អន្តរជាតិ
ការី ឡាំ៖ បាតុកម្មនៅទីក្រុងហុងកុង គឺលើសពីការទាមទារលទ្ធិប្រជាធិបតេយ្យ
× លោកស្រីការី ឡាំ នៅថ្ងៃទី១១ ខែវិច្ឆិកា បានលើកឡើងថា បាតុករហុងកុង បានដើរហួសពីខ្សែបន្ទាត់ទាមទារលទ្ធិប្រជាធិបតេយ្យហើយ។ ទន្ទឹមនេះ ប្រធានប្រតិបត្តិទីក្រុងហុងកុងរូបនេះ បានចាត់ទុកក្រុមបាតុករថា គឺជា«សត្រូវរបស់ប្រជាជន»។ ការអះអាងរបស់លោកស្រីដូច្នេះ គឺបន្ទាប់ពីបាតុករម្នាក់ ត្រូវបានបាញ់ដោយមន្ត្រីប៉ូលិស និងបាតុករម្នាក់ទៀត ត្រូវបានគេចាក់សាំងដុត។
បន្ទាប់ពីស្ថានការណ៍នៅទីក្រុងហុងកុងកាន់តែធ្ងន់ធ្ងរ លោកស្រី ការី ឡាំ ប្រធានប្រតិបត្តិទីក្រុងហុងកុង បានចេញមុខ ព្រមានយ៉ាងច្បាស់ៗថា ប្រសិនបើបាតុករហុងកុងនៅតែគិតចង់បានអ្វី តាមរយៈការប្រើប្រាស់អំពើហិង្សាទៀត ប្រាកដណាស់ថា រដ្ឋាភិបាលតំបន់រដ្ឋបាលពិសេសហុងកុង(SAR) នឹងចាត់វិធានការ និងដាក់សម្ពាធទប់ស្កាត់សកម្មភាពទាំងនេះ។ លោកស្រីបានបន្តថា ពេលនោះបាតុកម្ម នឹងមិនមានទៀតឡើយនាពេលអនាគត។ នេះបើតាមសេចក្តីប្រកាសរបស់លោកស្រីការី ឡាំ តាមកញ្ចក់ទូរទស្សន៍។
អស់ពីប្រកាសចាត់វិធានការលើក្រុមបាតុករ លោកស្រីប្រធានប្រតិបត្តិ បានចាត់ទុក ទង្វើរបស់ក្រុមបាតុការថា លើសពីការទាមទារលទ្ធិប្រជាធិបតេយ្យ និង ជា«សត្រូវរបស់ប្រជាជន»។ ការអះអាងបែបនេះ គឺធ្វើឡើងតែប៉ុន្មានម៉ោងក្រោយតែប៉ុណ្ណោះ បន្ទាប់ពីប៉ូលិស បានបាញ់គ្រាប់ពិតលើបាតុករមួយរូប ខណៈបាតុករមួយរូបទៀត ត្រូវបានបុរសម្នាក់ ចាក់សាំងដុត។
ដោយសារតែវិបត្តិខាងលើ នាថ្ងៃទី១២ ខែវិច្ឆិកា សេវារថភ្លើង និងផ្លូវមួយចំនួន ត្រូវបានផ្អាកដំណើរការបណ្តោះអាសន្ន ដែលបង្កឲ្យមានការកកស្ទះចរាចរណ៍យ៉ាងខ្លាំង។ ប៉ូលិលបង្ក្រាបបាតុកម្ម ត្រូវបានបញ្ចូនទៅស្ថានីយរថភ្លើងក្រោមដី និងប៉ូលីសជាច្រើននាក់ទៀត មានវត្តមាននៅស្ថានីយរថភ្លើង។ ការណ៍នេះ បង្កឲ្យមានភាពមិនពេញចិត្តជាខ្លាំងពីសំណាក់អ្នកដំណើរ ដែលត្រូវធ្វើការនៅកណ្តាលទីក្រុង និងកន្លែងផ្សេងទៀត។ នេះបើតាមការចុះផ្សាយរបស់ទីភ្នាក់ងារព័ត៌មានReuters។
មិនត្រឹមមធ្យោបាយធ្វើដំណើរត្រូវបានផ្អាកទេ សូម្បីតែសកលវិទ្យាល័យ និងសាលារៀន ក៏បានលុបចោលការបង្រៀនដែរ ដោយសារតែក្រុមប៉ូលិលបានបាញ់ឧស្ម័នបង្ហូរទឹកភ្នែក បង្ក្រាបទៅលើក្រុមនិស្សិត ដែលបានចោលដបសាំងលើអាគារសាលារៀន។ គិតមកទល់ពេលនេះ បាតុកម្មនៅទីក្រុងហុង គឺមានរយៈពេលច្រើនជាង៥ខែមកហើយ។ ជាពិសេស មនុស្សច្រើនជាង ៣ពាន់នាក់ ត្រូវបានប៉ូលីសចាប់ខ្លួន បើគិតចាប់ពីខែមិថុនាមក។
© រក្សាសិទ្ធិដោយ thmeythmey.com