ជាតិ
ថ្នាក់ដឹកនាំ Cambodia Amazing Trip Planner ទទួលប័ណ្ណសរសើរជាប្រតិបត្តិករគំរូមេត្រីភាពបរិស្ថាន ពីក្រសួង
× សៀមរាប៖ សហស្ថាបនិកក្រុម Cambodia Amazing Trip Planner លោក សា ឌីណា នៅថ្ងៃទី១ ខែវិច្ឆិកា បានទទួលប័ណ្ណសរសើរជាប្រតិបត្តិករគំរូមេត្រីភាពបរិស្ថាន ពីថ្នាកដឹកនាំក្រសួងបរិស្ថាន។ ក្រសួងបរិស្ថានរៀបចំកម្មវិធីជួបជុំនិងផ្តល់ប័ណ្ណសរសើរ ក្រោមប្រធានបទ «រួមគ្នាដើម្បីមេត្រីភាពបរិស្ថាន» ដើម្បីលើកទឹកចិត្តដល់ប្រតិបត្តិករដែលចូលរួមផ្សព្វផ្សាយឱ្យមានការថែរក្សាគាំពារបរិស្ថាន ក៏ដូចជាការអភិរក្សប្រព័ន្ធជីវៈចម្រុះក្នុងប្រទេសកម្ពុជា។
លោក សា ឌីណា បានឱ្យដឹងថា លោកពិតជាសប្បាយរីករាយនិងមានកិត្តិយសក្រៃលែង ដែលថ្នាក់ដឹកនាំក្រសួងបរិស្ថានបានផ្តល់ប័ណ្ណសរសើរដល់ក្រុមការងារលោក។ លោក ឌីណា ចាត់ទុកប័ណ្ណសរសើរនេះថាជាការលើកទឹកចិត្តដល់ក្រុមការងារខ្លួន ឱ្យបន្តរៀបចំកម្មវិធីបោះជំរំតង់នៅតាមគោលដៅផ្សេងៗ ក្នុងបុព្វហេតុលើកស្ទួយកិច្ចការបរិស្ថាន និងរួមចំណែកអភិវឌ្ឍន៍ជីវភាពសហគមន៍ឱ្យមានភាពល្អប្រសើរ។ លោកក៏រំពឹងថា ប័ណ្ណសរសើរនេះ ក៏នឹងជំរុញឱ្យមានការចូលរួមពីក្រុមយុវជនកាន់តែច្រើនបន្ថែមទៀត លើស្មារតីជួយគាំពារផ្នែកបរិស្ថានសង្គម បង្កើតនូវភាពស្រស់ស្អាតសម្រាប់សង្គមជាតិទាំងមូល។
មានប្រសាសន៍ក្នុងពិធីនោះ រដ្ឋមន្ត្រីក្រសួងបរិស្ថាន លោក សាយ សំអាល់ បានថ្លែងអំណរគុណ និងអបអរសាទរផងដែរដល់ប្រជាពលរដ្ឋ ជាពិសេសដល់ប្រតិបត្តិករ ដែលបានចូលរួមបង្កើតឱ្យមានការផ្សព្វផ្សាយ ការអប់រំបរិស្ថាន តាមរយៈស្នាដៃ និងសកម្មភាពប្រតិបត្តិមេត្រីភាពល្អនាពេលកន្លងមក។ លោករដ្ឋមន្ត្រី ក៏បានបង្ហាញនូវសុទិដ្ឋិនិយមថា ការចូលរួមពីប្រតិបត្តិករ និងអ្នកស្ម័គ្រចិត្ត ដើម្បីបរិស្ថាននៅថ្ងៃនេះ នឹងក្លាយជាចលនាកសាងវប្បធម៌បរិស្ថានថ្មីសម្រាប់កម្ពុជាទៅអនាគត។
គួររម្លឹកថា ក្រុមCambodia Amazing Trip Planner បង្កើតឡើងនៅខែមករា ឆ្នាំ២០១៦ ដែលមានទីតាំងនៅខេត្តសៀមរាប។ មកដល់បច្ចុប្បន្ននេះ ក្រោមសកម្មភាពបោះជំរំតង់ក្រុមនេះបានធ្វើដំណើរស្ទើរគ្រប់ខេត្តក្រុងទូទាំងប្រទេស និងបានបង្កើតព្រឹត្តិការណ៍បោះតង់បានចំនួន ២៩លើករួចមកហើយ ដែលមានអ្នកចូលរួមប្រមាណ២ពាន់នាក់។ គោលដៅចម្បងធំៗសម្រាប់ក្រុមនេះមាន៣ រួមមាន តំបន់ដែលមានសក្កានុពលតែខ្វះការផ្សព្វផ្សាយ, តំបន់ដែលមានសក្កានុពល តែកំពុងទទួលរងផលប៉ះពាល់ និងប្រឈមនឹងការបាត់បង់ធនធានធម្មជាតិ និងតំបន់ដែលកំពុងអភិវឌ្ឍន៍ថ្មី ឬក្រោមការវិនិយោគស្របច្បាប់៕
Tag:
សា ឌីណា
Cambodia Amazing Trip Planner
បន្ទាយធ្នូ៨០២
© រក្សាសិទ្ធិដោយ thmeythmey.com