ចិនឱ្យក្រសួងអភិវឌ្ឍន៍ជនបទជាង៥០លានដុល្លារ សាងសង់ផ្លូវ ក្នុងខេត្តចំនួន៦

ជាតិ

សេដ្ឋកិច្ច

ចិនឱ្យក្រសួងអភិវឌ្ឍន៍ជនបទជាង៥០លានដុល្លារ សាងសង់ផ្លូវ ក្នុងខេត្តចំនួន៦

08, Nov 2019 , 8:59 am

រូបភាព

ប្រភពរូបបានពីក្រសួងអភិវឌ្ឍន៍ជនបទ

ដោយ: អ៊ូ សុខមាន (OU Sokmean)

ភ្នំពេញ៖ រដ្ឋាភិបាលចិន បានឱ្យជំនួយឥតសំណងដល់កម្ពុជា ជាង៣៩៦លានយ័ន្ត(ប្រមាណ៥៦លានដុល្លារ) សម្រាប់ គម្រោងសាងសង់់ផ្លូវជនបទចំនួន១៨ខ្សែ និងគម្រោងផ្គត់ផ្គង់ទឹកជនបទជំហាន២។ គម្រោងទាំងពីរនេះ នឹងចាប់ផ្តើមអនុវត្តនៅក្នុងខែធ្នូ ឆ្នាំ២០១៩។ នេះបើតាមលោក ចាន់ ដារ៉ុង អ្នកនាំពាក្យក្រសួងអភិវឌ្ឍន៍ជនបទ។

លោក ដារ៉ុង បានប្រាប់សារព័ត៌មានThmeyThmey តាមប្រព័ន្ធទំនាក់ទនងសង្គមតេលេក្រាម នាថ្ងៃទី៧វិច្ឆិកា ឆ្នាំ២០១៩ ថា ក្នុងចំណោមថវិកាសរុបខាងលើ មានប្រមាណ៤២.៨លានដុល្លារ សម្រាប់សាងសង់ផ្លូវ១៨ខ្សែ ក្រាលកៅស៊ូពីរជាន់ប្រភេទDBST ក្នុងប្រវែងជិត១២០គីឡូម៉ែត្រ នៅក្នុងខេត្តចំនួន៦។ ខេត្តទាំង៦នោះមាន កំពង់ស្ពឺ កំពង់ឆ្នាំង កណ្តាល ព្រៃវែង ត្បូងឃ្មុំ និងខេត្តស្វាយរៀង។

ដោយឡែកថវិកាជិត១៤លានដុល្លារទៀត គឺសម្រាប់គម្រោងផ្គត់ផ្គង់ទឹកជនបទជំហាន២ ដោយមានការខួងអណ្តូងស្នប់ចំនួន៩៦៤ អណ្តូង ជីកស្រះទឹកសហគមន៍ចំនួន១២ និងជីកស្រះទឹកសហគមន៍ដែលមានរៀបថ្ម៤២ ស្រះ នៅក្នុងខេត្តគោលដៅចំនួន១០ រួមមាន៖ ខេត្តកំពង់ឆ្នាំង កំពង់ស្ពឺ ស្វាយរៀង កំពង់ចាម សៀមរាប បន្ទាយមានជ័យ បាត់ដំបង ពោធិ៍សាត់ កំពត និងព្រៃវែង។

លោក ចាន់ ដារ៉ុង បានបញ្ជាក់ថា ក្នុងដំណើរការអនុវត្តគម្រោងទាំងពីរខាងលើនេះ ក្រៅពីក្រសួងអភិវឌ្ឍន៍ជនបទទទួលបានជំនួយឥតសំណងពីរដ្ឋាភិបាលចិន ក៏មានថវិកាបដិភាគមួយចំនួនទៀត ពីរដ្ឋាភិបាលកម្ពុជាផងដែរ៕