គ្រូបង្វឹកក្រុមជម្រើសជាតិកម្ពុជាលោក Felix Dalmas ចាត់ទុកជំនួបមិត្តភាពអន្តរជាតិជាមួយម៉ុងហ្គោលី ដែលរៀបចំនៅថ្ងៃទី១៤ ខែវិច្ឆិកា ឆ្នាំ២០១៩ នាពហុកីឡដ្ឋានជាតិថា ជាការត្រៀមខ្លួនមួយដ៏ល្អមុនជំនួបជាមួយហុងកុងក្នុងវគ្គជម្រុះ World Cup។ ជំនួបមិត្តភាពនេះ ក៏ជាការបន្ស៊ាំខ្លួន និងពង្រឹងសមត្ថភាពសម្រាប់ក្រុមម៉ុងហ្គោលី ដើម្បីតទល់ជាមួយមីយ៉ាន់ម៉ា នាជំនួបជើងទី២ក្នុងវគ្គជម្រុះនេះផងដែរ។ នេះបើតាមការអះអាងរបស់គ្រូបង្វឹកក្រុមជម្រើសជាតិម៉ុងហ្គោលី។ ទាំងគ្រូបង្វឹកកម្ពុជា និងម៉ុងហ្គោលីសុទ្ធតែអះអាងថា ជំនួបមិត្តភាពនេះនឹងក្លាយជាការប្រកួតដ៏តានតឹង និងទាក់ទាញសម្រាប់ទស្សនិកជន។
ក្រុមជម្រើសជាតិកម្ពុជាក្រោមការដឹកនាំរបស់អ្នកចាត់ការទូទៅ Keisuke Honda និងគ្រូបង្វឹក Felix Dalmas នឹងត្រូវប្រជែងជាមួយហុងកុង នាជំនួបជើងទី២ពូល C នៃវគ្គជម្រុះ FIFA World Cup នៅថ្ងៃទី១៩ ខែវិច្ឆិកា ឆ្នាំ២០១៩ នៅលើទឹកដីហុងកុង។ បច្ចុប្បន្នក្រុមកីឡាករកម្ពុជាកំពុងហ្វឹកហាត់ពង្រឹងសមត្ថភាពយ៉ាងសកម្មនៅទីលានមួយចំនួនក្នុងរាជធានីភ្នំពេញ។ នាជំនួបជើងទី១នៅពហុកីឡដ្ឋានជាតិកាលពីថ្ងៃទី៥ ខែកញ្ញា ក្រុមទាំងពីរបានបញ្ចប់ក្នុងលទ្ធផលស្មើ ១-១។
មុនការប្រកួតផ្លូវការឈានមកដល់ ក្រុមរហស្សនាមគោព្រៃកម្ពុជាមួយនេះ ត្រូវតទល់ជាមួយក្រុមកីឡាករជម្រើសជាតិម៉ុងហ្គោលី ក្នុងជំនួបមិត្តភាពអន្តរជាតិនៅថ្ងៃទី១៤ ខែវិច្ឆិកា ឆ្នាំ២០១៩ នាពហុកីឡដ្ឋានជាតិ។ វាជាការប្រកួតដកស្រង់បទពិសោធក៏ពិតមែន តែជាឱកាសដ៏ល្អសម្រាប់កម្ពុជា ក្នុងការសិក្សាពីចំណុចខ្វះខាត ដើម្បីអភិវឌ្ឍន៍ឲ្យកាន់តែប្រសើរសម្រាប់ត្រៀមការប្រកួតផ្លូវការ។
នាសន្និសីទសារព័ត៌មានមុនការប្រកួតនៅថ្ងៃទី១៣ វិច្ឆិកា លោក Felix Dalmas ចាត់ទុកការប្រកួតជាមួយម៉ុងហ្គោលី ជាឱកាសដើម្បីវាស់ស្ទង់សមត្ថភាពកីឡាករ និងស្វែងរកទម្រង់លេងមួយដ៏ល្អ សម្រាប់តទល់ជាមួយហុងកុង ដែលកម្ពុជាឈ្នះជាដាច់ខាតក្នុងការប្រជែងកៅអីឡើងទៅវគ្គបន្ត នៃព្រឹត្តិការណ៍ World Cup។ លើសពីនេះ វាក៏ជាឱកាសតេស្តសមត្ថភាពកីឡាករ សម្រាប់ត្រៀមការប្រកួតកីឡាស៊ីហ្គេមលើកទី៣០នៅហ្វីលីពីនឆ្នាំនេះផងដែរ។ ដ្បិតលោក Felix នឹងផ្តល់ឱកាសឲ្យកីឡាករ ដែលត្រៀមស៊ីហ្គេមមួយចំនួនបានបង្ហាញសមត្ថភាពក្នុងការប្រកួតមួយនេះ។
«ជំនួបជាម៉ុងហ្គោលីជាការប្រកួតត្រៀមខ្លួនដ៏ល្អមួយមុនជំនួបជាមួយហុងកុង។ ការត្រៀមខ្លួនរបស់យើងលើកនេះខុសប្លែកពីមុនបន្តិច ដោយសារលើកនេះ យើងប្រមូលផ្តុំហ្វឹកហាត់ចូលគ្នាជាមួយក្រុមត្រៀមសម្រាប់ស៊ីហ្គេម។ យើងមានកីឡាករសរុប៣៥រូប ហើយការហ្វឹកហាត់ចែកចេញជាពីរលក្ខខណ្ឌផ្សេងគ្នា តែយ៉ាងណាការហ្វឹកហាត់មកទល់ពេលនេះ គឺរលូន ហើយកីឡាករម្នាក់ៗខិតខំប្រឹងប្រែងរៀងៗខ្លួន ក្នុងការប្រជែងដណ្តើមកៅអី»។ នេះជាការលើកឡើងរបស់លោក Felix Dalmas។
លោក Michael Weiss គ្រូបង្វឹកក្រុមជម្រើសជាតិម៉ុងហ្គោលី ក៏មិនខុសគ្នាពីលោក Felix Dalmas ដែរ ដោយលោកចាត់ទុកការប្រកួតមិត្តភាពនៅថ្ងៃទី១៤ វិច្ឆិកា ជាជំនួបដ៏សំខាន់សម្រាប់ក្រុមលោកក្នុងការត្រៀមខ្លួនសម្រាប់វគ្គជម្រុះ World Cup។ ក្រុមម៉ុងហ្គោលីនឹងធ្វើដំណើរទៅជួបម្ចាស់ផ្ទះមីយ៉ាន់ម៉ានៅថ្ងៃទី១៩ ខែវិច្ឆិកា ឆ្នាំ២០១៩ ខណៈកាលជើងទី១លើទឹកដីខ្លួន ពួកគេបានយកឈ្នះមីយ៉ាន់ម៉ាក្នុងលទ្ធផល ១-០។
«ការប្រកួតនៅថ្ងៃស្អែក(ព្រហស្បតិ៍)គឺសំខាន់ណាស់សម្រាប់ពួកគេ ព្រោះយើងចង់ឲ្យកីឡាកររបស់យើងស៊ាំជាមួយអាកាសធាតុព្រោះនៅម៉ុងហ្គោលីអាកាសធាតុត្រជាក់រហូតដល់ក្រោម២០អង្សារ។ ម្យ៉ាងទៀតយើងចង់កីឡាករស៊ាំជាមួយទីលានធំ ដែលមានអ្នកគាំទ្រច្រើន»។ គ្រូបង្វឹកជនជាតិអាល្លឺម៉ង់រូបនេះ លើកឡើងដូច្នេះក្នុងសន្និសីទសារព័ត៌មានមុនការប្រកួតនៅថ្ងៃទី១៣ វិច្ឆិកា។
ជំនួបមិត្តភាពអន្តរជាតិរវាងក្រុមម៉ុងហ្គោលីជាមួយកម្ពុជា ដែលធ្វើឡើងនៅម៉ោង៦:៣០នាទីល្ងាចថ្ងៃទី១៤ វិច្ឆិកា នឹងក្លាយជាការប្រកួតដ៏តានតឹង និងមានភាពទាក់ទាញខ្លាំងសម្រាប់ទស្សនិកជន។ នេះជាការបង្ហាញក្តីរំពឹងរបស់គ្រូបង្វឹកទាំងពីរ ដែលរំពឹងថា ការប្រកួតនេះនឹងទាក់ទាញអ្នកគាំទ្រយ៉ាងច្រើនកុះករ ចូលរួមទស្សនា៕