កីឡាជាតិ
ជាតិ
AFC U19៖ កម្ពុជាស្វាគមន៍កោះម៉ារីណាខាងជើង ក្រោយព្រុយណេប៉ះថៃ សកម្មភាពហ្វឹកហាត់របស់ក្រុម U19 កម្ពុជានៅកីឡដ្ឋានវិសាខា មុនប៉ះកោះម៉ារីណាខាងជើងនៅល្ងាចនេះ, រូបភាពពី FFC
× ក្រុមកីឡាករជម្រើសជាតិអាយុក្រោម១៩ឆ្នាំកម្ពុជា ត្រូវស្វាគមន៍ ក្រុម U19 កោះម៉ារីណាខាងជើង សម្រាប់វគ្គជម្រុះពូល G នៃព្រឹត្តិការណ៍ AFC U19 Championship 2020 វេលាម៉ោង៦:៣០នាទីល្ងាចថ្ងៃទី៤ វិច្ឆិកា នេះ នៅពហុកីឡដ្ឋានជាតិ។ ចំណែកក្រុមព្រុយណេត្រូវតទល់ជាមួយថៃ វេលាម៉ោង៣:៣០នាទីរសៀល។
ក្រោយបរាជ័យក្រោមថ្វីជើងម៉ាឡេស៊ី ៥-៤ ក្នុងជំនួបបើកឆាក U19 កម្ពុជាក្រោមការដឹកនាំរបស់គ្រូបង្វឹក Gyotoku Koji រំពឹងអាចយកឈ្នះកោះម៉ារីណាខាងជើងនៅល្ងាចនេះ ដើម្បីស្តារប្រជាប្រិយភាព ក៏ដូចជាប្រជែងដណ្តើមកៅអីឡើងទៅវគ្គបន្តនៃពានរង្វាន់ AFC U19 Championship 2020។
បើតាមប្រវត្តិក្រុមទាំងពីរមិនធ្លាប់ជួបគ្នាកន្លងមកនោះទេ។ នាការប្រកួតបើកឆាកក្រុមកោះម៉ារីណាខាងជើងបានរងបរាជ័យ ៤-៣ ក្រោមថ្វីជើង U19 ព្រុយណេ។ ជ័យជម្នះនេះជួយឲ្យព្រុយណេឈរកំពូលតារាងពូល G បណ្តោះអាសន្ន ដែលមានម៉ាឡេស៊ីឈរលេខរៀងបន្ទាប់មាន៣ពិន្ទុដូចគ្នា។
នាជំនួបបើកឆាកដ៏ស្វិតស្វាញក្រោមក្រសែភ្នែកអ្នកគាំទ្រជាង៤ពាន់នាក់នៅពហុកីឡដ្ឋានជាតិ កាលពីថ្ងៃសៅរ៍ ទី២ វិច្ឆិកា ក្រុម U19 កម្ពុជាធ្វើមិនបានល្អឡើយនៅវគ្គទី១ ដោយត្រូវម៉ាឡេស៊ីនាំមុខ ៣-០។ ឈានដល់វគ្គទី២ ក្រុម U19 ម៉ាឡេស៊ីបានបាត់បង់សមាជិកពីរក្នុងពេលតែមួយ ក្រោយការប្រកួតដំណើរបាន២០នាទី បន្ទាប់ពីកីឡាករ AHMAD ZIKRI BIN MOHD KHALILI ធ្វើឲ្យខ្សែប្រយុទ្ធ សៀង ចន្ធា ដែលកំពុងគ្រងឱកាសមាស ដួលក្បែរតំបន់គ្រោះថ្នាក់។
ការពិន័យរបស់អាជ្ញាកណ្តាលបានក្លាយជាឱកាសឲ្យកីឡាករ មិត សាម៉ើយ រកគ្រាប់បាល់តាមពីក្រោយ ៣-១ សម្រាប់ U19 កម្ពុជា តាមរយៈការទាត់បាល់ពិន័យ(Free Kick)ពីចម្ងាយដ៏ល្អ។ ក្រុមកម្ពុជាបានដាក់សម្ពាធយ៉ាងខ្លាំងលើម៉ាឡេស៊ី ដែលនៅសល់សមាជិកតែ៩រូប។ គ្រាប់បាល់ទី២បានកើតឡើងនៅពីរនាទីបន្ទាប់សម្រាប់កម្ពុជា ដែលរកបានដោយកីឡាករ ជា សុខម៉េង។
រឿងហួសចិត្តបានកើតឡើងសម្រាប់ U19 កម្ពុជានៅពីរនាទីបន្ទាប់ ក្រោយអ្នកចាំទី ថា ច័ន្ទរិទ្ធី មិនអាចចាប់បាល់បាន ក្រោយការទាត់ពីពាក់កណ្តាលទីរបស់កីឡាករ Luqman Hakim Shamsudin ដែលធ្វើឲ្យម៉ាឡេស៊ីនាំមុខ ៤-២។ រឿងអស្ចារ្យមួយទៀតបានកើតឡើងសម្រាប់ម៉ាឡេស៊ី បន្ទាប់ពីកីឡាករ Muslihuddin Atiq អូសបាល់ដាច់ខ្សែបម្រើ និងការពារបីបួនរូបស៊ុតបញ្ចូលទីយ៉ាងល្អឲ្យម៉ាឡេស៊ីនាំមុខ ៥-២។
ក្រោយមកកីឡាករ រី លាភផេង និង សឿត ណាវ៉ា សម្រេចបានម្នាក់មួយគ្រាប់ជាបន្តបន្ទាប់ ឲ្យកម្ពុជាតាមពីក្រោយ ៤-៥។ ក្រុមទាំងពីរបានរក្សាលទ្ធផលនេះរហូតចប់ការប្រកួត៕
Tag:
U19 កម្ពុជា
AFC U19 Championship
© រក្សាសិទ្ធិដោយ thmeythmey.com