វាជាកំណត់ត្រាថ្មីសម្រាប់សហព័ន្ធកីឡាហុកគីកម្ពុជាដែលមានអាជ្ញាកណ្តាលខ្លួនចូលរួមកាត់សេចក្តីក្នុងប្រកួតលក្ខណៈអន្តរជាតិជាលើកដំបូង។ កំណត់ត្រាថ្មីនេះ កើតឡើងក្រោយលោកស្រី ឈឿង ពុទ្ធារីម ត្រូវបានសហព័ន្ធកីឡាហុកគីអាស៊ី(AHF)ជ្រើសរើសឲ្យធ្វើជាអាជ្ញាកណ្តាលចៅក្រមក្នុងការប្រកួតកីឡាស៊ីហ្គេមនៅប្រទេសហ្វីលីពីន នាចុងឆ្នាំនេះ។ ទាំងថ្នាក់ដឹកនាំក្រសួងអប់រំ និងសហព័ន្ធសាម៉ីសុទ្ធតែបានបង្ហាញមោទកភាព និងចាត់ទុកជាឱកាស ដើម្បីបង្ហាញពីភាពរីកចម្រើនលើវិស័យកីឡារបស់កម្ពុជាទៅកាន់ពិភពលោក និងជួយបង្កើតទំនុកចិត្តដល់កីឡាករហុកគី ដែលចូលរួមប្រកួតឆ្នាំនេះ។
លោកស្រី ឈឿង ពុទ្ធារីម អាជ្ញាកណ្តាលកម្រិតអន្តរជាតិប្រចាំសហព័ន្ធកីឡាហុកគីកម្ពុជា នឹងស្ថិតក្នុងចំណោមអាជ្ញាកណ្តាលអន្តរជាតិជាច្រើនរូបទៀត ដែលត្រូវចូលរួមកាត់សេចក្តីក្នុងការប្រកួតកីឡាស៊ីហ្គេមលើកទី៣០នៅហ្វីលីពីន លើវិញ្ញាសារហុកគី។ ការបង្ហាញវត្តមានជាលើកដំបូងនេះ ធ្វើឡើងក្រោយ នាងទទួលបានការជ្រើសតាំងពីសហព័ន្ធកីឡាហុកគីអាស៊ី។ នេះបើតាមលិខិតរបស់សហព័ន្ធកីឡាហុកគីអាស៊ី ដែលបានផ្ញើមកសហព័ន្ធកីឡាហុកគីកម្ពុជា កាលពីថ្ងៃទី១២ ខែសីហា ឆ្នាំ២០១៩។
ការបង្ហាញខ្លួនក្នុងនាមអាជ្ញាកណ្តាលកម្រិតអន្តរជាតិនេះដែរ ជួយឲ្យលោកស្រី ពុទ្ធារីម អតីតកីឡាការិនីជម្រើសជាតិតេក្វាន់ដូ ក្លាយជាស្ត្រីដំបូងគេរបស់សហព័ន្ធកីឡាហុកគីកម្ពុជា ដែលទទួលបានការវាយតម្លៃ និងទុកចិត្តពីស្ថាប័នអន្តរជាតិ។ កត្តានេះបង្ហាញឲ្យឃើញថា ធនធានមនុស្ស ក៏ដូចជាវិស័យកីឡាកម្ពុជាមានការរីកចម្រើនមិនចាញ់ប្រទេសដទៃឡើយ។ លើសពីនេះ គឺសបញ្ជាក់ឲ្យឃើញថា ស្ត្រីមានសមត្ថភាពមិនចាញ់បុរសនោះឡើយ។
បើតាមលោក កាំង សុធា អគ្គលេខាធិការសហព័ន្ធកីឡាហុកគីកម្ពុជា មុនត្រូវបានជ្រើសរើសជាអាជ្ញាកណ្តាលអន្តរជាតិឲ្យចូលរួមកាត់ក្តីនៅលើកនេះលោកស្រី ឈឿង ពុទ្ធារីម ត្រូវឆ្លងកាត់ការវាយតម្លៃលើសមត្ថភាពពីគណៈកម្មការជំនាញរបស់សហព័ន្ធកីឡាហុកគីអាស៊ី និងប្រកួតប្រជែងជាអាជ្ញាកណ្តាលកម្រិតអន្តរជាតិមកពីប្រទេសផ្សេងៗជាច្រើនរូបទៀត។ លោកបន្ថែមថា ពុទ្ធារីម ជាអាជ្ញាកណ្តាលតែម្នាក់គត់ ដែលទទួលបានការបណ្តុះបណ្តាលជំនាញអាជ្ញាកណ្តាលចៅក្រមអន្តរជាតិកីឡាហុកគី។
«ខ្ញុំមានមោទកភាពខ្លាំងមែនទែន ដែលសហព័ន្ធកីឡាហុកគីអាស៊ីបានផ្តល់ការទុកចិត្តលើជនជាតិខ្មែរមួយរូប ឲ្យចូលរួមកាត់ក្តីជាលក្ខណៈអន្តរជាតិ ព្រោះកន្លងមកយើងមិនធ្លាប់មាននោះទេ មានតែអាជ្ញាកណ្តាលមកពីប្រទេសផ្សែងៗ។ ខ្ញុំយល់ថា ការក្លាយជាអាជ្ញាកណ្តាលកាត់សេចក្តីជាលើកដំបូងនេះ នឹងជួយឲ្យកីឡាករយើងកាន់តែមានទំនុកចិត្ត និងមានរម្មណ៍ស្ងប់ក្នុងការប្រកួត»។ នេះជាការលើកឡើងរបស់លោក កាំង សុធា ក្នុងបទសម្ភាសតាមទូរសព្ទជាមួយសារព័ត៌មានថ្មីៗនៅថ្ងៃទី៣១ ខែតុលា។
ជាមួយគ្នានេះ លោក ស សុខា រដ្ឋលេខាធិការក្រសួងអប់រំយុវជននិងកីឡាបានចាត់ទុកការចូលរួមកាត់ក្តីរបស់លោកស្រី ឈឿង ពុទ្ធារីម ថា គឺជាការបង្ហាញពីសមត្ថភាព និងការរីកចម្រើនលើវិស័យកីឡាថ្មីមួយទៀតរបស់កម្ពុជាទៅលើឆាកអន្តរជាតិ។ លោកបានបង្ហាញមោទកភាពយ៉ាងខ្លាំងចំពោះ អតីតកីឡាករតេក្វាន់ដូរូបនេះ ដែលទទួលបានការទុកចិត្តពីស្ថាប័នអន្តរជាតិមួយនេះ។
តាមរយៈហ្វេសទំព័រប៊ុកផ្លូវការខ្លួន រដ្ឋលេខាធិការក្រសួងអប់រំរូបនេះ បានលើកឡើងដូច្នេះថា៖«ខ្ញុំពិតជាមានមោទនភាពណាស់ ដែលអ្នកស្រី ឈឿង ពុទ្ធារីម ត្រូវបានសហព័ន្ធកីឡាហុកគីអាស៊ី ជ្រើសរើសឲ្យក្លាយជាអាជ្ញាកណ្តាលអន្តរជាតិកាត់ក្តីក្នុងការប្រកួតកីឡាស៊ីហ្គេមលើកទី៣០នៅហ្វីលីពីន។ នេះជាកិត្តិយស និងមោទនភាពដ៏អស្ចារ្យមួយទៀតរបស់កម្ពុជានៅលើឆាកអន្តរជាតិ សបញ្ជាក់ថា កីឡាករកីឡាការិនី ក៏ដូចជាវិស័យកីឡានៅកម្ពុជាមិនចាញ់បណ្តាប្រទេសផ្សេងៗនៅលើពិភពលោកឡើយ»។
សហព័ន្ធកីឡាហុកគីកម្ពុជានឹងបញ្ជូនកីឡាករចំនួន១២រូប ឲ្យចូលរួមប្រកួតប្រជែងដណ្តើមមេដាយក្នុងព្រឹត្តិការណ៍កីឡាស៊ីហ្គេមនៅហ្វីលីពីន ដែលប្រព្រឹត្តទៅចាប់ពីថ្ងៃទី៣០ ខែវិច្ឆិកា ដល់ថ្ងៃទី១១ ខែធ្នូ ឆ្នាំ២០១៩។ ខណៈបច្ចុប្បន្នក្រុមកីឡាករហុកគីកំពុងហ្វឹកហាត់ពង្រឹងសមត្ថភាពនៅប្រទេសថៃ៕