ជាតិ
គ្រូពេទ្យនៅរតនគិរី ត្រូវផ្អាកការងារ ដោយសារទាស់សម្តីជាមួយស្តី្រម្នាក់ សកម្មភាពលោក ចាន់ សុខជា ដើរទៅកាន់អ្នកស្រី អាន មីនា ដើម្បីហាមកុំឲ្យថតលោក
× ភ្នំពេញ៖ លោក ហ៊ឹងផាន សគន្ធា ប្រធានមន្ទីរពេទ្យខេត្តរតនគិរី បានផ្អាកការងារបណ្តោះអាសន្ន ចំពោះមន្ត្រីសុខាភិបាលរបស់ខ្លួនម្នាក់ ឈ្មោះ ចាន់ សុខជា ដែលបម្រើការងារនៅផ្នែកពិគ្រោះជំងឺក្រៅ ដោយប្តូរឲ្យទៅបម្រើការងារ នៅផ្នែករដ្ឋបាលហិរញ្ញវត្ថុវិញ។
វិធានការនេះ ធ្វើឡើងបន្ទាប់ពីមានការទាស់ពាក្យសម្ដីគ្នារវាងលោក ចាន់ សុខជា ជាមួយស្ត្រីម្នាក់ ឈ្មោះ អាន មីនា។ ក្រោយទាស់សម្តីគ្នា អ្នកស្រី អាន មីនា បានថតលោក ចាន់ សុខជា ជាវីដេអូ ហើយបង្ហោះលើបណ្តាញសង្គម ដោយអ្នកស្រី និយាយក្នុងវីដេអូឃ្លីបនោះថា លោក ចាន់ សុខជា ប្រើពាក្យ «យីមីនេះ» ទៅកាន់អ្នកស្រី។
ក្រោយកើតហេតុ ប្រធានមន្ទីរពេទ្យខេត្តរតនគិរី បានបើកកិច្ចប្រជុំជាមួយមន្ត្រីពេទ្យ១២នាក់ ដោយមានទាំងលោក ចាន់ សុខជា ជាសាមីខ្លួនផងដែរ។ យោងតាមកំណត់ហេតុនៃកិច្ចប្រជុំដែលត្រូបានផ្សព្វផ្សាយតាមបណ្តាញសង្គម និងសារព័ត៌មាន លោក ចាន់ សុខជា បានរៀបរាប់ថា អ្នកស្រី អាន មីនា បានរៀបចំនាំកូនស្រីអាយុទើប៧ខែ ចេញពីមន្ទីរពេទ្យខេត្តរតនគិរី ទៅសម្រាកនៅមន្ទីរពេទផ្សេង ហើយពេលនោះ អ្នកស្រី បានតឿនឲ្យលោក ជួយបំពេញបែបបទឲ្យបានលឿន ដើម្បីឲ្យអ្នកស្រី បានឆាប់ចេញ ស្របពេលដែលមានមនុស្សកំពុងរង់ចាំច្រើន។
ដោយសារតែគ្រូពេទ្យ មិនអាចបំពេញបែបបទឯកសារឱ្យលោកស្រី អាន មីនា មុនគេតាមបំណងនោះ ទើបធ្វើឱ្យស្ត្រីរូបនេះ ខឹងក្រោធនិងប្រើពាក្យអសុរោះមកលើគ្រូពេទ្យ ហើយយកទូរសព្ទមកថតគ្រូពេទ្យនៅទីនោះ។ ឃើញសកម្មភាពរបស់អ្នកស្រី អាន មីនា បែបនេះ ទើបលោក ចាន់ សុខជា ស្ទុះចេញពីបន្ទប់ទៅឆក់យកទូរសព្ទពីដៃអ្នកស្រី មីនា ដើម្បីបញ្ឈប់សកម្មភាពថតរូបនៅក្នុងមន្ទីរពេទ្យ ។ ប៉ុន្តែសកម្មភាពរបស់គ្រូពេទ្យ ចាន់ សុខជា ក៏ខុសលក្ខខណ្ឌវិន័យរបស់គ្រូពេទ្យដែរ។
«តាមរយៈការពិភាក្សាយ៉ាងល្អិតល្អន់នៅក្នុងអង្គប្រជុំ អង្គប្រជុំបានមូលមតិសន្និដ្ឋានថា លោក ចាន់ សុខជ មិនបានជម្រាបពីគោលបំណង មុននឹងអនុវត្តលើអតិថិជន ដូចជាការស្នើសុំដកទូរសព្ទដៃឈប់ឱ្យថត»។ នេះជាការសម្រេចរបស់អង្គប្រជុំនៃមន្ទីរពេទ្យខេត្តរតនគិរី៕
© រក្សាសិទ្ធិដោយ thmeythmey.com