ក្រុមហ៊ុន VR Legend PLC រៀបចំពិធីជួបជុំដៃគូអាជីវកម្ម ដើម្បីបង្ហាញសមិទ្ធផលជោគជ័យ និងឱកាសរីកចម្រើនក្នុងវិស័យពាណិជ្ជកម្ម

អត្ថបទពាណិជ្ជកម្ម

ក្រុមហ៊ុន VR Legend PLC រៀបចំពិធីជួបជុំដៃគូអាជីវកម្ម ដើម្បីបង្ហាញសមិទ្ធផលជោគជ័យ និងឱកាសរីកចម្រើនក្នុងវិស័យពាណិជ្ជកម្ម

07, Nov 2019 , 9:45 am

រូបភាព

ដោយ: ថ្មីៗ

រាជធានីភ្នំពេញ៖ កាលពីថ្ងៃទី២ ខែវិច្ឆិកា ឆ្នាំ២០១៩ ក្រុមហ៊ុន VR Legend PLC ដែលជាក្រុមហ៊ុនកំពុងរីកចម្រើនយ៉ាងឆាប់រហ័ស លើការវិនិយោគក្នុងវិស័យផ្សព្វផ្សាយពាណិជ្ជកម្ម និងរៀបចំព្រឹត្តិការណ៍ក្នុងប្រទេសកម្ពុជា បានរៀបចំកម្មវិធីជួបជុំអ្នកវិនិយោគ និងដៃគូអាជីវកម្មរបស់ខ្លួននៅសណ្ឋាគារ Rosewood Phnom Penh។

កម្មវិធីជួបជុំដ៏ឱឡារិកនេះ រៀបចំឡើងក្រោមប្រធានបទសំខាន់ៗចំនួនបី។ ប្រធានបទទីមួយ គឺណែនាំអំពីជម្រើសជាច្រើន នៃការធ្វើវិនិយោគនៅជុំវិញពិភពលោក ហើយការវិនិយោគមួយចំនួន បានចាប់ផ្តើមក្នុងប្រទេសកម្ពុជា ជាយូរណាស់មកហើយ។ ប្រធានបទទីពីរ គឺបង្ហាញពីភាពរីកចម្រើនគួរឲ្យកត់សម្គាល់ របស់វិស័យផ្សព្វផ្សាយពាណិជ្ជកម្មនៅកម្ពុជា នៅក្នុងរយៈពេលប៉ុន្មានឆ្នាំចុងក្រោយនេះ រួមនឹងការណែនាំពីការវិវឌ្ឍនៃបច្ចេកវិទ្យា Virtual Reality (VR) និង Augmented Reality (AR) ដែលបានប្រើប្រាស់នៅក្នុងប្រទេសភាគខាងលិច ហើយបច្ចេកវិទ្យាទាំងអស់នេះ អាចក្លាយជាទម្រង់នៃការផ្សព្វផ្សាយពាណិជ្ជកម្មដ៏ទំនើប នាពេលអនាគត នៅកម្ពុជា។ ប្រធានបទសំខាន់ចុងក្រោយ គឺពាក់ព័ន្ធនឹងការបង្ហាញ ពីសមិទ្ធផលការងារសំខាន់ៗដែល VR Legend PLC សម្រេចបានក្នុងឆ្នាំ ២០១៩។

លោក Dr. Henry Sim ដែលជា Group Chairman របស់ក្រុមហ៊ុន VR Legend PLC បានបង្ហាញចំណាប់អារម្មណ៍ប្រកបដោយទំនុកចិត្តថា៖ «ត្រឹមរយៈពេលមួយដ៏ខ្លី VR Legend PLC អាចពង្រីកសក្តានុពលរបស់ខ្លួន រហូតក្លាយជាក្រុមហ៊ុនដែលរីកចម្រើនយ៉ាងឆាប់រហ័សមួយ ក្នុងចំណោមក្រុមហ៊ុនជាច្រើននៅកម្ពុជា។ ហើយខ្ញុំជឿជាក់យ៉ាងមុតមាំថា VR Legend PLC នឹងទទួលបានជោគជ័យ លើសពីផែនការដែលបានគ្រោងទុក នេះក៏ដោយសារមានថ្នាក់ដឹកនាំ និងបុគ្គលិក ដែលពោរពេញដោយការប្តេជ្ញាចិត្តខ្ពស់ មានឆន្ទៈ មានចក្ខុវិស័យវែងឆ្ងាយ រួមនឹងជំនាញច្បាស់លាស់ថែមទៀតផង»។

អ្នកស្រី តាក់ ពិសិដ្ឋរដ្ឋលីដា ជា Group CEO របស់ VR Legend PLC ក៏បានបញ្ជាក់បន្ថែមដែរថា៖ «ចាប់តាំងពីយើងចាប់ផ្តើមបង្កើតក្រុមហ៊ុនដំបូង យើងបាន និងកំពុងឈរលើគោលជំហរដ៏រឹងមាំ ក្នុងការក្លាយជាក្រុមហ៊ុនផ្តល់សេវាកម្មផ្សព្វផ្សាយគ្រប់ប្រភេទ ដែលមិនទាក់ទងនឹងថ្នាំជក់ និងគ្រឿងស្រវឹង ដែលគោលជំហរនេះ កំពុងឆ្លើយតប ១០០% ទៅនឹងគោលនយោបាយរបស់រដ្ឋាភិបាលកម្ពុជា។ ទោះបីជាក្រុមហ៊ុនរបស់យើងថ្មី ទើបតែមានវត្តមានឡើង ក៏ប៉ុន្តែសមាជិកក្រុមការងាររបស់យើងម្នាក់ៗ សុទ្ធតែមានចំណុចពិសេសមួយដូចគ្នា។ ពួកគាត់ចូលចិត្តការប្រកួតប្រជែងនឹងឧបសគ្គ ដែលកើតឡើងនៅនឹងមុខ ហើយពួកគាត់នឹងដាក់ចិត្ត និងកម្លាំង ១០០ ភាគរយ ដើម្បីសម្រចកិច្ចការនោះដោយជោគជ័យ។ មានសមាជិកក្រុមការងារយើងខ្លះ មានបទពិសោធន៍ការងារក្នុងវិស័យផ្សព្វផ្សាយពាណិជ្ជកម្មនេះជិត ៣០ឆ្នាំហើយ ប៉ុន្តែការគិត និងអារម្មណ៍របស់ពួកគាត់នៅតែក្មេង និងទាន់សម័យកាលជានិច្ច។ ដោយសារគុណសម្បត្តិទាំងអស់នេះហើយ ទើបជំរុញឲ្យពួកយើងបានលទ្ធផលជោគជ័យលើសពីដែនកំណត់។ ខ្ញុំមានទំនុកចិត្ត និងសុទិដ្ឋិនិយមខ្ពស់ ដែលក្រុមហ៊ុន VR Legend PLC នឹងក្លាយជាចំណែកមួយដ៏សំខាន់ នៃការស្ថាបនាវិស័យផ្សព្វផ្សាយពាណិជ្ជកម្មរបស់កម្ពុជាយើង ឲ្យកាន់តែខ្លាំងក្លាឡើង»។

អ្នកស្រី Tho Socheatvanny ជា Board Member របស់ VR Legend PLC មានប្រសាសន៍បន្ថែមថា៖ «តាមរយៈមតិយោបល់ល្អៗ ដែលយើងទទួលបានពីអ្នកចូលរួមទាំងអស់ យើងសម្រេចថានឹងរៀបចំកម្មវិធីជួបជុំបែបនេះជាប្រចាំ ដើម្បីឲ្យអ្នកវិនិយោគ និងដៃគូអាជីវកម្មរបស់យើងទទួលចំណេះដឹង អំពីឱកាសវិនិយោគក្នុងវិស័យផ្សព្វផ្សាយពាណិជ្ជកម្ម និងការអភិវឌ្ឍនាពេលអនាគតរបស់កម្ពុជា។ នាងខ្ញុំ ពិតជាមានសេចក្តីសោមនស្សរីករាយបំផុត នៅពេលដែលឃើញ Group CEO និង Group COO របស់យើង ឡើងមកបង្ហាញអំពីគោលជំហរនៃការចូលរួមចំណែកអភិវឌ្ឍន៍ប្រទេសកម្ពុជា ខណៈពេលដែលប្រទេសកម្ពុជា កំពុងត្រូវបានគេចាត់ទុកថាជាប្រទេស ដែលពោរពេញទៅដោយឱកាសវិនិយោគ ប្រសើរជាងគេប្រចាំតំបន់អាស៊ីប៉ាស៊ីហ្វិច»៕