ជាតិ
ក្រសួងដាក់ដំណើរការប្រព័ន្ធផ្សព្វផ្សាយឌីជីថលដើម្បីពង្រឹងគុណភាពសេវាកម្មទេសចរណ៍
×![]()
សៀមរាប៖ ក្រសួងទេសចរណ៍បានធ្វើសិក្ខាសាលានិងដាក់ឱ្យដំណើរការនូវប្រព័ន្ធផ្សព្វផ្សាយឌីជីថល ស្ដីពីគេហទំព័រ និងកម្មវិធីទូរសព្ទឆ្លាតនៃទេសចរណ៍ក្នុងស្រុក Visit Cambodia និងការអនុវត្តការចុះបញ្ជីស្នាក់នៅទេសចរណ៍អនឡាញសម្រាប់មូលដ្ឋានអាជីវកម្មទេសចរណ៍។ រដ្ឋមន្ត្រីក្រសួងទេសចរណ៍យល់ថា ប្រព័ន្ធនេះនឹងដើរតួយ៉ាងសំខាន់ក្នុងការផ្សព្វផ្សាយពីសក្តានុពលទេសចរណ៍កម្ពុជា។
រដ្ឋមន្ត្រីក្រសួងទេសចរណ៍លោក ថោង ខុន មានសុទិដ្ឋិនិយមថា ការដាក់ឱ្យដំណើរការប្រព័ន្ធឌីជីថលថ្មីនេះនឹងពង្រឹងការផ្សព្វផ្សាយសក្ដានុពលទេសចរណ៍ ក៏ដូចជាជំរុញកំណើន និងការអភិវឌ្ឍវិស័យទេសចរណ៍ឱ្យកាន់តែទូលំទូលាយបន្ថែមទៀត។ លោករដ្ឋមន្ត្រីបន្ថែមថា សេដ្ឋកិច្ចឌីជីថលបាននិងកំពុងធ្វើឱ្យរបៀបរបបធ្វើការងារមានភាពផ្លាស់ប្តូរជាច្រើន នៅតាមបណ្តាឧស្សាហកម្មនានា ដូចជាសេវាកម្មហិរញ្ញវត្ថុសេវាកម្មសុខភាព សេវាកម្មទេសចរណ៍ សេវាកម្មកម្សាន្ត មធ្យោបាយដឹកជញ្ជូន និងបច្ចេកវិទ្យាព័ត៌មាន និងទំនាក់ទំនង។ បន្ថែមពីនេះ រដ្ឋមន្ត្រីទេសចរណ៍ស្នើឱ្យប្រតិបត្តិករទេសចរទាំងអស់ ត្រូវបន្ដពង្រីកកញ្ចប់ទស្សនា និងផ្សព្វផ្សាយពីគោលដៅទាំងនោះឱ្យកាន់តែទូលំទូលាយបន្ថែមទៀត ដើម្បីបំពេញសេចក្ដីត្រូវការរបស់ភ្ញៀវទេសចរ។
ជាមួយគ្នានេះ ក្រសួងទេសចរណ៍ក៏បានដាក់ដំណើរការនៃប្រព័ន្ធចុះបញ្ជីស្នាក់នៅទេសចរណ៍ផងដែរ (អាស័យដ្ឋាន www.accommodationregistrar.net)។ តាមរយៈអាស័យដ្ឋាននេះ ភ្ញៀវទេសចរអាចចូលបញ្ចេញមតិក្រោយពេលពួកគេទទួលសេវាកម្មទេសចរណ៍នៅកន្លែងណាមួយ។ ចំណែកគេហទំព័រ Visit Cambodia បានដាក់បញ្ចូលនូវគោលដៅទេសចរណ៍ចម្រុះបែប សម្រាប់ការផ្សព្វផ្សាយដល់ទេសចរ។
មគ្គុទ្ទេសក៍ទេសចរណ៍ភាសារុស្សី លោក កែវ សុភលីន យល់ថា ប្រព័ន្ធឌីជីថលថ្មីនេះ នឹងជួយផ្សព្វផ្សាយក៏ដូចជាចង្អុលបង្ហាញពីគោលដៅទេសចរណ៍ថ្មីៗ នៅតំបន់ផ្សេងៗជុំវិញប្រទេស ដើម្បីងាយស្រួលដល់ទេសចរក្នុងស្រុក និងទេសចរក្រៅស្រុកទៅកម្សាន្ត។ ជាមួយគ្នានេះ លោក សុភលីន ស្នើឱ្យពលរដ្ឋបន្តផ្សព្វផ្សាយចំណុចវិជ្ជមានរបស់កម្ពុជាឱ្យបានច្រើន ដោយមិនត្រូវយកតែចំណុចអវិជ្ជមានមកផ្សព្វផ្សាយក្នុងបណ្ដាញសង្គមទេ ការណ៍ធ្វើដូច្នេះ គឺជាការសម្លាប់វិស័យទេសចរណ៍ដោយខ្លួនឯង៕
Tag:
ប្រព័ន្ធផ្សព្វផ្សាយឌីជីថល
សេវាកម្មទេសចរណ៍
ថោង ខុន
© រក្សាសិទ្ធិដោយ thmeythmey.com
