អត្ថបទពាណិជ្ជកម្ម
បេក្ខជនថៃ ឈ្នះឡាន Subaru ពីការប្រកួតឈរដាក់បាតដៃលើរថយន្ត នៅសិង្ហបុរី
×![]()
ដោយ: ថ្មីៗ
សិង្ហបុរី៖ បេក្ខជនពីប្រទេសថៃ Siripong Toosadee ក្លាយជាម្ចាស់រថយន្តស៊េរីថ្មី Subaru Forester 2.0i-S EyeSight តម្លៃជិត៦ម៉ឺនដុល្លារអាមេរិក នៅក្នុងការប្រកួតដាក់បាតដៃលើរថយន្ត ស៊ូបារុ មេឌាខប (Mediacorp Subaru Last Palm Standing 2019) នៅសិង្ហបុរី ដោយប្រើរយៈពេលឈរ ៧៦ម៉ោង ៥៥នាទី និង៥វិនាទី។ ចំណាត់ថ្នាក់ទីពីរ បានទៅបេក្ខជន Luu Van Quoc ពីប្រទេសវៀតណាម។ បេក្ខជនចុងក្រោយពីកម្ពុជា ទូច ស៊ិញ ទទួបានប្រាក់ ១,១៥០ដុល្លារអាមេរិកពីកម្មវិធី ក្រោយឈរបានរយៈពេល ៦៤ម៉ោង និង៤៦នាទី។
ក្រោយឆ្លងកាត់ការប្រកួតប្រជែង ដោយស៊ូទ្រាំឈរដាក់បាតដៃលើរថយន្ត Subaru ទាំងថ្ងៃទាំងយប់ ចំនួន៣យប់ ៤ថ្ងៃ ដែលមានបេក្ខជនចូលរួមសរុបចំនួន ៤០០នាក់ នៅបរិវេណផ្សារទំនើប Ngee Ann City Civic Plaza បានបញ្ចប់ជាសា្ថពរហើយ នៅថ្ងៃទី៥ ខែវិច្ឆិកា។
Siripong ទទួលបានរថយន្ត Subaru ស៊េរីថ្មីមួយគ្រឿង ដែលមានតម្លៃ ៥៦,៥០០ ដុល្លារអាមេរិក ព្រមទាំងប្រាក់រង្វាន់បន្ថែមទៀតជាច្រើន។ ប្រាក់រង្វាន់បន្ថែមផ្សេងៗ ត្រូវអនុវត្តន៍តាមលក្ខខណ្ឌដូច បេក្ខជនបេក្ខនារីណា ដែលឆ្លងផុតចាប់ពីរយៈពេល៤៨ម៉ោងឡើងទៅ នឹងទទួលបានប្រាក់រង្វាន់៥០ដុល្លារអាមេរិក ប្រសិនបើពួកគេបន្តឈរបានចាប់ពី៥ម៉ោងជាបន្តបន្ទាប់ទៀត។ ដោយឡែកទឹកប្រាក់ ១,០០០ដុល្លារ ផ្តល់ជូនដល់បេក្ខជន ដែលធ្វើបានចុងក្រោយគេ ក្នុងចំណោមគ្នា១០នាក់ ពីប្រទេរបស់ពួកគេរៀងខ្លួន។
Subaru Last Palm Standing 2019 តម្រូវឲ្យបេក្ខជនឈរដាក់បាតដៃលើរថយន្ត (ទាំងថ្ងៃ-យប់) យូរជាងគេ ដោយក្នុងនោះបេក្ខជន៤០នាក់ ត្រូវឈរដាក់ដៃលើរថយន្តមួយគ្រឿង ដែលសរុបទាំងអស់១០គ្រឿង។ បេក្ខជនបេក្ខនារីទាំងអស់ មានពេលសម្រាក ៥នាទី ក្នុង៦ម៉ោងម្តង ដើម្បីបរិភោគអាហារ សម្រួលសរសៃ និងបត់ដៃបត់ជើងជាដើម។
ការប្រកួតដាក់បាតដៃលើរថយន្ត Subaru លើកទី១៨នេះ មាន៩ប្រទេសចូលរួម ដែលរួមមាន កម្ពុជា សិង្ហបុរី ម៉ាឡេស៊ី ហ្វីលីពីន ហុងកុង ឆាយនីសតាយប៉ិ ថៃ វៀតណាម និងចិន ដែលការប្រកួតនេះ មានរយ:ពេល៤ថ្ងៃ ពីថ្ងៃទី២ ដល់ទី៥ ខែវិឆ្ឆិកា។ ចំណោមបេក្ខភាពទាំង៤០០រូប ម្ចាស់ផ្ទះសិង្ហបុរី មានសមាជិកចូលរួមប្រកួតរហូតច្រើនជាងគេដល់ ៣២០នាក់ និង១០នាក់ ពីប្រទេសនីមួយៗ។
កាលពីឆ្នាំ២០១៨ បេក្ខនារីរបស់សិង្ហបុរីជាអ្នកឈ្នះជ័យលាភីពីព្រឹត្តិការណ៍ Subaru Palm Challenge ដោយប្រើពេល ៧៥ម៉ោង ១៧នាទី និង៥៨វិនាទី ខណៈចំណាត់ថ្នាក់ទី២ បានទៅថៃ៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
