អត្ថបទ៖ ស៊ីធី
កីឡាការិនីថៃ Stamp Fairtex នៅតែចិញ្ចឹមចិត្តដណ្ដើមយកខ្សែក្រវាត់មួយទៀតពីកម្មវិធីប្រកួតគុនចម្រុះ បន្ថែមលើខ្សែក្រវាត់ ONE Championship Kickboxing Atomweight World Champion និងONE Championship Muay Thai Atomweight World Champion របស់ខ្លួនដែលមានស្រាប់នាពេលបច្ចុប្បន្ន។ កាលថ្ងៃទី ៨ វិច្ឆិកា Stamp Fairtex បានឈ្នះពិន្ទុជាឯកច្ឆន្ទលើកីឡាការិនីកូនកាត់វៀតណាមអាមេរិក Bi Nguyen នៅក្នុងកម្មវិធី ONE: MASTERS OF FATE នាសង្វៀន Mall Of Asia Arena នៅក្រុងម៉ានីលប្រទេសហ្វីលីពីន។
ការអន្ទះសាចង់បានខ្សែក្រវាត់ក្នុងកម្មវិធីប្រកួតគុនចម្រុះបន្ទាប់ពី Stamp Fairtex ឈ្នះ Bi Nguyen ឈ្នះ និង ការពារខ្សែក្រវាត់ ONE Championship Muay Thai Atomweight World Title បានសម្រេចទល់កីឡាការិនីជើងខ្លាំងអូស្ត្រាលី Alma Juniku កាលខែ មិថុនា ឆ្នាំ ២០១៩ កន្លងទៅ។ កីឡាការិនីវ័យ ២០ ឆ្នាំបានគ្រងខ្សែក្រវាត់ Kickboxing Atomweight World Champion ក្រោយឈ្នះកីឡាការិនីឆាយនីសតាយប៉ិ Kai Ting Chuang កាលឆ្នាំ ២០១៨ និង គ្រងខ្សែក្រវាត់ ONE Atomweight Muay Thai World Title ពេលឈ្នះកីឡាការិនីអាមេរិក Janet Todd កាលខែកុម្ភៈ ឆ្នាំ ២០១៩។
Stamp Fairtex បានគូសបញ្ជាក់ថា៖«គោលដៅរបស់ខ្ញុំ គឺ ឈ្នះខ្សែក្រវាត់ ONE Women’s Atomweight World Title ក្នុងការប្រកួតក្បាច់គុនចម្រុះ»។ កីឡាការិនីមកពី Pattaya បានប្រើក្បាច់គុនមួយថៃ និង Kickboxing បានយ៉ាងល្អ មុនចូលប្រឡូកចូលក្នុងពិភពគុនចម្រុះ និង ឈ្នះ Bi Nguyen កាលថ្ងៃទី ៨ វិច្ឆិកា។
កីឡាការិនិដដែលរៀបរាប់ថា ៖«ខ្ញុំមិនបានប្រកួតមួយថៃជាងមួយឆ្នាំមកហើយ ប៉ុន្តែមិនជាបញ្ហានោះឡើយ។ ខ្ញុំមានអារម្មណ៍ ខ្ញុំអាចផ្លាស់ប្ដូរបានងាយស្រួលចំពោះក្បាច់គុនទាំងនេះ»។ កូនសិស្សមកពីក្លិបប្រដាល់ Fairtex Training Center អាចសម្របខ្លួនបានល្អទាំង ៣ ក្បាច់គុនជាពិសេសជ័យជម្នះថ្មីៗនេះក្នុងការប្ដូរមកប្រកួតក្បាច់គុនចម្រុះនៅសង្វៀន ONE:MASTERS OF FATE។
បែបណាក្ដី Stamp បានបន្តថា៖«ខ្ញុំចង់ឈ្នះខ្សែក្រវាត់ពិភពលោកពីក្បាច់គុនចម្រុះ។ ខ្ញុំស្រលាញ់គុនចម្រុះនាពេលនេះ។ ខ្ញុំហ្វឹកហាត់ឲ្យល្អដើម្បីដណ្ដើមខ្សែក្រវាត់ពិភពលោក និង ឈានរកកម្រិតខ្ពស់ថែមទៀត។ ខ្ញុំគ្រាន់តែប្ដូរតិចតួចព្រោះខ្ញុំមានកណ្ដាប់ដៃ និង ទាត់ជើងល្អស្រេចទៅហើយ»។
Stamp កំពុងស្ថិតនៅជាកីឡាការិនីកំពូលម្នាក់សម្រាប់សង្វៀនលំដាប់ពិភពលោក ONE Championship ហើយប្រកួតម្ដងៗតែងតែគាបសង្កត់លើគូប្រកួតនិងល្អមើលសម្រាប់អ្នកគាំទ្រ។ Stamp ទើបតែមានកំណត់ត្រាប្រកួតអាជីពគុនចម្រុះចម្រុះចំនួន ២ លើករហូតដល់ពេលនេះប៉ុន្តែអាចឈ្នះទាំងពីរលើក។ វាពិតជាមិនមានមន្ទិលសង្ស័យឡើយ ព្រោះ Stamp មានជំនាញធ្វើឲ្យដៃគូលំបាកទប់ទល់គ្រប់ពេល។
ជើងឯកពិភពលោកពីរស្ថាប័នថ្លែងទៀតថា៖«ខ្ញុំតែងតែមានភាពសប្បាយរីករាយពេលខ្ញុំឡើងប្រកួត។ នេះជាអ្វីដែលខ្ញុំចង់ធ្វើ។ ខ្ញុំអាចប្រកួតក្នុងក្បាច់គុនផ្សេងៗ។ ខ្ញុំត្រៀមរួចរាល់សម្រាប់ការប្រកួតគុនចម្រុះជាបន្តបន្ទាប់ទៀត។ នៅពេល ONE ផ្ដល់ឱកាសឲ្យខ្ញុំ មិនថា kickboxing ឬ មួយថៃទេ។ ខ្ញុំរៀបចំខ្លួនរួចរាល់ជានិច្ច»។
កម្មវិធីបន្ទាប់ សូមកុំភ្លេចទស្សនាកម្មវិធីប្រកួតបន្ទាប់នៅ ONE: AGE OF DRAGONSនៅ ថ្ងៃ ទី ១៦ វិច្ឆិកា ខាងមុខ ពីប៉េកាំង ចាប់ពីម៉ោង ៦ ល្ងាច តទៅ (ម៉ោងកម្ពុជា) តាមរយៈ Facebook, Twitter, YouTube, ONE Super App, និង ផ្សាយបន្តផ្ទាល់ដោយ CBS៕