ជាតិ
នយោបាយជាតិ
តុលាការ ហៅលោក សម រង្ស៊ី ឲ្យចូលបំភ្លឺនៅថ្ងៃ៧វិច្ឆិកា លើបណ្តឹងសម្តេច ស ខេង
× លោក កូយ សៅ ចៅក្រមស៊ើបសួរនៃសាលាដំបូងរាជធានីភ្នំពេញ ចេញដីកាកោះហៅលោក សម រង្ស៊ី អតីតប្រធានគណបក្សសង្គ្រោះជាតិ ឲ្យចូលទៅបំភ្លឺនៅថ្ងៃទី៧ ខែវិច្ឆិកា ឆ្នាំ២០១៩ លើបណ្តឹងរបស់សម្តេច ស ខេង រដ្ឋមន្ត្រីក្រសួងមហាផ្ទៃ។ ការកោះហៅនេះ គឺមុន២ថ្ងៃប៉ុណ្ណោះ នៃការវិលត្រឡប់របស់លោក សម រង្ស៊ី ពោលគឺលោក សម រង្ស៊ី ប្រកាសថាលោក នឹងចូលមកកម្ពុជា នៅថ្ងៃទី៩ ខែវិច្ឆិកា។
សម្តេច ស ខេង បានប្តឹងលោក សម រង្ស៊ី ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍។ ការរងណ្តឹង គឺដោយសារតែលោក សម រង្ស៊ី លើកឡើងថា សម្តេច ហ៊ុន សែន ជាអ្នកនៅពីក្រោយនៃការបំផ្ទុះឧទ្ធម្ភាគចក្ររបស់លោក ហុក ឡុងឌី អតីតអគ្គស្នងការនគរបាលជាតិ ដែលបណ្តាលលោក ហុក ឡុងឌី ស្លាប់កាលពីចុងឆ្នាំ២០០៨ ហើយលោក សម រង្ស៊ី អះអាងថា លោក ឌី វិជ្ជា អគ្គស្នងការរង ដែលជាកូនបង្កើតរបស់លោក ហុក ឡុងឌី មានគម្រោងសងសឹកឲ្យឪពុក ដោយមានការគាំទ្រពីសម្តេច ស ខេង។
មិនមែនតែសម្តេច ស ខេង ទេ សម្តេចនាយករដ្ឋមន្ត្រី ហ៊ុន សែន និង លោក ឌី វិជ្ជា ក៏ប្តឹងលោក សម រង្ស៊ី ដែរ តែមិនមែនប្តឹងនៅតុលាការស្រុកខ្មែរ ដូចសម្តេច ស ខេង ឡើយ គឺប្តឹងទៅតុលាការបារាំង។ បណ្តឹងរបស់អ្នកទាំង៣ គឺធ្វើឡើងកាលពីអំឡុងខែសីហា ឆ្នាំ២០១៩។ ចំពោះបណ្តឹងនៅតុលាការបារាំង នៅមិនទាន់ព័ត៌មានអ្វីឡើយ៕
Tag:
ស ខេង
សម រង្ស៊ី
តុលាការ
កោះហៅ
© រក្សាសិទ្ធិដោយ thmeythmey.com