ជាតិ
វីដេអូ
ការផ្ដល់ឱកាសពីគ្រួសារ និងអង្គការនានា ធ្វើឲ្យអ្នកស្រី យ៉ាន់ ស្រីយ៉ាត ក្លាយជាតំណាងកសិករស្ត្រីឆ្នើម
×![]()
ភ្នំពេញ៖ អ្នកស្រី យ៉ាន់ ស្រីយ៉ាត ជាប្រធានសហគមន៍ចម្រើនផលរាំងកេសី និងជាតំណាងកសិករស្ត្រីឆ្នើមមកពីខេត្តបាត់ដំបង ដែលធ្វើការផ្ដោតលើកសិកម្មស្រូវ។ អ្នកស្រី យ៉ាន់ ស្រីយ៉ាត លើកឡើងថា កត្តាដែលលើកទឹកចិត្តអ្នកស្រីឲ្យក្លាយជាតំណាងកសិករស្ត្រីឆ្នើមនេះ គឺកត្តាក្រុមគ្រួសារ និងការលើកទឹកចិត្តពីអង្គការផ្សេងៗ។ បើតាមតំណាងកសិករស្ត្រីឆ្នើមរូបនេះ ការងារប្រចាំថ្ងៃរបស់អ្នកស្រីនៅក្នុងសហគមន៍ គឺធ្វើរបាយការណ៍, ចំណូលចំណាយ, ទំនាក់ទំនងជាមួយដៃគូ ក្រុមហ៊ុន ឬអង្គការ ជាពិសេសសម្របសម្រួលទីផ្សារ (ស្រូវ, ជី, ពូជ)។ 
បច្ចុប្បន្នអ្នកស្រី យ៉ាន់ ស្រីយ៉ាត កំពុងដឹកនាំសមាជិកដែលជាកសិករផលិតស្រូវចំនួន ៣១២នាក់ នៅក្នុងសហគមន៍ចម្រើនផលរាំងកេសី ស្ថិតនៅភូមិស្វាយជាតិ ឃុំរាំងកេសី ស្រុកសង្កែ ខេត្តបាត់ដំបង។ អ្នកស្រី យ៉ាន់ ស្រីយ៉ាត បានប្រឡងជាប់ជាតំណាងកសិករស្ត្រីឆ្នើមនៅក្នុងឆ្នាំ២០១៦។ ក្នុងបទសម្ភាសជាមួយ ThmeyThmey 25 អ្នកស្រី យ៉ាន់ ស្រីយ៉ាត រៀបរាប់យ៉ាងដូច្នេះ៖ «មុនដំបូងខ្ញុំជាគណៈកម្មការនៅក្នុងសហគមន៍ចម្រើនផលរាំងកេសី។ បន្ទាប់មក គេជ្រើសរើសកសិករចំនួន ២រូប ទៅប្រឡងនៅខេត្តបាត់ដំបង។ ខ្ញុំបានប្រឡងជាប់នៅខេត្ត រួចមកប្រឡងនៅរាជធានីភ្នំពេញ ដែលមានកសិករចូលរួមជាច្រើន »។
សូមអញ្ជើញទស្សនាបទសម្ភាសរវាងកញ្ញា ញឹក ស្រីល័ក្ខ អ្នកសារព័ត៌មាន ThmeyThmey.com ជាមួយអ្នកស្រី យ៉ាន់ ស្រីយ៉ាត តំណាងកសិករស្ត្រីឆ្នើម ដូចតទៅ៖
នៅក្នុងវេទិកាកសិករថ្នាក់ជាតិលើកទី៨ កាលពីថ្ងៃទី១៦-១៧ តុលាកន្លងទៅ អ្នកស្រី យ៉ាន់ ស្រីយ៉ាត ត្រូវបានជ្រើសរើសជាអ្នកឡើងថ្លែងសុន្ទរកថាបើកកម្មវិធី ដែលមានអ្នកចូលរួមជិត ៣០០នាក់ផងដែរ។ ស្ត្រីដែលរៀនបានត្រឹមថ្នាក់ទី ១០រូបនេះ បញ្ជាក់ថា ការធ្វើការងារនៅក្នុងសហគមន៍ពាក់ព័ន្ធនឹងរឿងស្រូវនេះ មានផលលំបាក ប៉ុន្តែអ្នកស្រីអាចដោះស្រាយបាន។
បើតាមអ្នកស្រី យ៉ាន់ ស្រីយ៉ាត មុនដំបូងសហគមន៍ចម្រើនផលរាំងកេសីរបស់អ្នកស្រី មានសមាជិកត្រឹមតែ ១០០នាក់ប៉ុណ្ណោះ ប៉ុន្តែដោយមានការរីកចម្រើន បច្ចុប្បន្នមានសមាជិកដល់ ៣១២នាក់ ដែលផលិតស្រូវបានទិន្នផលជិត ១ម៉ឺនតោន ក្នុងមួយរដូវ លើផ្ទៃដី ២ពាន់ហិចតា។ អ្នកស្រី យ៉ាន់ ស្រីយ៉ាត អះអាងថា៖ «មូលហេតុដែលសមាជិកក្នុងសហគមន៍មានកើនឡើង គឺដោយសារមានកិច្ចសន្យាទិញ-លក់ស្រូវ ហើយស្រូវដែលផលិតបាន មានអ្នកទិញ និងមានតម្លៃខ្ពស់»។
តំណាងកសិករស្ត្រីឆ្នើមរូបនេះ ចង់ឲ្យកសិករដទៃទៀតមានភាពរីកចម្រើន។ «ក្នុងនាមខ្ញុំតំណាងកសិករស្ត្រីឆ្នើម ផ្ដាំឲ្យស្ត្រីៗដូចគ្នា គឺឲ្យគាត់មានការចូលរួម និងចំណាយពេលវេលាឲ្យមានតម្លៃ។ សូមឲ្យក្រុមគ្រួសារជាបុរសៗ ចេះលើកទឹកចិត្តស្ត្រីឲ្យចូលរូមឲ្យបានច្រើន។ ពេលណាស្ត្រីចូលរួមបានច្រើន គាត់ចេះដឹងច្រើន គាត់មិនសូវលំបាក»។ នេះជាការបញ្ជាក់របស់អ្នកស្រី យ៉ាន់ ស្រីយ៉ាត ដែលលើកទឹកចិត្តឲ្យស្ត្រីមានភាពក្លាហាន ត្រូវចេះមើលពិភពខាងក្រៅ និងសិក្សាបន្ថែម។
សូមបញ្ជាក់ថា នៅថ្ងៃទី១៦-១៧ តុលានេះ វេទិកាកសិករថ្នាក់ជាតិលើកទី៨ រៀបចំដោយវេទិកាអង្គការមិនមែនរដ្ឋាភិបាលស្តីពីកម្ពុជា (NGOForum) និងអង្គការអុកស្វាម រួមទាំងអង្គការដៃគូជាច្រើនទៀត ក្រោមប្រធានបទ៖«លើកកម្ពស់ការចូលរួមដៃគូពហុភាគី ដើម្បីឲ្យកសិករមានលទ្ធភាពគ្រប់គ្រាន់ក្នុងការវិនិយោគលើវិស័យកសិកម្ម» ដែលមានតំណាងសហគមន៍, រដ្ឋាភិបាល, វិស័យឯកជន, អង្គការ និងកសិករជិត ៣០០នាក់ ចូលរួម។ ក្នុងវេទិកានេះ បានជជែកពីការចូលរួមរបស់ពហុភាគីក្នុងកសិធុរៈកិច្ច ដើម្បីជួយកសិករមានលទ្ធភាពទទួលបានទឹក, ទុន និងទីផ្សារ សម្រាប់កសិកម្ម៕
Tag:
កសិកម្ម
តំណាងកសិករ
ស្រូវ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
