ជាតិ
លោក មហាធៀ ៖ «យើងមិនចង់ឱ្យអ្នកណាម្នាក់ប្រើប្រាស់ទឹកដីម៉ាឡេស៊ី ដើម្បីប្រឆាំងនឹងប្រទេសដទៃឡើយ»
លោកនាយករដ្ឋមន្ត្រីម៉ាឡេស៊ី មហាធៀ មហាម៉ាត់ ជួបសម្ដេចនាយករដ្ឋមន្រ្តី ហ៊ុន សែន កាលពីខែកញ្ញា ឆ្នាំ២០១៩ នៅក្នុងដំណើរទស្សកិច្ចកម្ពុជា (រូបពីAFP)
×![]()
នាយករដ្ឋមន្ត្រីម៉ាឡេស៊ី លោក មហាធៀ មហាម៉ាត់ ប្រកាសថា ខ្លួនមិនអនុញ្ញាតឱ្យអ្នកណាម្នាក់ យកទឹកដីម៉ាឡេស៊ី ទៅប្រើប្រាស់ ក្នុងគោលបំណងប្រឆាំងនឹងប្រទេសណាមួយឡើយ។ លោក មហាធៀ អះអាងបែបនេះ គឺឆ្លើយតបទៅនឹងសំនួរអ្នកកាសែត ដែលសួរពាក់ព័ន្ធនឹងការឃាត់ខ្លួនអ្នកស្រី មួរ សុខហួរ ប្រធានគណៈកម្មការរៀបចំដំណើរមាតុភូមិនិវត្តរបស់លោក សម រង្ស៊ី និងសកម្មជនអតីតគណបក្សសង្គ្រោះជាតិ២រូបទៀតជាបន្តបន្ទាប់ កាលពីថ្ងៃទី៦ វិច្ឆិកា។
ជុំវិញការឃាត់ខ្លួនមន្ត្រី និងសកម្មជនអតីតបក្សប្រឆាំងដ៏ធំនៅកម្ពុជា នាព្រលានយន្តហោះម៉ាឡេស៊ី កាលពីពេលថ្មីៗនេះ លោក មហាធៀ បានអះអាងថា អាជ្ញាធរម៉ាឡេស៊ី កំពុងស្វែងរកប្រទេសទី៣ ដើម្បីបញ្ចូនពួកគេទៅ។ សារព័ត៌មាន New Straits Times របស់ម៉ាឡេស៊ី បានស្រង់សម្តីនាយករដ្ឋមន្ត្រីម៉ាឡេស៊ី យ៉ាងដូច្នេះថា៖«យើងចង់បញ្ជូនគាត់ (អ្នកស្រី មួរ សុខហួរ) ទៅ ប៉ុន្តែមនុស្សជាច្រើនបានស្នើឱ្យគាត់ត្រឡប់មកទីនេះ ហើយឥឡូវនេះយើងកំពុងស្វែងរកប្រទេសទី៣ ដែលអាចបញ្ជូនគាត់ទៅ»។
បើតាមលោក មហាធៀ គ្មាននរណាម្នាក់អាចយកទឹកដីម៉ាឡេស៊ី ទៅប្រើប្រាស់ ដើម្បីប្រឆាំងនឹងប្រទេសណាមួយទៀតបានឡើយ។ «ជាគោលការណ៍របស់ពួកយើង នៅក្នុងអាស៊ាន ជាធម្មតាយើងមិនចង់ជ្រៀតជ្រែកចូលកិច្ចការផ្ទៃក្នុងប្រទេសណាមួយទេ។ យើងក៏មិនចង់ឱ្យអ្នកណាម្នាក់យកទឹកដីម៉ាឡេស៊ី ធ្វើជាមូលដ្ឋាន ដើម្បីប្រឆាំងនឹងប្រទេសដទៃឡើយ»។
រដ្ឋមន្ត្រីការបរទេសម៉ាឡេស៊ីលោក Datuk Saifuddin Abdullah បាននិយាយថា ក្រសួងរបស់លោក មិនទាន់សម្រេចចិត្តលើសំណើរបស់រដ្ឋាភិបាលកម្ពុជា ក្នុងការបញ្ជូនពលរដ្ឋមួយចំនួន រួមទាំងអ្នកស្រីមូរសុខហួរ ទៅកម្ពុជាវិញឡើយ ។ នេះបើតាមសារព័ត៌មាន Straits Times។
អ្នកស្រី មួរ សុខហួរ បានធ្វើដំណើរទៅកាន់ប្រទេសម៉ាឡេស៊ី កាលពីថ្ងៃទី៦ វិច្ឆិកា ក្រោយពីបញ្ចប់ការធ្វើសន្និសីទកាសែតមួយ នៅក្នុងប្រទេសឥណ្ឌូនេស៊ី ជុំវិញការវិលត្រឡប់មកកម្ពុជា។ ពេលទៅដល់ម៉ាឡេស៊ីភ្លាម ក្រុមអាជ្ញាធរអន្តោប្រវេសន៍ម៉ាឡេស៊ី ក៏បានឃាត់ខ្លួនអ្នកស្រី មូរ សុខហួរ នៅព្រលានយន្តហោះតែម្ដង។ ក្រៅពីអ្នកស្រី មួរ សុខហួរ ក៏មានសកម្មជនអតីតបក្សប្រឆាំង២រូបទៀត គឺកញ្ញា ងីម គាថា និងលោក ស៊ាង លាងហេង ត្រូវបានអាជ្ញាធរម៉ាឡេស៊ីឃាត់ខ្លួន កាលពីថ្ងៃទី៥ វិច្ឆិកាដែរ។
សារព័ត៌មានថ្មីៗ មិនអាចទាក់ទងអ្នកស្រី មួរ សុខហួរ ដើម្បីសុំលម្អិតពីការឃាត់ខ្លួន នៅថ្ងៃទី៨ វិច្ឆិកានេះបានឡើយទេ ដោយសារអ្នកស្រី ប្រាប់ថា ខ្លួនកំពុងរវល់។ ប៉ុន្តែអ្នកស្រី មួរ សុខហួរ បានប្រាប់ដល់វិទ្យុសំឡេងសហរដ្ឋអាមេរិក VOA កាលពីថ្ងៃទី៧ វិច្ឆិកាថា អ្នកស្រី ត្រូវបានប៉ូលីសអន្តោប្រវេសន៍ម៉ាឡេស៊ីឃាត់ខ្លួនតាំងពីយប់ថ្ងៃពុធ រំលងអាធ្រាត្រ ដោយសារមានលិខិតហាមឃាត់ពីរដ្ឋាភិបាលខ្មែរ។ បើតាមអ្នកស្រី មួរ សុខហួរ ក្រោយការស៊ើបសួរអស់រយៈពេលជិត២០ម៉ោង អាជ្ញាធរក៏បានសម្រេចឲ្យអ្នកស្រី និងសកម្មជនគណបក្សសង្គ្រោះជាតិចំនួនពីរូបផ្សេងទៀត គឺកញ្ញា ងឹម គាថា និងលោក ស៊ាង លាងហេង ឲ្យចូលក្នុងប្រទេសម៉ាឡេស៊ី នៅម៉ោងប្រមាណជា៦ល្ងាចថ្ងៃទី ៧ វិច្ឆិកា។
អត្ថបទទាក់ទង
ដោយឡែកលោក សម រង្ស៊ី មេដឹកនាំអតីតគណបក្សសង្គ្រោះជាតិ ក៏ត្រូវបានក្រុមហ៊ុនអាកាសចរណ៍ថៃ (Thai Airways) បានបដិសេធមិនឱ្យលោក ឡើងយន្តហោះពីទីក្រុងប៉ារីសប្រទេសបារាំងឆ្ពោះមកទីក្រុងបាងកកប្រទេសថៃដែរ។ ក្រោយការបដិសេធលោក សម រង្ស៊ី បានបង្ហោះវិដេអូឃ្លីបមួយ ដោយអះអាងថា ខ្លួននិងមេដឹកនាំផ្សេងទៀត នឹងពិភាក្សារកវិធីចូលមកកម្ពុជាឱ្យទាល់តែបាន។
ការបដិសេធរបស់ក្រុមហ៊ុនអាកាសចរណ៍ថៃនេះ ធ្វើឡើងក្រោយពីសម្ដេចនាយករដ្ឋមន្ត្រី ហ៊ុន សែន ប្រកាសថា ភាគីបណ្ដាប្រទេសអាស៊ាន ដែលមានម៉ាឡេស៊ី ឥណ្ឌូណេស៊ី និងថៃ ជាដើមនោះ បានយល់ព្រមតាមសំណើរបស់សម្ដេច ក្នុងការមិនអនុញ្ញាតឱ្យក្រុមអតីតគណបក្សសង្គ្រោះជាតិត្រឡប់មកកម្ពុជា៕
Tag:
មហាធៀ
ម៉ាឡេស៊ី
មួរ សុខហួរ
© រក្សាសិទ្ធិដោយ thmeythmey.com
