កីឡាជាតិ
ជាតិ
U-19 កម្ពុជាទទួលបានប្រាក់រង្វាន់ម្នាក់៤លានរៀល ក្រោយធ្វើបានល្អនៅវគ្គជម្រុះ AFC U-19
រូបភាពពីផេកហ្វេសប៊ុកសហព័ន្ធកីឡាបាល់ទាត់កម្ពុជា FFC
×![]()
ដោយ: ទេព ពិទូរ្យ
ក្រុមកីឡាបាល់ទាត់ជម្រើសជាតិកម្ពុជាក្រោមអាយុ ១៩ឆ្នាំ ទទួលបានប្រាក់លើកទឹកចិត្តក្នុងម្នាក់៤លានរៀលពីប្រធានសហព័ន្ធកីឡាបាល់ទាត់កម្ពុជា (FFC) លោកសៅ សុខា។ ការផ្តល់ប្រាក់រង្វាន់នេះ បន្ទាប់ពី U19 កម្ពុជា បានបង្ហាញខ្លួនយ៉ាងល្អក្នុងការប្រកួតជម្រុះ AFC U-19 Championship 2020 ដោយទទួលបានចំណាត់ថ្នាក់ទី២ ពូល G។ នេះបើតាមការប្រកាសរបស់ FFC តាមរយៈផេកហ្វេសប៊ុកផ្លូវការរបស់ខ្លួននៅព្រឹកថ្ងៃទី១៤ ខែវិច្ឆិកានេះ ដោយបង្ហាញការចំណាយសរុបជាទឹកប្រាក់ចំនួន ១២៨លានរៀល។
U19 កម្ពុជា បានធ្វើជាម្ចាស់ផ្ទះសម្រាប់ការប្រកួតជម្រុះពូល G ដោយបញ្ចប់ក្នុងចំណាត់ថ្នាក់លេខ២ ខណៈម៉ាឡេស៊ី ដែលឈ្នះទាំង៤ប្រកួត ទទួលបានកៅអីទៅវគ្គបន្តដោយស្វ័យប្រវត្តិ។ ដោយសារពូល G មាន៥ក្រុម លទ្ធផលនៃជំនួបជាមួយកោះម៉ារីយ៉ាណា ដែលជាក្រុមបាតតារាង មិនត្រូវបានរាប់បញ្ចូលឡើយ សម្រាប់ការប្រៀបធៀបក្រុមលេខ២ល្អបំផុតជាមួយ១០ពូលទៀត។
ការប្រកួតចំនួន៤លើករបស់កម្ពុជាក្រោមការដឹកនាំរបស់គ្រូបង្វឹកជប៉ុន Koji Gyotoku នៅក្នុងពូល G គឺចាញ់ម៉ាឡេស៊ី ៥-៤ ឈ្នះកោះម៉ារីយ៉ាណា ៩-០ ឈ្នះថៃ ២-១ និងឈ្នះព្រុយណេ ៣-០ ដោយទទួលបានចំណាត់ថ្នាក់លេខ២។ រីឯការប្រៀបធៀបចំណាត់ថ្នាក់លេខ២វិញ គឺកម្ពុជា មាន៦ពិន្ទុ (+៣) ផ្អែកលើលទ្ធផលឈ្នះថៃ ព្រុយណេ និងចាញ់ម៉ាឡេស៊ី។
ព្រឹត្តិការណ៍នេះ មានក្រុមចំនួន៤៦ចូលរួម ដោយចែកជា១១ពូល។ លេខ១នៃពូលនីមួយៗ ត្រូវឡើងទៅវគ្គបន្តជាមួយម្ចាស់ផ្ទះ អ៊ូសបេគីស្ថាន ដែលត្រូវរៀបចំការប្រកួតនៅឆ្នាំ២០២០រួមជាមួយក្រុមលេខ២ល្អជាងចំនួន៤ក្រុមទៀត។ ក្នុងករណី អ៊ូសបេគីស្ថានឡើងទៅវគ្គបន្តដោយសារការប្រកួតជម្រុះនេះ ក្រុមលេខ២ល្អ នឹងឡើងដល់ទៅចំនួន៥ក្រុម។
ឡាវ វៀតណាម យេម៉ែន និងអ៊ូសបេគីស្ថាន ជាក្រុមលេខ២ល្អបំផុតដែលទទួលបានកៅអីទៅវគ្គបន្ត រីឯកម្ពុជាឈរនៅលេខរៀងទី៥ជាបណ្តោះអាសន្ន ដោយរង់ចាំមើលលទ្ធផលនៃការប្រកួតនៅក្នុងពូល A ដែលត្រូវបានផ្លាស់ប្តូរទីកន្លែងប្រកួតពីអ៊ីរ៉ាក់ ទៅអូម៉ង់។ ដំបូងឡើយ អ៊ីរ៉ាក់ត្រូវធ្វើជាម្ចាស់ផ្ទះតាមកម្មវិធីប្រកួតដូចពូលដទៃ ប៉ុន្តែក្រោយចលនាបាតុកម្មនយោបាយនៅអ៊ីរ៉ាក់ ការប្រកួតត្រូវបានប្តូរទៅកាន់ទឹកដី អូម៉ង់វិញ ដែលប្រព្រឹត្តទៅចន្លោះពីថ្ងៃទី២២ ដល់ថ្ងៃទី៣០ ខែវិច្ឆិកា។
ក្រុមនៅក្នុងពូល A រួមមាន អ៊ីរ៉ាក់ អូម៉ង់ ប៉ាឡេស្ទីន គូវ៉ែត និងប៉ាគីស្ថាន។ ក្រុមលេខ១ នឹងឡើងទៅវគ្គបន្ត ខណៈក្រុមលេខ២ នឹងត្រូវយកទៅប្រៀបធៀបជាមួយកម្ពុជា។ ដោយសារពូលនេះ មាន៥ក្រុម ដូច្នេះលទ្ធផលជាមួយក្រុមបាតតារាង នឹងមិនត្រូវរាប់បញ្ចូលឡើយសម្រាប់តំណែងក្រុមលេខ២ល្អបំផុត។
ក្រុមដែលឡើងទៅរង់ចាំនៅជុំចុងក្រោយរួមមាន ក្រុមលេខ១ក្នុងពូលនីមួយៗ ដូចជា កាតា (ពូល B), តាហ្ស៊ីគីស្ថាន (ពូល C), អ៊ីរ៉ង់ (ពូល D), បារ៉ែន (ពូល E), អារ៉ាប៊ីសាអូឌីត (ពូល F), ម៉ាឡេស៊ី (ពូល G), អូស្ត្រាលី (ពូល H), កូរ៉េខាងត្បូង (ពូល I), ជប៉ុន (ពូល J), ឥណ្ឌូណេស៊ី (ពូល K)។ ឡាវ វៀតណាម យ៉េមែន និងអ៊ូសបេគីស្ថាន ជាក្រុមលេខ២ល្អបំផុត។ ដោយសារអ៊ូសបេគីស្ថានដែលជាម្ចាស់ផ្ទះស្ថិតក្នុងចំណោមក្រុមលេខល្អ ទើបចំនួនក្រុមត្រូវតម្លើងទៅចំនួន៥ ហើយលំដាប់ទី៥កំពុងគ្រប់គ្រងដោយកម្ពុជា ជាមួយនឹង៦ពិន្ទុ (+៣)៕
© រក្សាសិទ្ធិដោយ thmeythmey.com
