នាយករដ្ឋមន្ត្រី​សិង្ហ​បុរី ដាស់តឿន​ពលរដ្ឋ​រឿង​រើស​មេដឹកនាំ​ដែល​រឹងមាំ ខណៈ​ការបោះឆ្នោត​អាណត្តិ​ថ្មី​ខិតជិត​មកដល់​
អន្តរជាតិ
នាយករដ្ឋមន្ត្រី​សិង្ហ​បុរី ដាស់តឿន​ពលរដ្ឋ​រឿង​រើស​មេដឹកនាំ​ដែល​រឹងមាំ ខណៈ​ការបោះឆ្នោត​អាណត្តិ​ថ្មី​ខិតជិត​មកដល់​
10, Nov 2019 , 8:29 pm        
រូបភាព
​នាយករដ្ឋមន្ត្រី និង​ជា​អគ្គលេខាធិការ​បក្ស​កាន់អំណាច​សិង្ហ​បុរី លោក លី សៀន​ឡុង បាន​ក្រើនរម្លឹក​ដល់​សមាជិក​ប​ក្ស និង​សកម្មជន​ដែលជា​អ្នក​បន្តវេន​ជំនាន់​ក្រោយ​របស់ខ្លួន​ឲ្យ​មានការ​ប្រុងប្រយ័ត្ន​ក្នុងការ​រៀបចំ​គោលនយោបាយ​សម្រាប់​អនុវត្ត​ទាំង​ថ្នាក់ជាតិ និង​អន្តរជាតិ​។ អ្វីដែល​លោក លី ចង់បាន និង​ចង់ឃើញ នោះ​គឺ​គោលនយោបាយ​ដែល​ដាក់​អនុវត្ត ត្រូវតែ​ទទួលបាន​ការគាំទ្រ​ពី​ប្រជាជន​ភាគច្រើន​។​

 
​តាមរយៈ​សន្និសីទ​រប​ស់​គណបក្សកាន់អំណាច​សកម្មភាព​ប្រជាជន (PAP) នៅ​ថ្ងៃ​១០ វិច្ឆិកា លោក លី សៀន​ឡុង បាន​លើកឡើងថា សិង្ហ​បុរី ត្រូវការ​មេដឹកនាំ ដែលមាន​ជំនាញ​ក្នុងការ​ដោះស្រាយ​បញ្ហា ហើយ​មានការ​គាំទ្រ​ពេញទំហឹង​ពី​ប្រជាជន​។ នេះ​បើ​យោងតាម​ការចុះផ្សាយ​រប​ស់​សារព័ត៌មាន Channel News Asia​។​
 
​នា​វេទិកា ដែលមាន​ការចូលរួម​ពី​សមាជិក​គណបក្ស និង​សកម្មភាព​របស់ខ្លួន ប្រធាន​គណបក្ស​កាន់ អំណាច​រូបនេះ បាន​ពណ៌នា ការបោះឆ្នោត​សកល​របស់​សិង្ហ​បុរី​ឆ្នាំ ២០២១​ខាងមុខ គឺជា​ពេលវេលា​ដ៏​សំខាន់បំផុត​មួយ​។ លោក លើកឡើងថា អ្នក​ខាងក្រៅ នឹង​រង់​ចាំមើល​យ៉ាង​យកចិត្តទុកដាក់ ថា​តើ​បក្ស​សកម្មភាព​ប្រជាជន នឹង​បន្ត​ឈ្នះ​ទៀត​ឬ​យ៉ាងណា ជាពិសេស​នៅពេល​បក្ស​នេះ មានការ​ផ្លាស់ប្តូរ​អ្នកដឹកនាំ​។ 
 
​លោក លី បាន​កត់សម្គាល់ថា នយោបាយ​នៅក្នុង​ប្រទេស​ជាច្រើន​របស់​ពិភពលោក បាន​រង​ការ​ខ្ទេចខ្ទាំ ហើយ​ជំនឿ​ទុកចិត្ត​លើ​មេដឹកនាំ​របស់ខ្លួន ក៏​ត្រូវបាន​បាត់បង់​ជា​បន្តបន្ទាប់ ដោយសារតែ​ការផ្តល់​សេវាសាធារណៈ​មិនបាន​ល្អ និង​គ្រប់គ្រាន់ ខណៈ​ការ​បញ្ឆេះ​កំហឹង​សាធារណៈ​កាន់តែ​កើនឡើង​។​
 
​ប្រមុខ​បក្ស​កាន់អំណាច​រូបនេះ បាន​លើកយក​បញ្ហា​នៅ​ហុងកុង​ជា​គំរូ​។ លោក គូសបញ្ជាក់ថា ការណ៍​ដែល​ធ្វើ​ឲ្យ​មាន​បាតុកម្ម​ពី​យុវជន​ហុងកុង គឺ​ពួកគេ មិន​សប្បាយ​ចិត្តនឹងរ​ដ្ឋា​ភិ​បាល​ក្នុង​គោលនយោបាយ​សង្គម​-​សេដ្ឋកិច្ច​។ លោក យល់ឃើញថា យុវជន​ហុងកុង គិតថា ទោះបីជា​ពួកគេ ខំប្រឹង​រៀនសូត្រ និង​ធ្វើការ​យ៉ាងណាក៏ដោយ ក៏​ពួកគេ គ្មាន​អនាគត​ល្អប្រសើរ​អ្វី​ដែរ​។ 
​ទោះបីជា​សិង្ហ​បុរី មិនទាន់មាន​បញ្ហា​ធ្ងន់ធ្ងរ​នៅក្នុង​សង្គម​បែបនេះ​ក៏ដោយ លោក លី នៅតែ​ក្រើនរម្លឹក​ឲ្យ​អ្នកដឹកនាំ​ជំនាន់​ក្រោយ មានការ​ប្រុងប្រយ័ត្ន​ខ្ពស់​ក្នុងការ​រៀបចំ និង​អនុវត្ត​គោលនយោបាយ​។ លោក សង្កត់​ថា ប្រសិនបើ​ហេតុការណ៍​បែបនេះ​កើតឡើង​នៅ​សិង្ហ​បុរី នោះ​វា នឹង​កាន់តែ​អាក្រក់​ខ្លាំង​ជាង​ប្រទេស​ដទៃ ដ្បិត​សិង្ហ​បុរី តូច ហើយ​ងាយ​រងគ្រោះ​។ 
 
​នៅពេល​និយាយ​ដល់​ទំនាក់ទំនង​ខាងក្រៅ លោក លី បានលើកឡើង​ពី​បញ្ហា​ពាណិជ្ជកម្ម​អាមេរិក និង​ចិន​។ លោក លើកឡើងថា ទាំង​អាមេរិក និង​ចិន សុទ្ធសឹងតែ​ជា​ដៃគូ​សំខាន់​របស់​សិង្ហ​បុរី ដែល​បញ្ហា​នេះ  សិង្ហ​បុរី ត្រូវតែ​ថ្លឹងថ្លែង​ឲ្យ​បាន​គ្រប់​ជ្រុងជ្រោយ​ក្នុង​ការធ្វើសកម្មភាព និង​ទំនាក់ទំនង​ជាមួយនឹង​ដៃគូ​នីមួយៗ ដើម្បី​បញ្ជៀ​ស​ការយល់ច្រលំ​ពី​ដៃគូ​។ 
 
​គួរ​ជម្រាប​ថា នៅក្នុង​ការបោះឆ្នោត​រប​ស់​សិង្ហ​បុរី​ក្នុង​អាណត្តិ​ក្រោយ លោក លី សៀន​ឡុង នឹងមិន​ឈរឈ្មោះ​ជា​បេក្ខភាព​នាយករដ្ឋមន្ត្រី​ទៀតឡើយ ដ្បិត​លោក ចង់​ផ្តល់ឱកាស​ឲ្យ​អ្នកមាន​សមត្ថភាព​ចូលមក​ដឹកនាំ​បន្ត​។ ចំណុច​នេះហើយ ដែល​លោក មានការ​ព្រួយបារម្ភ​នៅពេលដែល​មានការ​ផ្លាស់​ប្តូរ​បែបនេះ គណបក្ស​របស់លោក អាច​នឹងត្រូវ​ប្រឈម​កា​រ​បាត់បង់​ប្រជាប្រិយភាព​ឬ​យ៉ាងណា​៕ 

Tag:
 សិង្ហ​បុរី​
  អាស៊ាន
© រក្សាសិទ្ធិដោយ thmeythmey.com