រដ្ឋមន្ត្រីពាណិជ្ជកម្មអាមេរិក លោក Wilbur Ross អមដំណើរដោយក្រុមហ៊ុនធំៗរបស់អាមេរិកផងនោះ បានបំពេញទស្សនកិច្ចផ្លូវការទៅកាន់វៀតណាម ដើម្បីពង្រឹងចំណងមិត្តភាពទ្វេភាគី ក៏ដូចជាសិក្សា និងស្វែងរកឱកាសបន្ថែមសម្រាប់ការពង្រីកកិច្ចសហប្រតិបត្តិការពាណិជ្ជកម្មជាមួយនឹងរដ្ឋអាស៊ានដ៏សក្តានុពលមួយនេះ។
នាជំនួបជាមួយលោករដ្ឋមន្ត្រី Wilbur Ross ក្នុងរដ្ឋធានីហាណូយនៅថ្ងៃ៩ វិច្ឆិកា លោកនាយករដ្ឋមន្ត្រី វៀតណាម Nguyễn Xuân Phúc បានគូសបញ្ជាក់ពីការផ្តល់តម្លៃខ្ពស់របស់វៀតណាមលើកិច្ចសហប្រតិបត្តិការភាពជាដៃគូគ្រប់ជ្រុងជ្រោយជាមួយនឹងអាមេរិក ហើយវៀតណាម ក៏មានក្តីសង្ឃឹមមុតមាំថា ភាគីទាំងពីរអាចប្រែក្លាយចំណងសហប្រតិបត្តិការនេះឲ្យកាន់តែស៊ីជម្រៅបន្ថែមទៀត។
តាមការចុះផ្សាយរបស់សារព័ត៌មាន Vietnam News លោកនាយករដ្ឋមន្ត្រី បានកត់សម្គាល់ពីការវិវត្តន៍យ៉ាងល្អប្រសើរលើគ្រប់វិស័យក្នុងទំនាក់ទំនងទ្វេភាគីរវាងប្រទេសទាំងពីរ ជាពិសេសនោះលើវិស័យសេដ្ឋកិច្ច និងពាណិជ្ជកម្ម ដែលលោកនាយករដ្ឋមន្ត្រី ចាត់ទុកថា ជាសូចនាករដ៏សំខាន់ដែលធ្វើឲ្យទំនាក់ទំនងប្រទេសទាំងពីរកាន់តែកៀករកគ្នា។
ជាមួយនឹងការលើកឡើងពីការអភិវឌ្ឍក្នុងចំណងទ្វេភាគី លោកនាយករដ្ឋមន្ត្រីរូបនេះ ក៏បានសន្យាបង្កភាពងាយស្រួល និងបង្កើតលក្ខខណ្ឌពិសេសេដើម្បីលើកកម្ពស់កិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគជាមួយអាមេរិក និងបើកចំហទីផ្សារសម្រាប់ផលិតអាមេរិកផងដែរ។
ចំណុចគួរឲ្យកត់សម្គាល់នោះ លោកនាយករដ្ឋមន្ត្រី ក៏បានស្នើត្រង់ៗឲ្យអាមេរិក បញ្ជូនប្រតិភូពាណិជ្ជកម្មឲ្យបានច្រើនទៅកាន់វៀតណាម នៅពេលវៀតណាមត្រូវធ្វើជាម្ចាស់ផ្ទះ និងប្រធានអាស៊ានឆ្នាំ២០២០។ ប្រមុខរដ្ឋាភិបាលវៀតណាមស្នើបែបនេះ ដើម្បីជាឱកាសសម្រាប់វៀតណាម ក្នុងការស្វែងរក ដៃគូពីអាមេរិកបន្ថែម ដ្បិតវត្តមានរបស់ប្រតិភូអាមេរិក តែងតែមានអមជាមួយនឹងតំណាងក្រុមហ៊ុនធំៗលំដាប់ពិភពលោកជាមួយផងដែរ។
តបជាមួយនឹងការលើកឡើងរបស់វៀតណាម តាមប្រភពព័ត៌មានដដែលនោះ តំណាងជាន់ខ្ពស់របស់អាមេរិក បានអះអាងថា ប្រតិភូធុរកិច្ចអាមេរិក ដែលអមដំណើររូបលោករួមទាំងតំណាងក្រុមហ៊ុនធំៗក្នុងដំណើរទស្សនកិច្ចនេះ បានបង្ហាញចំណាប់អារម្មណ៍ខ្លាំងនៅក្នុងទីផ្សារវៀតណាម។
លោក Wilbur Ross បន្ថែមថា ភាគីអាមេរិក បានត្រៀមខ្លួនរួចជាស្រេចក្នុងការចូលរួមអភិវឌ្ឍវៀតណាម ហើយក៏សង្ឃឹមផងដែរថា រដ្ឋាភិបាលអាមេរិក នឹងបង្កភាពកាន់តែល្អប្រសើរលើបរិយាកាសធុរកិច្ច និងវិនិយោគ។ លោក អះអាងថា ក្រសួងពាណិជ្ជកម្មអាមេរិក បានរៀបចំផែនការក្នុងការរៀបចំបញ្ជូនប្រតិភូធុរកិច្ចដើម្បីបំពេញទស្សនកិច្ចនៅវៀតណាមក្នុងគោលដៅស្វែងរកឱកាសសម្រាប់ការធ្វើកិច្ចសហប្រតិប្តតិការលើវិស័យថាមពលនៅដើមឆ្នាំក្រោយ។
គួរជម្រាបថា វៀតណាម គឺជាដៃគូយុទ្ធសាស្ត្រដ៏ធំមួយរបស់អាមេរិកនៅក្នុងតំបន់អាស៊ីប៉ាស៊ីហ្វិក និងតំបន់អាស៊ីអាគ្នេយ៍។ ជាដៃគូយុទ្ធសាស្ត្រនឹងគ្នា អាមេរិក មិនត្រឹមតែជួយជ្រោមជ្រែងការអភិវឌ្ឍសេដ្ឋកិច្ចពាណិជ្ជកម្មប៉ុណ្ណោះនោះទេ តែក៏ជួយការពារវៀតណាមក្នុងវិស័យសន្តិសុខ និងការការពារពីការគំរាមកំហែងខាងក្រៅផងដែរ៕