ជាតិ
បទយកការណ៍ / បទសម្ភាសន៍
ប្រធានគណៈគ្រូពេទ្យប្រាប់ឱ្យពេទ្យទាំងអស់ចាត់ទុកអ្នកជំងឺដូចគ្រួសាររបស់ខ្លួន
×![]()
សៀមរាប៖ ប្រព័ន្ធសុខាភិបាលកម្ពុជា ប្រឹងអភិវឌ្ឍន៍ខ្លួនជាលំដាប់ ដើម្បីបម្រើសេវាកម្មដល់ប្រជាពលរដ្ឋ។ យ៉ាងណាក្ដី សេវាព្យាបាលរបស់រដ្ឋ ត្រូវបានគេមើលឃើញថាមិនទាន់មានការវិវត្តល្អនៅឡើយ ក្នុងនោះអ្នកមានធនធានមធ្យមបន្តជ្រើសរើសសេវាព្យាបាលឯកជន ដោយសារមិនពេញចិត្តការបម្រើសេវាសាធារណមួយនេះ។ ប្រធានគណៈគ្រូពេទ្យកម្ពុជាក៏ទទួលស្គាល់ចំណុចនេះដែរ តែថានៅមានចំណុចខ្វះខាតតិចតួចប៉ុណ្ណោះ។ លោក ធា គ្រុយ រដ្ឋលេខាធិការ និងជាប្រធានគណៈគ្រូពេទ្យកម្ពុជានៃក្រសួងសុខាភិបាល ស្នើឱ្យគ្រូពេទ្យទាំងអស់ត្រូវមានវិជ្ជាជីវៈក្នុងការព្យាបាល និងចាត់ទុកអ្នកជំងឺដូចសមាជិកគ្រួសាររបស់ខ្លួន។
ព័ត៌មានលម្អិត សូមស្ដាប់បទយកការណ៍ដែលរៀបរៀងដោយអ្នកនាង អ៊ីសា រ៉ហានី ពីខេត្តសៀមរាបដូចតទៅ៖
ប្រជាពលរដ្ឋកម្ពុជា នៅតែបន្តនិយាយពីក្រមសីលធម៌វិជ្ជាជីវៈគ្រូពេទ្យ ពិសេសគ្រូពេទ្យបម្រើការនៅក្នុងមន្ទីរពេទ្យរដ្ឋ។ អ្វីដែលនៅតែឱ្យពលរដ្ឋបារម្ភ និងសឹងអស់ជំនឿលើគ្រូពេទ្យទាំងនោះ គឺការបន្តបំភ័យអ្នកជំងឺ ការព្យាបាលមិនមានប្រសិទ្ធភាព និងការមិនយកចិត្តទុកដាក់ព្យាបាលអ្នកជំងឺជាដើម។
ប្រធានគណៈគ្រូពេទ្យកម្ពុជា លោកសាស្ដ្រាចារ្យវេជ្ជបណ្ឌិត ធា គ្រុយ រាល់វេទិការបស់លោកនៅបន្តទទូចឱ្យក្រុមគ្រូពេទ្យគិតគូរពីការប្រកបវិជ្ជាជីវៈឱ្យបានត្រឹមត្រូវ។ ក្នុងសន្និសីទស្ដីពីជំងឺតំបន់ត្រូពិកលើកុមារដែលរៀបចំដោយមន្ទីរពេទ្យកុមារអង្គរនៅចុងខែតុលា លោក ធា គ្រុយ ឱ្យគ្រូពេទ្យទាំងអស់ស្មោះត្រង់នឹងវិជ្ជាជីវៈខ្លួនឯង ហើយការព្យាបាលត្រូវហ្មត់ចត់បំផុត។
មន្ទីរពេទ្យមួយដែលលោក ធា គ្រុយ ចាត់ទុកជាមន្ទីរពេទ្យគំរូ មានក្រមសីលធម៌ និងវិជ្ជាជីវៈ ដែលទទួលស្គាល់ជាទូទៅ នោះគឺមន្ទីរពេទ្យកុមារអង្គរ។ លោកពន្យល់ថា មន្ទីរពេទ្យនេះតែងទទួលបានការកោតសរសើរពីអ្នកជំងឺ ក៏ដូចជានិស្សិតចុះកម្មសិក្សា ដោយថាការព្យាបាលអ្នកជំងឺដោយភាពហ្មត់ចង់ ម៉ឺងម៉ាត់ និងប្រយ័ត្នប្រយែងបំផុត។
ការធ្វើឱ្យមន្ទីរពេទ្យកុមារអង្គរ ត្រូវបានគេទទួលស្គាល់បែបនេះ មិនមែនជារឿងចៃដន្យឡើយ។ រដ្ឋលេខាធិការក្រសួងសុខាភិបាលពន្យល់ថា កត្តាដែលធ្វើឱ្យមានលទ្ធផលបែបនេះ គឺមានកត្តាធនធានមនុស្ស និងភាពច្បាស់លាស់ ហ្មត់ចត់ និងការទទួលខុសត្រូវខ្ពស់របស់ក្រុមគ្រូពេទ្យនៅទីនោះ។ យោងតាមបទពិសោធន៍លើវិជ្ជាជីវៈនេះច្រើនឆ្នាំ លោក ធា គ្រុយ ប្រាប់ថា គ្រូពេទ្យទាំងអស់អាចធ្វើបានដូចគ្នាដោយមិនចាំបាច់ចំណាយថវិកាឡើយ។ លោកពន្យលយ៉ាងដូច្នេះថា៖«...ខ្ញុំធ្លាប់ជាគ្រូពេទ្យមួយរូបដែរ...ខ្ញុំទទួលស្គាល់ថា មន្ទីរពេទ្យដែលថែទាំព្យាបាលមានគុណភាពគឺចំណុះឱ្យលទ្ធផល តែខ្ញុំក៏ទទួលស្គាល់ដែលថា វិន័យនៃវត្តមានរបស់គ្រូពេទ្យ វិន័យការងារ គុណភាពរបស់ពេទ្យ ស្មារតីវិជ្ជាជីវៈទាំងនេះ គឺជាកត្ដាដែលសំខាន់បំផុត...មិនមែនអត់លុយធ្វើអ៊ីអត់បានទេ...ឧទាហរណ៍ទៅធ្វើការឱ្យទាន់ម៉ោង មិនចាំបាច់ប្រើលុយទេ...»។
លោកសាស្ដ្រាចារ្យបន្តថា៖« ភាពហ្មត់ចត់ ម៉ឺងម៉ាត់ ទទួលខុសត្រូវ ខ្ញុំសួរថាអ្នកនោះជាគ្រួសារយើង...ប្រធានពេទ្យខ្លះស្នើខ្ញុំឱ្យនិយាយរឿងគ្រូពេទ្យខ្លួនអត់មកយាម ខ្ញុំថាព្រមានទៅ មានអ៊ីពាក់ព័ន្ធនឹងខ្ញុំ...តើមានអ៊ីកើតឡើងពេលអត់មកយាមនៅពេទ្យ ហើយបើប៉ះមានអ្នកជំងឺត្រូវបញ្ជូនចូល...ថ្ងៃនេះលោកអាចចេះអ៊ីប៉ុន្មានក៏ដោយ បើគ្មានវិន័យអ៊ីស្រួលបួល ចេះហ្នឹងក៏ចេញជាលទ្ធផលទៅមិនរួចដែរ...»។
បន្ថែមលើឧទាហរណ៍ រួមនិងបទពិសោធន៍ផ្ទាល់ខ្លួនលើវិស័យសុខាភិបាលច្រើនឆ្នាំ លោកសាស្ដ្រាចារ្យប្រធានគណៈគ្រូពេទ្យកម្ពុជាអះអាងថា ប្រសិទ្ធភាព គុណភាពនៃការព្យាបាលនៅកន្លែងមួយ ច្បាស់ណាស់គឺសុទ្ធសឹងកើតឡើងដោយកញ្ចប់។ កញ្ចប់ដែលលោកសាស្ដ្រាចារ្យពន្យល់នោះ គឺទាំងគ្រូពេទ្យ និងគិលានុបដ្ឋាក ដែលត្រូវមានចំណេះដឹងគ្រប់គ្រាន់ក្នុងការព្យាបាលជំងឺ។ កន្លែងព្យាបាលមួយមិនអាចមានគ្រូពេទ្យពូកែ តែអ្នកថែរក្សាអ្នកជំងឺមិនចេះអ្វីនោះឡើយ។ លោកថា គិលានុបដ្ឋាកមិនមែនកើតមកសម្រាប់បម្រើការងារទាំងងងឹតងងុលឡើយ គឺត្រូវមានចំណេះដឹងគ្រាប់គ្រាន់ និងការទទួលខុសត្រូវខ្ពស់។
ជាមួយគ្នានេះ លោកសាស្ដ្រាចារ្យ ធា គ្រុយ បានចាត់ទុកសន្និសីទប្រចាំឆ្នាំរបស់មន្ទីរពេទ្យកុមារអង្គរ ដែលតែងចែករំលែកបទពិសោធន៍និងចំណេះដឹងជុំវិញជំងឺថ្មីៗដល់គ្រូពេទ្យមកពីជុំវិញតំបន់សំខាន់ៗ ថាពិតជាមានសារសំខាន់ណាស់ ហើយជាអ្វីដែលគ្រូពេទ្យទាំងអស់ចាំបាច់ត្រូវរៀនសូត្រជានិច្ច។ លោកថា គ្រូពេទ្យត្រូវរៀនអ្វីដែលថ្មីជានិច្ច ទើបអាចក្លាយជាគ្រូពេទ្យដ៏ពូកែទៅបាន។ លោកបានលើកឧទាហរណ៍ករណីជំងឺគ្រុនឈាម ដែលមានការវិវត្តថ្មីៗនៅឆ្នាំ២០១៩នេះ។
ជាប្រធានគណៈគ្រូពេទ្យដែលត្រូវតាមដាន ត្រួតពិនិត្យ និងអប់រំឱ្យគ្រូពេទ្យបម្រើការងារដោយភាពត្រឹមត្រូវ លោក ធា គ្រុយ យល់ថា គ្រូពេទ្យទាំងអស់ត្រូវមានភារកិច្ចសំខាន់២ ទីមួយគឺសមត្ថភាព និងទី២ត្រូវចុះបញ្ជីការគណៈគ្រូពេទ្យឱ្យគ្រប់បានគ្នា ដែលបញ្ជីការនេះគឺធានាពីភាពស្របច្បាប់ដែលធ្វើឱ្យពលរដ្ឋមានទំនុកចិត្ត៕
Tag:
ធា គ្រុយ
វិជ្ជាជីវៈគ្រូពេទ្យ
© រក្សាសិទ្ធិដោយ thmeythmey.com
