សមត្ថកិច្ច រកឃើញសពនារីអង់គ្លេសលើផ្ទៃសមុទ្រ ក្រោយបាត់ខ្លួនមួយសប្តាហ៍

ជាតិ

សង្គមជាតិ

សមត្ថកិច្ច រកឃើញសពនារីអង់គ្លេសលើផ្ទៃសមុទ្រ ក្រោយបាត់ខ្លួនមួយសប្តាហ៍

31, Oct 2019 , 4:26 pm

រូបភាព

ដោយ: ឡាយ សុភាវតី

សមត្ថកិច្ច បានរកឃើញសាកសពនារីជនជាតិអង់គ្លេសឈ្មោះ Bambridge Amelia Louise នៅល្ងាចថ្ងៃទី៣១ ខែតុលានេះ ក្រោយបាត់ខ្លួនមួយសប្តាហ៍កន្លងមក។ នេះបើតាមលោក ជួន ណារិន្ទ ស្នងការខេត្តព្រះសីហនុ ដែលប្រាប់សារព័ត៌មានថ្មីៗ តាមទូរស័ព្ទ។

លោក ទៀ វិចិត្រ ដែលចូលរួមប្រតិបត្តិការក្នុងការស្វែងរកដែរនោះ សរសេរលើទំព័រហ្វេសប៊ុករបស់លោក ថា សាកសពនេះ រកឃើញនៅក្បែរព្រំដែនសមុទ្រកម្ពុជា-ថៃ។

លោក ជួន ណារិន្ទ មិនទាន់អាចបញ្ជាក់បានឡើយពីមូលហេតុដែលនារីអង់គ្លេសនោះ បាត់ខ្លួននិងបាត់បង់ជីវិត។ លោក ប្រាប់ថា សមត្ថកិច្ច កំពុងដឹកសពរបស់នាងចេញពីសមុទ្រ។

នារីជនជាត់អង់គ្លេសនោះ បានចេញពីខេត្តព្រះសីហនុ ទៅកោះរ៉ុងសន្លឹម កាលពីល្ងាចថ្ងៃទី១៩ ខែតុលា ហើយចូលស្នាក់នៅផ្ទះសំណាក់ Ness Beach។ កម្លាំងជំនាញថា គេប្រទះឃើញនាងលើកចុងក្រោយនៅក្នុងកម្មវិធីជប់លៀង នៅឆ្នេរកោះរ៉ុងសន្លឹម នៅម៉ោងប្រមាណ៣កន្លះទៀបភ្លឺ ឈានចូលថ្ងៃទី២៤ ខែតុលា ឆ្នាំ២០១៩។ ក្រោយពេលកើតហេតុ សមត្ថកិច្ច បានរកឃើញកាបូប និងសម្ភារមួយចំនួន នៅលើផ្ទាំងថ្មក្បែរឆ្នេរជិតកន្លែងជប់លៀង៕