ជាតិ
ក្រសួង ត្រៀមពេទ្យ និងរថយន្តសង្គ្រោះ៦៨គ្រឿង ដើម្បីសង្គ្រោះពលរដ្ឋនៅថ្ងៃអុំទូក
× ភ្នំពេញ៖ ក្រសួងសុខាភិបាល បានត្រៀមក្រុមគ្រូពេទ្យជាច្រើននាក់ និងរថយន្តសង្គ្រោះចល័តចំនួន ៦៨គ្រឿង រួមទាំងតង់សុខភាពចំនួន ១២ទីតាំង ដើម្បីពិនិត្យ ព្យាបាល និងសង្គ្រោះប្រជាពលរដ្ឋដែលមានបញ្ហាសុខភាព ក្នុងអំឡុងពិធីបុណ្យអុំទូកខាងមុខនេះ។
សេចក្ដីជូនដំណឹងរបស់ក្រសួងសុខាភិបាល ចុះថ្ងៃទី ៥ វិច្ឆិកា បញ្ជាក់ថា តង់សុខភាពទាំង១២កន្លែង ដែលផ្ដល់សេវាពិនិត្យសុខភាព ២៤ម៉ោង ត្រូវបានដាក់ពង្រាយតាមទីតាំងសំខាន់ៗមួយចំនួន ជុំវិញបរិវេណរៀបចំពិធីបុណ្យអុំទូក។ ទីតាំងទាំងនោះ មានដូចជា មជ្ឈមណ្ឌលកោះពេជ្រ, ស្ដូបកម្ពុជា-វៀតណាម, សួនច្បារមុខនាយកដ្ឋានអង្គរក្ស, បរិវេណសណ្ឋាគាររណសិរ្ស, មុខគណៈកម្មការជាតិរៀបចំបុណ្យជាតិ-អន្តរជាតិ, ក្បែរវេទិកាកិត្តិយសខាងត្បូង និងខាងជើង, មុខវត្តឧណ្ណាលោម ព្រះគន្លង, ផែថ្មរាជធានីភ្នំពេញ, គល់ស្ពានបេឡេត្រើយខាងកើត, ខាងត្បូងគល់ស្ពានបេឡេត្រើយខាងកើត មណ្ឌល OCIC និងរង្វង់មូលនាងមច្ឆាមណ្ឌល OCIC។
សេវារថយន្តសង្គ្រោះ និងការពិនិត្យ ក៏ត្រូវដាក់ប្រចាំការព្យាបាលនៅតាមតង់សុខភាពនីមួយៗដែរ។ ក្រសួងបានត្រៀមរថយន្តគ្លីនិកចល័ត ៤គ្រឿងទៀត ដើម្បីផ្ដល់សេវា ២៤ម៉ោង នៅទីតាំងចំនួន ៤ គឺនៅមជ្ឈមណ្ឌលកោះពេជ្រ,មុខវត្តបទុមវត្តី,ជ្រោយចង្វារមណ្ឌល OCIC និងនៅជ្រោយចង្វារក្បែរសណ្ឋាគារសុខាភ្នំពេញ។ ក្រៅពីនេះ ក៏នឹងក្រុមគ្រូពេទ្យចល័តក្នុងហ្វូងប្រជាពលរដ្ឋ ដោយមានឯកសណ្ឋានពេទ្យ ដើម្បីជួយសង្គ្រោះប្រជាពលរដ្ឋផងដែរ។
ក្រៅពីត្រៀមផ្តល់សេវាសង្គ្រោះទាំងនេះ ក្រសួងសុខាភិបាល ក៏បានប្រាប់ប្រជាពលរដ្ឋចេះការពារ និងរក្សាសុខភាពផ្ទាល់ខ្លួនឲ្យបានល្អដែរ ដោយចូលរួមការពារ ទប់ស្កាត់ការចម្លងរោគឆ្លងនានា និងការពារការរាករូស ឬពុលអាហារជាដើម៕
Tag:
អុំទូក
ក្រសួងសុខាភិបាល
រថយន្តសង្គ្រោះ
គ្រូពេទ្យ
© រក្សាសិទ្ធិដោយ thmeythmey.com