អចលនទ្រព្យ
អត្ថបទពាណិជ្ជកម្ម
អ្នកជំនាញ៖ ការខ្ចីលុយធនាគារទៅបង់រំលស់ដីឡូត៍ទុកចោល អាចប្រឈមហានិភ័យខ្ពស់
×![]()
ដោយ: ថ្មីៗ
អ្នកជំនាញក្នុងវិស័យអចលនទ្រព្យបានសង្កត់ធ្ងន់ថា នាប៉ុន្មានឆ្នាំចុងក្រោយនេះ សកម្មភាពពុះដីឡូត៍ បានបន្តរីករាលដាលខ្លាំងឡើងៗនៅតំបន់ជាយក្រុង និងតាមបណ្តាខេត្តជាច្រើនសកម្មភាពពុះដីឡូត៍ទាំងនោះទៀតសោត កំពុងតែផ្សព្វផ្សាយយ៉ាងខ្លាំង និងក៏មានតម្រូវការទិញច្រើនទៀតផងដែរ។
ស្របពេលចលនានៃការទិញដីឡូត៍ និងពុះដីឡូត៍លក់ កើតមានស្ទើរគ្រប់ទីកន្លែងបែបនេះ បានជំរុញឱ្យប្រជាពលរដ្ឋមួយចំនួន សម្រេចចិត្តទាំងប្រថុយប្រថាន ដោយមិនបានស្វែងយល់ពីគម្រោងអភិវឌ្ឍន៍ ដីឡូត៍បានច្បាស់ ហើយទៅខ្ចីពីធនាគារទៅបង់រំលស់ដីឡូត៍ អាចនឹងមានហានិភ័យ នៅថ្ងៃក្រោយ។
ទន្ទឹមនឹងសកម្មភាពនៃការវិនិយោគនេះ លោក សៀ ឬទ្ធី ជាស្ថាបនិក ជាប្រធានក្រុមហ៊ុន Worldbridge Group និងជាសហគ្រិនជោគជ័យមួយរូប ក្នុងវិស័យអចលនទ្រព្យនៅកម្ពុជា បង្ហាញក្តីព្រួយបារម្ភ ខណៈប្រជាពលរដ្ឋខ្មែរភាគច្រើន កំពុងចាប់អារម្មណ៍សន្សំលុយ ឬខ្ចីបុល បង់រំលស់ក្នុងរូបភាពផ្សេងៗ សម្រាប់ទិញដូរដីធ្លី ហើយទុកចោល ដោយមិនព្រមវិនិយោគ លើអាជីវកម្មណាមួយនោះ។
លោកបានផ្តល់អនុសាសន៍ថា ចំពោះអ្នកមានសមត្ថភាព និងធនធានស្រាប់ ហើយចង់ទិញអចលនទ្រព្យ ដែលអាចទាញយកផលចំណេញពីអចលនទ្រព្យនោះបាន លោកលើកទឹកចិត្តឱ្យខ្ចីធនាគារបង់រំលស់អចលនទ្រព្យនោះ ព្រោះម្ចាស់អាជីវកម្ម អាចមានប្រាក់ចំណេញពីការជួល ដើម្បីបង់រំលស់ជាមួយធនាគារស្រាប់។
ប៉ុន្តែសម្រាប់ អ្នកដែលមិនមានធនធាន ហើយទៅខ្ចីបុលពីធនាគារ មកបង់រំលស់ដីឡូត៍ បែរជាទុកដីនោះចោល មិនព្រមអភិវឌ្ឍន៍ដើម្បីទាញប្រយោជន៍ពីដីនោះ លោកថា មិនគួរខ្ចីបុលធនាគារនោះឡើយ។ លោកពន្យល់ថា ការធ្វើបែបនេះ អ្នកទិញអាចប្រឈមនឹងបញ្ហាសាច់ប្រាក់បង់រំលស់ មានរយៈពេលវែង ខណៈម្ចាស់ដីឡូត៍ មិនបានអភិវឌ្ឍន៍ហេដ្ឋារចនាសម្ព័ន្ធនៅតំបន់នោះ ឱ្យបានគ្រប់គ្រាន់នៅឡើយ។
លោកបន្តទៀតថា៖«ដោយសារតែចង់ពុះដីឡូត៍លក់បានច្រើន និងយកចំណេញ អ្នកវិនិយោគ ពុះដីឡូត៍លក់មួយចំនួនតែងតែឲ្យអតិថិជន បង់ប្រាក់នៅក្រុមហ៊ុនរបស់ខ្លួន ដោយគ្មានការប្រាក់។ លោកចាត់ទុកថា នេះជាចំណុចហានិភ័យមួយ ព្រោះទី១ ការទូទាត់បែបនេះមិនមានច្បាប់ណាមួយគ្រប់គ្រងឡើយ។ ទី២ ការបង់រំលស់បែបនេះ ក្រុមហ៊ុនអាចប្រមូលបានប្រាក់ហើយរត់ និងមិនទទួលខុសត្រូវ។ ម្យ៉ាងប្រព័ន្ធបង់ប្រាក់បែបនេះ ជាការទូទាត់ខុសច្បាប់»។
នៅក្នុងឆ្នាំ២០១៨នេះ ក្រសួងរៀបចំដែនដី នគរូបនីយកម្ម និងសំណង់ ធ្លាប់បានប្រកាសចាត់ វិធានការទៅលើគម្រោងពុះដីឡូត៍លក់ ដែលមិនមានលិខិតអនុញ្ញាត និងពង្រឹងការសាងសង់ គុណភាព និងសុវត្ថិភាពនៅក្នុងវិស័យសំណង់ នៅគ្រប់ការដ្ឋានសំណង់ទាំងអស់ [ទាំងគម្រោងលំនៅដ្ឋាន និងគម្រោងដីឡូត៍] ដើម្បីធានាការអភិវឌ្ឍវិស័យសំណង់ប្រកបដោយចីរភាព និងដើម្បីចៀសវាងការទិញលក់ដីឡូត៍ ដែលខុសច្បាប់។
ទោះយ៉ាងណាក៏ដោយ អ្នកជំនាញអចលនទ្រព្យ នៅតែដាស់តឿនទៅកាន់ពលរដ្ឋថា មុននឹងសម្រេចចិត្តខ្ចីបុលធនាគារទៅទិញដីឡូត៍ ចាំបាច់គួរសិក្សាស្វែងយល់បន្ថែម អំពីឱកាស និងបញ្ហាប្រឈម ទៅថ្ងៃអនាគតខាងមុខ។ លើសពីនេះ ក៏ត្រូវពិនិត្យមើលទិដ្ឋភាពផ្លូវច្បាប់ ប្លង់កម្មសិទ្ធិត្រឹមត្រូវ ហេដ្ឋារចនាសម្ព័ន្ធ ទិដ្ឋភាពសង្គម និងទិដ្ឋភាពសេដ្ឋកិច្ចប្រទេសជារឿងចាំបាច់៕
© រក្សាសិទ្ធិដោយ thmeythmey.com
