រដ្ឋាភិបាលនៃប្រទេសស៊ីប (Cyprus) បានអះអាងថា ខ្លួនបានចាប់ផ្តើមដំណើរការដកហូតសញ្ជាតិបុគ្គល២៦នាក់ ដែលពួកគេទទួលបានក្រោមកម្មវិធីទាក់ទាញវិនិយោគរបស់ជាតិ។ តាមប្រភពរដ្ឋាភិបាលស៊ីប ក្នុងចំណោមបុគ្គលទាំង២៦នាក់នោះ គឺមានជនជាតិកម្ពុជា៨នាក់។ ទន្ទឹមនេះរដ្ឋាភិបាលស៊ីបក៏សារភាពពីភាពចន្លោះប្រហោងនៃការអនុវត្តនីតិវិធីផ្តល់សញ្ជាតិរបស់ខ្លួនផងដែរ។
«គណៈរដ្ឋមន្ត្រី បានសម្រេចផ្តួចផ្តើមនីតិវិធីដកហូតសញ្ជាតិស៊ីបពីបុគ្គលចំនួន២៦នាក់»។ រដ្ឋមន្ត្រីមហាផ្ទៃស៊ីប លោក Constantinos Petrides ប្រាប់អ្នកកាសែតបែបនេះក្រោយជំនួប៤ម៉ោង នៅថ្ងៃពុធទី ៦ វិច្ឆិកា។ លោកសង្កត់ធ្ងន់ថា គណៈរដ្ឋមន្ត្រីស៊ីបគាំទ្រយ៉ាងពេញទំហឹង ចំពោះឆន្ទៈរបស់រដ្ឋាភិបាលក្នុងការគោរពយ៉ាងម៉ឹងមាត់នូវលក្ខខណ្ឌនៃកម្មវិធីវិនិយោគរបស់ប្រទេស។
ទោះជាប្រកាសពីដំណឹងដកហូតនេះ លោករដ្ឋមន្ត្រី Petrides ពុំបានបញ្ជាក់ពីអត្តសញ្ញាណ ឬជនជាតិរបស់បុគ្គលដែលនឹងត្រូវដកហូតសញ្ជាតិនោះឡើយ។ ក៏ប៉ុន្តែមន្ត្រីរដ្ឋាភិបាលស៊ីបម្នាក់ដែលសុំមិនបញ្ចេញឈ្មោះ បានបញ្ជាក់ប្រាប់ទីភ្នាក់ងារព័ត៌មាន AP ថា បុគ្គលទាំង២៦នាក់ ដែលនឹងត្រូវបាត់បង់សញ្ជាតិស៊ីបនោះ មានដូចជា ជនជាតិចិន៥នាក់, រុស្ស៊ី៩នាក់, កម្ពុជា៨នាក់, ម៉ាឡេស៊ី១នាក់, អ៊ីរ៉ង់១នាក់ និងកេនយ៉ា២នាក់។
ទន្ទឹមនឹងការបញ្ជាក់ពីការបើកនីតិវិធីដកហូតសញ្ជាតិ លោករដ្ឋមន្ត្រីមហាផ្ទៃស៊ីបរូបនេះ ក៏បានទទួលស្គាល់ពីកំហុសនៃការអនុវត្តធូរលុងចំពោះការផ្តល់សញ្ជាតិ។ លោក Petrides អះអាងបែបនេះថា វាមានកំហុស ហើយកំហុសនោះគឺត្រង់ថា រដ្ឋាភិបាលស៊ីប ពុំមានគោលការណ៍ច្បាស់លាស់ ជាពិសេស សម្រាប់មនុស្សដែលចាត់ទុកថា «មានហានិភ័យខ្ពស់»។
មែនទែនទៅ ការដកហូតសញ្ជាតិបែបនេះគឺជារឿងកម្របំផុត ហើយសកម្មភាពរបស់រដ្ឋាភិបាលស៊ីបនេះ កើតឡើងក្រោយពីអាជ្ញាធរខ្លួនបានបើកការស៊ើបអង្កេត ក្រោយលេចធ្លាយរបាយការណ៍មួយ។ របាយការណ៍នោះគឺ ការស៊ើបអង្កេតរបស់ទីភ្នាក់ងារព័ត៌មាន
Reuters កាលពីខែមុន ដែលបានបង្កើតជាសំណួរពាក់ព័ន្ធនឹងប្រសិទ្ធភាព ដែលអាជ្ញាធរស៊ីបត្រួតពិនិត្យល្អិតល្អន់ពីជីវប្រវត្តិរបស់បុគ្គលដែលត្រូវបានផ្តល់សញ្ជាតិ។
នៅក្នុងរបាយការណ៍នេះ ក៏បានទម្លាយដែរថា សមាជិកគ្រួសារនិងមនុស្សជំនិតរបស់មេដឹកនាំកម្ពុជា មានទ្រព្យសម្បត្តិនៅបរទេសដែលស្មើនឹង១០លានដុល្លារ ហើយអ្នកទាំងនោះបានប្រើប្រាស់ទ្រព្យសម្បត្តិពួកគេទិញសញ្ជាតិបរទេស។ បើតាមការស៊ើបអង្កេតរបស់ Reuters សាច់ញាតិ ឬជំនិតរបស់មេដឹកនាំកម្ពុជា៨នាក់ដែលក្នុងនោះគឺមានអគ្គស្នងការប៉ូលិសជាតិ និងរដ្ឋមន្ត្រីហិរញ្ញវត្ថុ ទទួលបានសញ្ជាតិស៊ីបក្នុងឆ្នាំ២០១៦ និង២០១៧។
សូមបញ្ជាក់ថា ចំណុចពិសេសរបស់សញ្ជាតិស៊ីបគឺថា អ្នកកាន់លិខិតឆ្លងដែនស៊ីប នឹងក្លាយជាសញ្ជាតិអ៊ឺរ៉ុប ហើយអាចធ្វើការ និងធ្វើដំណើរដោយសេរីក្នុងប្លុកប្រទេសទាំង២៨នេះ។ បច្ចុប្បន្ន លិខិតឆ្លងដែនស៊ីបជិត៤០០០ ត្រូវបានផ្តល់ឲ្យអ្នកវិនិយោគដែលបោះទុនវិនិយោគយ៉ាងតិច២,២លានដុល្លារ ក្រោមកម្មវិធីទាក់ទាញការវិនិយោគរបស់ប្រទេសស៊ីប។ ហើយរដ្ឋាភិបាលស៊ីប រកលុយបានប្រមាណ ៧,៨ពាន់ពីកម្មវិធីវិនិយោគនេះ គិតចាប់ពីដំណើរការកម្មវិធីក្នុងឆ្នាំ២០១៣មក។
សហភាពអឺរ៉ុប កាលពីខែមករា បានព្រមានប្រទេសស៊ីប និងប្រទេសផ្សេងទៀតថា ពួកគេត្រូវតែពង្រឹងនីតិវិធីសាកសួរជីវប្រវត្តិ បន្ទាប់ពីមានការព្រួយបារម្ភថា ជនជាតិនៃប្រទេសទី៣ កំពុងប្រើប្រាស់កម្មវិធីទាក់ទងការវិនិយោគនេះក្នុងគោលដៅលាងលុយកខ្វក់ និងបំពានច្បាប់ពន្ធដារ៕