អន្តរជាតិ
តួពាណិជ្ជកម្ម Marlboro ស្លាប់ក្នុងអាយុ៩០ឆ្នាំ តែលោកមិនដែលជក់បារីទាល់តែសោះ
×![]()
ដោយ: ធីតា
ក្រោមរហស្សនាមថា «Marlboro Man» លោក Robert Norris តួអង្គក្នុងពាណិជ្ជកម្មបារីម៉ាល់បូរ៉ូដំបូងគេ បានទទួលមរណភាពក្នុងអាយុ៩០ឆ្នាំ កាលពីថ្ងៃទី៣ ខែវិច្ឆិកា។ ទោះបីជាយ៉ាងណាក៏ដោយ មរណភាពរបស់បុរសអាមេរិករូបនេះ មិនមែនបណ្តាលមកពីបារីនោះទេ ពីព្រោះលោកមិនធ្លាប់មានប្រវត្តិជក់បារីទាល់តែសោះ។
នាឆ្នាំ១៩៥៥ ពេលដែលមានអាយុ២៦ឆ្នាំ លោក Robert Norris ត្រូវបានជ្រើសរើសថតជាតួ cow-boys សម្រាប់ការផ្សាយពាណិជ្ជកម្មបារីម៉ាល់បូរ៉ូ ជាមួយលោក John Wayne ដែលជាមិត្តភក្តិរបស់លោក។
ក្នុងបទសម្ភាសជាមួយទូរទស្សន៍ KKTV លោក Bobby Norris ដែលជាកូនប្រុសបានអះអាងថា ឪពុករបស់លោកមិនដែលមានប្រវត្តិជក់បារីម្តងណាឡើយ លើកលែងតែការសំដែងក្នុងពាណិជ្ជកម្ម កាលពីអំឡុងទសវត្សរ៍ឆ្នាំ១៩៥០ប៉ុណ្ណោះ។
ផ្ទាំងពាណិជ្ជកម្មដែលមានរូបលោក Robert Norris ជិះសេះជក់បារី ត្រូវបានផ្សព្វផ្សាយនៅតាមបណ្តាផ្លូវធំនានាក្នុងសហរដ្ឋអាមេរិក និងបណ្តាប្រទេសជាច្រើនទៀតនៅលើពិភពលោក។ ប៉ុន្តែ១៤ឆ្នាំ ក្រោយការថត លោក Robert បានសម្រេចចិត្តបញ្ឈប់យុទ្ធនាការផ្សព្វផ្សាយរបស់ខ្លួន ដោយសារតែលោកយល់ថា ខ្លួនបានផ្តល់គំរូមិនល្អសម្រាប់កូនៗ និងក្មេងដទៃទៀត៕
© រក្សាសិទ្ធិដោយ thmeythmey.com
