សភាអាមេរិក បើកដំណាក់កាលជាចំហនិងថ្មីមួយក្នុងការស៊ើបអង្កេតលោក ដូណាល់ ត្រាំ នៅថ្ងៃព្រហស្បតិ៍ ៣១ តុលា ខណៈតំណាងរាស្ត្រអាមេរិក បោះឆ្នោតជាលើកទី១ក្នុងការពន្លឿនដំណើរការស៊ើបសួរដកតំណែងប្រធានាធិបតី។
«ថ្ងៃនេះ សភាតំណាងអាមេរិក បានដើរទៅមុខមួយជំហានទៀត ខណៈយើងបង្កើតនីតិវិធីសម្រាប់សវនាការចំហ […] ដូច្នេះ សាធារណជន អាចមើលឃើញការពិតផ្ទាល់ភ្នែកពួកគេ»។ លោកស្រីប្រធានសភាតំណាងអាមេរិក ណានស៊ី ផេឡូស៊ី លើកឡើងបែបនេះ ដោយសង្កត់ធ្ងន់ថា គ្មានអ្វីសំខាន់ជាងលទ្ធិប្រជាធិបតេយ្យអាមេរិកឡើយ។
តំណាងរាស្ត្រអាមេរិកក្នុងសភាតំណាង បានបោះឆ្នោតគាំទ្រ២៣២ទល់១៩៦សំឡេង ដើម្បីអនុម័តសេចក្តីសម្រេចមួយដែលដាក់ចេញគោលការណ៍ណែនាំសម្រាប់ដំណាក់ការបន្ទាប់នៃដំណើរការស៊ើបសួរដកតំណែងប្រធានាធិបតី។ សមាជិកបក្សសាធារណរដ្ឋទាំងអស់ដែលនៅក្នុងសភាតំណាង បោះឆ្នោតប្រឆាំងចំណាត់ការនេះ ទោះបីបារម្ភជាច្រើនសប្តាហ៍ថា ការបោះឆ្នោតនេះអាចបញ្ចប់ដំណើរការស៊ើបសួរជាលក្ខណៈសម្ងាត់ ហើយនាំយកដំណើរការនេះទៅជាបែបចំហវិញ។
ឥឡូវនេះ ការស៊ើបអង្កេតផ្លាស់ប្តូរជាលក្ខណៈចំហ ដែលអនុញ្ញាតប្រជាជនអាមេរិកបានទស្សនាតាមទូរទស្សន៍ផ្សាយផ្ទាល់ជុំវិញដំណើរការស្វែងរកភស្តុតាងប្រឆាំងលោកត្រាំ។ គោលដៅរបស់សមាជិកបក្សប្រជាធិបតេយ្យ គឺដើម្បីចង់ដឹងថាតើលោកត្រាំបានរំលោភអំណាចជាប្រធានាធិបតី ដោយការដាក់គំនាបលើរដ្ឋាភិបាលបរទេសក្នុងស៊ើបអង្កេតលើគូប្រជែងនយោបាយលោកឬយ៉ាងណានោះ។ លោក ដូណាល់ ត្រាំ ចាត់ទុកការស៊ើបសួរនេះខុសច្បាប់និងមានចរិតនយោបាយ។ តាមរយៈបណ្តាញសង្គម Twitter នៅយប់ថ្ងៃ ៣១ តុលា លោក ត្រាំ សរសេរបែបនេះ៖«អាបធ្មប់ដ៏សាហាវបំផុតក្នុងប្រវត្តិសាស្ត្រអាមេរិក!»។
សេតវិមានអាមេរិក បានចោទប្រកាន់បក្សប្រជាធិបតេយ្យដែលជាបក្សប្រឆាំងថាចំពោះការឈ្លក់វង្វេងរបស់ពួកគេជាមួយនឹងការស៊ើបសួរដកតំណែងប្រធានាធិបតីខុសច្បាប់។ ប្រធានការិយាល័យព័ត៌មានប្រចាំសេតវិមានអាមេរិក លោក Stephanie Grisham ថ្លែងក្នុងសេចក្តីថ្លែងការណ៍ក្រោយការបោះឆ្នោតថា សមាជិកបក្សប្រជាធិបតេយ្យ រាល់ថ្ងៃគិតថាខ្ជះខ្ជាយពេលចំពោះរឿងដកហូតតំណែងប្រធានាធិបតី។
លោក ត្រាំ រងការចោទប្រកាន់ថា បដិសេធផ្តល់ជំនួយយោធាដល់អ៊ុយក្រែនដើម្បីបង្ខ្ំឲ្យបើកការស៊ើបអង្កេតអំពើពុករលួយប្រឆាំងលោក ចូ បៃឌិន ដែលជាគូប្រជែងឈានមុខមកពីបក្សប្រជាធិបតេយ្យក្នុងការបោះឆ្នោត២០២០។ ការចោទប្រកាន់នេះ មានន័យថា លោកត្រាំប្រើប្រាស់គោលនយោបាយការបរទេសអាមេរិកដោយខុសច្បាប់ដើម្បីទាញប្រយោជន៍នយោបាយផ្ទាល់ខ្លួន។
សមាជិកបក្សសាធារណរដ្ឋនិងលោកប្រធានាធិបតី ត្រាំ បានច្រានចោលរឿងក្តីនេះ ដោយចាត់ទុកជារឿងគួរឲ្យអាម៉ាស់។ ក៏ប៉ុន្តែក្រុមអ្នកស៊ើបអង្កេតនៃសភាអាមេរិក ដឹងដំណឹងពីភស្តុតាងគាំទ្រខ្លះៗពីមន្ត្រីរដ្ឋាភិបាលដែលឆ្លើយបំភ្លឺនៅក្នុងបន្ទប់បិទជិតក្នុងវិមាន Capitol Hill។
គណៈកម្មាធិការចារកម្មរបស់សភាអាមេរិក ដែលដឹកនាំការស៊ើបសួរតាំងពីដំបូងមក នឹងជាអ្នកបើកសវនាការជាចំហ, បង្ហាញសាក្សី និងភស្តុតាងជាឯកសារ ហើយអនុញ្ញាតឲ្យបក្សសាធារណរដ្ឋតទល់រឿងក្តីប្រឆាំងលោកត្រាំ។ ក្រុមសំឡេងភាគតិចក្នុងសភាតំណាង ក៏អាចស្នើឱ្យមានដីកាកោះហៅដែរ ប៉ុន្តែក្រុមបក្សប្រជាធិបតេយ្យដែលជាមានសំឡេងភាគច្រើន ជាអ្នកសម្រេចចុងក្រោយ។ វាជាច្បាប់មួយដែលធ្វើឱ្យគណបក្សសាធារណរដ្ឋខឹងសម្បា។
ប្រសិនបើរឿងក្តីប្រឆាំងនឹងលោក Trump ត្រូវបានគេចាត់ទុកថាមានភស្តុតាងរឹងមាំនោះ គណៈកម្មាធិការយុត្តិធម៌នៃសភាតំណាងអាមេរិក នឹងបង្កើតការចោទប្រកាន់ជាផ្លូវការប្រឆាំងនឹងប្រធានាធិបតី ហើយនឹងត្រូវបោះឆ្នោតដោយសភាពេញអង្គ។ យ៉ាងណាមិញ វានៅតែមិនទាន់ច្បាស់ថាតើដំណើរការនេះអាចឈានទៅមុខយ៉ាងដូចម្តេច។ អ្នកខ្លះនិយាយថាសភាតំណាងអាមេរិកដែលដឹកនាំដោយបក្សប្រជាធិបតេយ្យ អាចចោទប្រកាន់លោក Trump នៅដំណាច់ឆ្នាំនេះ៕