កីឡាអន្តរជាតិ
អន្តរជាតិ
Lampard ចេញច្បាប់ថ្មី៖ កីឡាករមកហាត់យឺតពិន័យ២៥០០០ដុល្លារ …
× លោក Frank Lampard អ្នកចាត់ការទូទៅ Chelsea ថ្មីៗនេះ បានបង្កើតច្បាប់ថ្មីចំនួន១២ចំណុតដ៏គួរឲ្យភ្ញាក់ផ្អើលមិនធ្លាប់មានដើម្បីដាក់ពិន័យលើកីឡាករខ្លួន។ ច្បាប់ថ្មីនោះរួមមាន ការដាក់ពិន័យលើកីឡារូបណាដែលមកហ្វឹកហាត់យឺតយ៉ាវជាទឹកប្រាក់២៥០០០ដុល្លារអាមេរិក ហើយអ្នកចូលប្រជុំយឺត ៦៤០ដុល្លារ ក្នុង១នាទី ទូរសព្ទរោទ៍ពេលប្រជុំត្រូវពិន័យចំនួន ១៣០០ដុល្លារ និងផ្សេងៗទៀត។
វិន័យយ៉ាងតឹងរ៉ឹងរបស់លោក Lampard នេះបានប្រកាសបរិច្ឆេតចាប់តាំងពីថ្ងៃទី២៧ ខែសីហា ពោលគឺនៅពេលលោកឡើងទៅដឹកនាំក្រុមតោខៀវនៅដើមរដូវកាល២០១៩-២០នេះ។ ច្បាប់វិន័យរបស់លោក ក៏ត្រូវបានធ្វើជាបញ្ជីដាក់ស៊ុំត្រឹមត្រូវហើយព្យួរនឹងជញ្ជាំងដើម្បីកីឡាកងាយស្រួលមើលផងដែរ។
ការដាក់ពិន័យលើកីឡាករដែលមកហ្វឹកហាត់យឺត ចូលប្រជុំយឺត ទូរសព្ទរោទ៍ដោយគ្មានការអនុញ្ញាត គឺស្ថិតក្នុងចំណោមច្បាប់វិន័យទាំង១២ចំណុច ដែលអ្នកចាត់ការសញ្ជាតិអង់គ្លេស វ័យ៤១ឆ្នាំបានចែងដោយខ្លួនឯង។ បម្រាមទាំង១២ចំណុច សុទ្ធសឹងពិន័យជាប្រាក់ទាំងអស់។
ការបង់ថ្លៃពិន័យសម្រាប់កីឡាករដែលធ្វើខុស នឹងធ្វើឡើងក្នុងរង្វង់១៤ថ្ងៃ ប៉ុន្តែបើលើសកាលបរិច្ឆេតត្រូវបង់គុណនឹងពីរ។
Lampard ការដាក់វិន័យទៅលើកីឡាករខ្លួនបែបនេះ ពិតជាបានធ្វើឲ្យ Chelsea ទទួលបានលិទ្ធផលល្អ ស្របពេលដែលក្រុមខ្លួនជួបវិបត្តិមិនអាចទិញកីឡាករថ្មីចូលថែមពេញមួយរដូវកាល។ ដើមឡើយគេគិតថា នេះជារដូវកាលដ៏លំបាកសម្រាប់លោកក្នុងនាមជាអ្នកចាត់ការ ស្របពេលតោខៀវ កំពុងជួបបញ្ហាក្រោយលក់កីឡាករឆ្នើមរបស់ខ្លួន Eden Harzad ទៅឲ្យ Real Madrid ខ្សែប្រយុទ្ធ Alvaro Morata ទៅ AT-Madrid ហើយត្រូវសហព័ន្ធកីឡាបាល់ទាត់អឺរ៉ុបពិន័យមិនឲ្យទិញកីឡាករចូលថែមទៀត។
យ៉ាងណាក៏ដោយ បញ្ហាទាំងអស់នេះមិនបានបង្អាក់ដំណើរ Chelsea ដើម្បីប្រជែងពាន Premier League និង Champions Leageu រដូវកាលនេះឡើយ។ កីឡាករក្មេងៗបានបង្ហាញរបៀបលេងដ៏ល្អប្រសើរឲ្យក្រុមលោក Lampard ដោយក្នុងនោះពួកគេបានឈ្នះ៨ប្រកួតជាប់ៗគ្នា។
ឆ្លងកាត់ការប្រកួត១២លើកក្នុងលីគកំពូលអង់គ្លេស លោក Lampard បានជួយ Chelsea ឈរចំណាត់ថ្នាក់ទី៣ ដោយរកបាន២៦ពិន្ទុ ស្មើគ្នាជាមួយ Leicester City ដែលនៅលេខពីរ ដ្បិតចាញ់គ្រាប់ស៊ុត ហើយតាមពីក្រោយក្រុមកំពូលតារាង Liverpool ចំនួន៨ពិន្ទុ។
ចំណែក ក្នុងក្របខណ្ឌលីគកំពូលអឺរ៉ុប តោខៀវនៅចំណាត់ថ្នាក់ទី២ពូល H មាន៧ពិន្ទុស្មើជាមួយ Ajax ដែលនៅកំពូលតារាង និង Valencia ដែលឈរលេខ៣៕
Tag:
Frank Lampard
Chelsea
© រក្សាសិទ្ធិដោយ thmeythmey.com