កីឡាករជើងចាស់របស់ណាហ្គាវើល គួច សុកុម្ភៈ និងអ្នកចាំទី អ៊ុំ វិចិត្រ ត្រូវបានសហព័ន្ធកីឡាបាល់ទាត់កម្ពុជាតែងតាំងឲ្យធ្វើជាគ្រូជំនួយ និងគ្រូចាំទីក្រុមជម្រើសជាតិអាយុក្រោម២២ឆ្នាំ(U22) សម្រាប់ត្រៀមការប្រកួតកីឡាស៊ីហ្គេមនៅហ្វីលីពីនឆ្នាំនេះ។ បើតាមលោក ឆាំង ពិសិដ្ឋ អ្នកចាត់ការទូទៅក្រុមជម្រើសជាតិ ការតែងតាំងនេះធ្វើឡើងដោយផ្អែកលើសមត្ថភាព និងទេពកោសល្យរបស់ពួកគេ។
ទស្សនិកជនធ្លាប់តែឃើញខ្សែបម្រើ គួច សុកុម្ភៈ លេងឲ្យក្រុមជម្រើសជាតិកម្ពុជា តែប្រហែលមិនធ្លាប់ឃើញរូបគេដឹកនាំបង្វឹកក្រុមជម្រើសនោះទេ។ នៅក្នុងអំឡុងខែវិច្ឆិកា នេះ ពោលគឺក្រោយជួយក្រុមជម្រើសជាតិកម្ពុជាតទល់ជាមួយក្រុមម៉ុងហ្គោលី ក្នុងជំនួបមិត្តភាពអន្តរជាតិ និងជំនួបជាមួយហុងកុងក្នុងវគ្គជម្រុះ World Cup 2022 ទស្សនិកជននឹងឃើញរូបគេស្លៀកពាក់ខោអាវជាគ្រូបង្វឹកវិញម្តង។
ការស្លៀកពាក់ខោអាវគ្រូបង្វឹកនេះ គឺធ្វើឡើងក្រោយសហព័ន្ធកីឡាបាល់ទាត់កម្ពុជា ចេញលិខិតឧទ្ទេសនាមតែងតាំងខ្សែបម្រើរូបនេះ ឲ្យធ្វើជាគ្រូជំនួយក្រុមជម្រើសជាតិអាយុក្រោម២២ឆ្នាំសម្រាប់ត្រៀមការប្រកួតកីឡាស៊ីហ្គេមលើកទី៣០នៅប្រទេសហ្វីលីពីនឆ្នាំនេះ។ ការតែងតាំងនេះ នាំឲ្យក្រុមក្រោមការដឹកនាំរបស់អ្នកចាត់ការទូទៅ Keisuke Honda និងគ្រូបង្វឹក Felix Dalmas មានគ្រូជំនួយមួយរូបបន្ថែមទៀតជាមួយលោក ភា សុភ័ក្ត្រា។
កីឡាករមកពីខេត្តកំពង់ធំរូបនេះ បានចូលប្រឡូកក្នុងវិស័យកីឡាបាល់ទាត់លើកដំបូង ដោយធ្វើជាយុវជនរបស់ក្រសួងការពារជាតិពីឆ្នាំ២០០៣-២០០៤។ បន្ទាប់មក រូបគេ បានផ្លាស់ទៅក្លិបខេមរាកីឡាពីឆ្នាំ២០០៥-២០១០ ដោយបានជួយឲ្យក្លិបនេះលើកពានលីគកំពូលពីររលើកនៅឆ្នាំ២០០៥ និង ២០០៦ និងលើកពានសម្តេច ហ៊ុន សែន មួយលើកនៅឆ្នាំ២០០៧។ រូបគេជាម្ចាស់ស្បែកមាសពានរង្វាន់ ហ៊ុន សែន នៅឆ្នាំ២០០៩ ក្រោយរកបាន២១គ្រាប់ និង ២០១០ ក្រោយរកបាន២០គ្រាប់ស្មើកីឡាករ ស្រី វាសនា របស់ភ្នំពេញក្រោន។
ក្រោយមកកីឡាករវ័យ៣២ឆ្នាំរូបនេះ បានផ្ទេរពីខេមរាកីឡាទៅក្លិបភ្នំពេញក្រោន។ ក្នុងអំឡុងពេលរួមរស់ជាមួយភ្នំពេញក្រោនពីឆ្នាំ២០១១-២០១៥ កីឡាករ សុកុម្ភៈ បានជួយឲ្យក្លិបនេះលើកពានលីគកំពូលចំនួន៣លើក(២០១១, ២០១៤ និង ២០១៥)។ នៅឆ្នាំ២០១៦ រូបគេបានមកចូលរួមជាមួយណាហ្គាវើលរហូតដល់បច្ចុប្បន្ន ដោយជួយឲ្យក្លិបនេះលើកពានលីគកំពូលបានមួយលើកនៅឆ្នាំ២០១៨។
ខ្សែបម្រើ គួច សុកុម្ភៈ បានជាប់ជម្រើសជាតិកម្រិតយុវជន និងឈុតធំតាំងពីឆ្នាំ២០០៦ ដោយបានបង្ហាញខ្លួនចំនួន៥៨ប្រកួត និងរកបាន៧គ្រាប់។ បច្ចុប្បន្នរូបគេត្រូវបានកោះហៅឲ្យចូលរួមជាមួយក្រុមជម្រើសជាតិ សម្រាប់ត្រៀមការប្រកួតមិត្តភាពជាមួយម៉ុងហ្គោលីនៅថ្ងៃទី១៤ ខែវិច្ឆិកា និងជំនួបវគ្គជម្រុះ World Cup ជាមួយហុងកុងនៅថ្ងៃទី១៩ វិច្ឆិកា នៅទឹកដីហុងកុង។
ក្នុងលិខិតឧទ្ទេសនាមខាងលើនោះដែរ សហព័ន្ធកីឡាបាល់ទាត់កម្ពុជា ក៏បានតែងតាំងអ្នកចាំទី អ៊ុំ វិចិត្រ របស់ក្លិបក្រសួងការពារជាតិឲ្យធ្វើជាគ្រូបង្វឹកចាំទីក្រុមជម្រើសជាតិអាយុក្រោម២២ឆ្នាំ សម្រាប់ត្រៀមការប្រកួតស៊ីហ្គេមផងដែរ។ វិចិត្រ បានចូលប្រឡូកក្នុងវិស័យកីឡាបាល់ទាត់ជាយុវជនរបស់ក្រសួងការពារជាតិ ដោយបានដំឡើងឲ្យមកលេងឈុតធំនៅឆ្នាំ២០០៨។ រូបគេក្លាយជាសមាជិកក្រុមជម្រើសជាតិអាយុក្រោម១៩ឆ្នាំលើកដំបូងនៅឆ្នាំ២០១១ និងក្រុម U21 នៅឆ្នាំ២០១៤។
បើតាមលោក ឈូក ពិសិដ្ឋ អ្នកចាត់ការក្រុមជម្រើសជាតិកម្ពុជា ការតែងតាំងកីឡាករទាំងពីរ គឺដោយសារពួកគេមានសមត្ថភាព និងទេពកោសល្យ ពិសេសមានមូលដ្ឋានគ្រឹះជាកីឡាករ។ ម្យ៉ាងទៀត គឺវាស្របតាមទស្សនវិស័យបាល់ទាត់របស់សហព័ន្ធ ដែលចង់បណ្តុះធនធានគ្រូបង្វឹកឲ្យបានច្រើន ដើម្បីពង្រីកសក្តានុពលវិស័យកីឡាបាល់ទាត់នៅកម្ពុជា។
«គោលបំណង គឺយើងចង់បណ្តុះធនធានគ្រូបង្វឹកបន្ថែម ពិសេសអ្នកជំនាន់ក្រោយ។ ក្រោយមើលឃើលពីសក្តានុពលរបស់គាត់ យើងក៏បានហៅគាត់មកពិភាក្សា ដោយសារសួរថា តើគាត់ចង់ធ្វើគ្រូបង្វឹកអត់? ពេលនោះគាត់ក៏ឯកភាព យើងក៏ជ្រើសរើសយកគាត់តែម្តងទៅ»។ នេះជាការលើកឡើងរបស់លោក ឈូក ពិសិដ្ឋ។
សហព័ន្ធកីឡាបាល់ទាត់កម្ពុជានៅថ្ងៃទី៥ ខែវិច្ឆិកា ឆ្នាំ២០១៩ បានបង្ហាញបញ្ជីឈ្មោះក្រុមកីឡាករជម្រើសជាតិទាំង២៥រូប ដើម្បីប្រមូលហ្វឹកហាត់ដំណាក់កាលទី១ សម្រាប់ត្រៀមការប្រកួតកីឡាស៊ីហ្គេមលើកទ៣០នៅប្រទេសហ្វីលីពីន ដែលប្រព្រឹត្តទៅចាប់ពីថ្ងៃទី៣០ ខែវិច្ឆិកា ដល់ថ្ងៃទី១១ ខែធ្នូ ឆ្នាំ២០១៩។
សម្រាប់ការប្រកួតនេះដែរ ក្រុម U22 កម្ពុជាក្រោមការដឹកនាំអ្នកចាត់ការទូទៅ Keisuke Honda និងគ្រូបង្វឹក Felix Dalmas ស្ថិតនៅពូល A ជាមួយម្ចាស់ផ្ទះហ្វីលីពីន, ម៉ាឡេស៊ី, មីយ៉ាន់ម៉ា និងទីម័រខាងកើត ខណៈពូឡ B មានថៃ, ឥណ្ឌូនេស៊ី, វៀតណាម, ឡាវ, សិង្ហបុរី និងព្រុយណេ៕