សហព័ន្ធកីឡាបាល់ទាត់កម្ពុជានៅថ្ងៃទី៤ ខែវិច្ឆិកា ឆ្នាំ២០១៩ បានបង្ហាញបញ្ជីឈ្មោះក្រុមកីឡាករជម្រើសជាតិ ដើម្បីត្រៀមប្រកួតមិត្តភាពអន្តរជាតិជាមួយម៉ុងហ្គោលី និងវគ្គជម្រុះ World Cup 2022 ជាមួយហុងកុង។ ក្នុងចំណោមកីឡាករទាំង២៣នាក់យើងសង្កេតឃើញមានការផ្លាស់ប្តូរសមាសភាព៣រូប ខណៈកីឡាករ ចាន់ វឌ្ឍនាកា បន្តស្ថិតនៅក្រៅបញ្ជីដដែល។
កីឡាករ លី វ៉ាហេទ កាន់ ពិសាល និង ស៊ិន កក្កដា ត្រូវបានអ្នកចាត់ការទូទៅ Keisuke Honda និងគ្រូបង្វឹក Felix Dalmas កោះហៅឲ្យចូលរួមជាមួយក្រុមជម្រើសជាតិកម្ពុជាឡើងវិញ ក្រោយអវត្តមានបួនប្រាំប្រកួតកន្លងមក។ វត្តមានរបស់ពួកគេទាំងបី គឺដើម្បីជំនួសកៅអីរបស់ខ្សែការពារ សឿត បារាំង ហូយ ផល្លីន និងកីឡាករ អ៊ុក សុវណ្ណ ដែលបានជម្រុះចេញ។
ចំណែកខ្សែប្រយុទ្ធឆ្នើមរបស់កម្ពុជា ចាន់ វឌ្ឍនាកា ដែលទើបជាពីរបួស ពុំទទួលបានការទុកចិត្តពីថ្នាក់ដឹកនាំក្រុមទាំងពីរខាងលើឡើយ។ កីឡាករមកពីខេត្តកំពតរូបនេះ ត្រូវបានកោះហៅឲ្យចូលរួមក្នុងក្រុមជម្រើសជាតិពេលកម្ពុជាប៉ះជាមួយអ៊ីរ៉ាក់ តែត្រូវអវត្តមានដោយសារបញ្ហារបួសជើង។
ការប្រមូលផ្តុំហ្វឹកហាត់លើកនេះ គឺដើម្បីត្រៀមការប្រកួតមិត្តភាពអន្តរជាតិជាមួយម៉ុងហ្គោលីនៅថ្ងៃទី១៤ ខែវិច្ឆិកា ឆ្នាំ២០១៩ នៅពហុកីឡដ្នានជាតិ មុនប៉ះហុងកុងក្នុងវគ្គជម្រុះ FIFA World Cup 2022 នៅថ្ងៃទី១៩ វិច្ឆិកា នៅលើទឹកដីហុងកុង។ នាការប្រកួតជើងទី១នៅពហុកីឡដ្ឋានជាតិ កម្ពុជាបានបញ្ចប់ក្នុងលទ្ធផលស្មើ ១-១ ជាមួយហុងកុង។
កីឡាករជម្រើសជាតិទាំង២៣រូបរួមមាន៖ អ្នកចាំទី ស៊ូ យ៉ាទី, កែវ សុខសិលា, ហ៊ុល គឹមហ៊ុយ, ខ្សែការពារ សឿយ វិសាល, សារ៉េត គ្រីយ៉ា, ឆេង ម៉េង, លី វ៉ាហេទ, សេត រ៉ស៊ីប, យ៉ើ សាហ្វី, ទេស សម្បត្តិ, កែន ច័ន្ទសុភ័ក្ត្រ, ខ្សែបម្រើ គួច សុកុម្ភៈ, គួច ដានី, អ៊ន ចាន់ប៉ូលីន, ធារី ចន្ថាប៊ីន, ស៊ិន កក្កដា, សុះ ស៊ូះហាណា, ខ្សែប្រយុទ្ធ កែវ សុខផេង, សៀង ចន្ធា, រ៉ឹង ប៊ុនហៀង, ប្រាក់ មុន្នីឧត្តម, កាន់ ពិសាល និង យ៉ើ មូស្លីម៕