ ដែលទើបត្រូវបានមន្ទីរបញ្ចកោណអាមេរិកបញ្ចេញជាសាធារណៈ នៅថ្ងៃទី៣០ ខែតុលា ឧទ្ធម្ភាគចក្រអាមេរិកបានបាញ់រះលើសកម្មប្រយុទ្ធស្មោះស្ម័គ្រនឹង បាក់ដាឌី ។ បើតាមលោកឧត្តមសេនីយ៍ Frank Mckenzie មេបញ្ជាការនៃបញ្ជាការដ្ឋានតំបន់កណ្តាលរបស់អាមេរិក ការបាញ់ប្រហារពីលើអាកាសនេះ សម្លាប់មនុស្សយ៉ាងតិច១០ទៅ១៥នាក់។ ទន្ទឹមនេះ យន្តហោះចម្បាំងអាមេរិក ក៏បាញ់កម្ទេចរថយន្តសត្រូវមួយគ្រឿងដែលបើកទៅជិតទីតាំងបើកប្រតិបត្តិការ។
តាមការចុះផ្សាយរបស់ទូរទស្សន៍អាមេរិក CNN ឧត្តមសេនីយ៍ McKenzie អះអាងថា DNA ដែលប្រើកំណត់អត្តសញ្ញាណរបស់ បាក់ដាឌី គឺជាសំណាកដែលប្រមូលបាន អំឡុងពេលឃុំខ្លួនរបស់មេក្រុមរដ្ឋឥស្លាមរូបនេះ នៅឯមន្ទីរឃុំឃាំង Camp Bucca ក្នុងប្រទេសអ៊ីរ៉ាក់ កាលពីឆ្នាំ២០០៤។ ម្យ៉ាលោកពុំ អាចបញ្ជាក់បានថា បាក់ដាឌី ទួញសោកបោកខ្លួន នៅនាទីចុងក្រោយមុនស្លាប់ ដូចដែលលោកប្រធានាធិបតីអាមេរិក ដូណាល់ ត្រាំ អះអាងក្នុងសេចក្ដីថ្លែងការណ៍តាមទូរទស្សន៍កាលពីថ្ងៃអាទិត្យកន្លងទៅឡើយ។ យ៉ាងណាមិញ លោកឧត្តមសេនីយ៍ McKenzie បន្ថែមថា មេភេរវកររូបនេះបានលូនចូលទៅក្នុងរូងមួយជាមួយកូនតូច២នាក់ និងបានបំផ្ទុះខ្លួនឯង៕
ខាងក្រោមជាវីដេអូ ដែលបង្ហោះលើឆាណែលរបស់សារព័ត៌មាន The Guardian៖
Tag:
សហរដ្ឋអាមេរិក
ISIS
មន្ទីរបញ្ជកោណ
© រក្សាសិទ្ធិដោយ thmeythmey.com