អន្តរជាតិ
ចិនណែនាំពលរដ្ឋខ្លួនឲ្យពង្រឹងសីលធម៌ និងប្រព្រឹត្តសមរម្យពេលដើរហើរនៅបរទេស ប្រភពរូប៖ CNN
× គណបក្សកម្មុយនីស្តចិន បានដាក់ចេញសេចក្តីណែនាំថ្មីក្នុងគោលដៅពង្រឹងគុណភាពខាងសីលធម៌របស់ពលរដ្ឋខ្លួន ដែលរាប់ចាប់ពីការស្លៀកពាក់ឲ្យបានត្រឹមត្រូវ និងមានអាកប្បកិរិយាសមរម្យពេលដើរហើរនៅក្រៅប្រទេសជាដើម។
ប៉ុន្មានថ្ងៃក្រោយមានប្រជុំបិទទ្វារក្នុងចំណោមមន្ត្រីជាន់ខ្ពស់ចិន នារដ្ឋធានី ប៉េកាំង ដែលពិភាក្សាពីទិសដៅអនាគតរបស់ប្រទេសចិន ក្រុងប៉េកាំង បានបញ្ចេញសំណុំគោលការណ៍ណែនាំមួយចំនួន។ មានចំណងជើងថា «ផែនការសម្រាប់អនុវត្តនៃការកសាងសីលធម៌ពលរដ្ឋក្នុងសករាវថ្មី» រដ្ឋាភិបាលចិន មានគោលដៅណែនាំប្រជាជនចិនពីរបៀបប្រើប្រាស់អ៊ីនធឺណិត, ចិញ្ចឹមកូន, អបអរថ្ងៃឈប់សម្រាកសាធារណៈ និងរៀបចំខ្លួនសមរម្យពេលធ្វើដំណើរទៅក្រៅប្រទេស។
តាមការចុះផ្សាយរបស់ទីភ្នាក់ងារព័ត៌មាន AFP គោលការណ៍ណែនាំដដែលនេះ ក៏ស្នើឲ្យបង្កើតឡើងនូវអ្វីដែលបក្សកម្មុយនីស្តហៅថា «ព្រលឹងជនជាតិចិន, គុណតម្លៃជនជាតិចិន និងអំណាចជនជាតិចិន»។ ម្យ៉ាងទៀតរដ្ឋាភិបាលចិន តាមរយៈសេចក្តីណែនាំនេះ ក៏ទទូចឲ្យពលរដ្ឋចៀសវាងការមើលរឿងអាសអាភាសតាមអនឡាញ ហើយគោរពតាមក្រមប្រតិបត្តិត្រឹមត្រូវនៅពេលឡើងកាន់ទង់ជាតិ ឬស្រែកច្រៀងចម្រៀងជាតិជាដើម។
ចំណែកឯ ស្ថាប័នសាធារណៈ ដូចជា បណ្ណាល័យនិងមជ្ឈមណ្ឌលសម្រាប់យុវជន ត្រូវអនុវត្តការអបរំខាងផ្នែកសីលធម៌ ដើម្បីលើកកម្ពស់ស្តង់ដារសីលធម៌និងការយល់ដឹងខាងផ្នែកមនោគមវិជ្ជា។ នេះយោងតាមកម្រងក្បួនវិន័យនេះ ហើយវាក៏សង្កត់ធ្ងន់ពីស្នេហាជាតិ និងភាពស្មោះស្ម័គ្រចំពោះមាតុភូមិផងដែរ ដោយលើកឡើងថា៖«ប្រជាជន[ចិន] ដែលប្រព្រឹត្តិអាកប្បកិរិយាច្រងេងច្រងាងទៅកាន់ជាតិសាសន៍ដទៃ, បំផ្លាញភាពថ្លៃថ្នូជាតិ និងលក់ប្រយោជន៍ជាតិនោះ ត្រូវតែទទួលទោសតាមច្បាប់»។
ក្នុងគោលការណ៍ណែនាំដាច់ដោយឡែកមួយ ចេញផ្សាយក្នុងសប្តាហ៍នេះ មានគោលដៅល់តំបន់ជនបទរបស់ចិន ហើយទទូចឲ្យរដ្ឋាភិបាលតំបន់លុបចោល ទំនាមទម្លាប់អាក្រក់ ចោល។ នោះគឺរួមមាន ការបំពារបំពានមនុស្សចាស់ជរា ក៏ដូចជាការខ្ជះខ្ជាយលុយជ្រុលហួសហេតុលើពិធីមង្គលការ និងបុណ្យសព។
ទូរទស្សន៍រដ្ឋចិន CCTV ចុះផ្សាយថា ទំនៀមទម្លាប់ក្នុងការចំណាយលុយច្រើនលើពិធីមង្គលការ និងផ្តល់ផ្ទះនិងអំណោយសម្រាប់កូនក្រមុំថ្មី កំពុងដាក់គំនាបខ្លាំងលើបុរសដែលពុំទាន់រៀបការ ព្រោះថាការចាយវាយថ្លៃពេក គឺហួសសមត្ថភាពរបស់គ្រួសារអ្នកជនបទ ដែលមានជីវភាពក្រីក្រ៕
Tag:
ចិន
បក្សកម្មុយនីស្ត
សេចក្តីណែនាំ
© រក្សាសិទ្ធិដោយ thmeythmey.com