អន្តរជាតិ
ឧទ្ធម្ភាគចក្រជួយសង្គ្រោះរបស់កូរ៉េខាងត្បូង ធ្លាក់ចូលសមុទ្រក្បែរកោះមានជម្លោះជាមួយជប៉ុន ប្រជុំកោះ Dokdo ដែលកូរ៉េខាងត្បូងកាន់កាប់ តែទាមទារដោយជប៉ុន។ រួបភាព AFP
×
ដោយ៖ ងូន សុភាវត្តី
មន្ត្រីប៉ូលិសកូរ៉េខាងត្បូងបាននិយាយនៅថ្ងៃទី៣១ ខែតុលាថា ក្រុមអ្នកជួយសង្គ្រោះ កំពុងស្វែងរកអ្នកបាត់ខ្លួន៧នាក់ក្នុងហេតុការណ៍ធ្លាក់ឧទ្ធម្ភាគចក្ររបស់នាយកដ្ឋានពន្លត់អគ្គិភ័យ។ ឧទ្ធម្ភាគចក្រ ដែលកំពុងបំពេញភារកិច្ចនេះ បានចូលសមុទ្រក្បែរប្រជុំកោះដែលមានជម្លោះជាមួយជប៉ុន។
ឧទ្ធម្ភាគចក្រកូរ៉េខាងត្បូងមួយគ្រឿងផលិតដោយក្រុមហ៊ុន Airbus ធុន H225 បានធ្លាក់ចូលសមុទ្របន្ទាប់ពីបានចុះជួយសង្គ្រោះអ្នកនេសាទដែលរងរបួសម្នាក់ចេញពីតំបន់កោះ Dokdo ដែលជាកោះមានជម្លោះជាមួយជប៉ុន។ ជប៉ុនហៅកោះនេះថា Takeshima ។មនុស្ស ៧ នាក់ដែលបានបាត់ខ្លួននោះគឺមាន ៥ នាក់ជាអ្នកជួយសង្គ្រោះ អ្នកនេសាទ និងជនស៊ីវិលម្នាក់។
បើតាមទីភ្នាក់ងារព័ត៌មាន AFP មន្ត្រីនៅទីស្នាក់ការកណ្តាលសេវាកម្មពន្លត់អគ្គិភ័យ Gyeongbuk បាននិយាយថា អ្នកជំងឺស្ថិតនៅលើទូកនេសាទនៅពេលដែលគាត់បាត់បង់ម្រាមដៃមួយរបស់គាត់ដោយគ្រោះថ្នាក់ហើយក្រុមនាវិកបាននាំគាត់ទៅ កោះ Dokdo ហើយរង់ចាំឧទ្ធម្ភាគចក្រសង្គ្រោះនៅទីនោះ។ អ្នកជំងឺrUbn:ត្រូវការការវះកាត់ជាបន្ទាន់ដែលអាចធ្វើបានតែនៅតាមកន្លែងនានានៅលើដីគោកប៉ុណ្ណោះ។
ក្រសួងការពារជាតិកូរ៉េខាងត្បូងនិយាយថា ខ្លួនបានបញ្ជូនកប៉ាល់យន្តហោះ និងអ្នកមុជទឹកនានាដើម្បីចេញប្រតិបត្តិការស្វែងរកជនទាំង៧ នាក់នោះ។ ទាំងកូរ៉េខាងត្បូងនិងជប៉ុនសុទ្ធតែអះអាងថាកោះតូចៗទាំងនេះជាទឹកដីរបស់ខ្លួនរៀងៗខ្លួន។ ប៉ុន្តែកោះមួយចំនួនត្រូវបានគ្រប់គ្រងដោយទីក្រុងសេអ៊ូលជាមួយនឹងក្រុមឆ្មាំសមុទ្រតូចមួយ។
លោកSeong Ho-seon មន្ត្រីមួយរូបក្នុងក្រុមជួយសង្គ្រោះបាននិយាយប្រាប់ទីភ្នាក់ងារព័ត៌មានYonhap ថាឧទ្ធម្ភាគចក្រដែលបានធ្លាក់បានចូលបម្រើសេវាកម្មជាមួយនាយកដ្ឋានពន្លត់អគ្គីភ័យក្នុងឆ្នាំ ២០១៦ ។ ក្រុមហ៊ុន Airbus បានត្រួតពិនិត្យអ័ក្សបង្វិលដោយស្វ័យប្រវត្តិរវាងខែកញ្ញានិងតុលាឆ្នាំនេះផងដែរ។
ឧទ្ធម្ភាគចក្រម៉ូដែល H225 ដែលពីមុនត្រូវបានគេស្គាល់ថាជា Eurocopter EC-225 គឺជាយន្តហោះស្វែងរកនិងជួយសង្គ្រោះចម្ងាយឆ្ងាយនិងធន់នឹងអាកាសធាតុគ្រប់ប្រភេទទៀតផង។ ក្រុមហ៊ុនឧទ្ធម្ភាគចក្រ Airbus ដែលមានមូលដ្ឋាននៅប្រទេសបារាំងនិងជាអង្គភាពរបស់ក្រុមហ៊ុន Airbus SE គឺជាក្រុមហ៊ុនផលិតឧទ្ធម្ភាគចក្រពាណិជ្ជកម្មធំជាងគេរបស់ពិភពលោក មិនអាចទាក់ទងសុំការអត្ថាធិប្បាយបានភ្លាមៗទេទាក់ទងនឹងការធ្លាក់ឧទ្ធម្ភាគចក្រនេះនៅឡើយ៕
© រក្សាសិទ្ធិដោយ thmeythmey.com