អន្តរជាតិ
អុីតាលី ប្រកាសដាក់ទីក្រុង Venice ស្ថិតក្នុងភាពអាសន្ន រូបភាព៖ Reuters
× អុីតាលី នៅថ្ងៃទី១៤ ខែវិច្ឆិកា បានប្រកាសដាក់ទីក្រុងVenice ស្ថិតក្នុងភាពអាសន្ន បន្ទាប់ពីមានទឹកជំនន់នៅក្នុងទីក្រុង។ បញ្ហានេះ ត្រូវបានគេមើលឃើញថា គឺជាការកើនឡើងកម្រិតទឹកខ្ពស់ជាងគេបំផុតលំដាប់ទីពីរ នៅក្នុងប្រវត្តិទឹកលិចទីក្រុងVenice។
ដែនដីទីក្រុងVenice ច្រើនជាង ៨០ភាគរយ ត្រូវបានគ្របដណ្តប់ដោយទឹកសមុទ្រ ទ្រព្យសម្បត្តិមួយចំនួនត្រូវបានបំផ្លាញ ខណៈពេលទឹកសមុទ្រជោរមានកម្ពស់រហូត១,៨ម៉ែត្រ នៅពាក់កណ្តាលយប់។ កម្រិតកម្ពស់ទឹកប៉ុណ្ណេះ ត្រូវបានគេមើលថាគឺទាបជាងកាលពីឆ្នាំ ១៩៦៦នៅឡើយ។ ពោលគឺ កាលនោះវាមានកម្រិតកម្ពស់រហូតដល់ ១,៩៤ ម៉ែត្រឯណោះ។ បញ្ហានេះត្រូវបាន លោក Luigi Brugnaro អភិបាលក្រុង បន្ទោសថា មកពីការបម្រែបម្រួលអាកាសធាតុទើបធ្វើឲ្យមាន គ្រោះមហន្តរាយបែបនេះ។
សរសេរនៅលើបណ្តាញTwitter លោក Brugnaro បានអះអាងយ៉ាងដូច្នេះថា ទីក្រុងVenice កំពុងស្ថិតនៅលើជង្គង់របស់ខ្លួន ហើយទឹកជំនន់មួយនេះ បានបំផ្លិចបំផ្លាយទ្រព្យសម្បត្តិរាប់រយលានអឺរ៉ូ។ ទន្ទឹមនេះ លោកអភិបាលក្រុងបានបន្តទៀតថា បញ្ហានេះ ច្បាស់ណាស់ គឺបណ្តាលមកពីបម្រែបម្រួលអាកាសធាតុ។ នេះបើតាមការចុះផ្សាយរបស់ព័ត៌មាន CBC។
ជុំវិញបញ្ហាទឹកជំនន់នេះ វាបង្កឲ្យទ្រព្យសម្បត្តិរដ្ឋ ហេដ្ឋារចនាសម្ពន្ធ និងព្រះវិហារផ្សេងៗ ត្រូវរងការខូចខាត និងមានមនុស្សស្លាប់។ ជាក់ស្តែងបុរសវ័យ ៧៨ឆ្នាំម្នាក់ ត្រូវបានចរន្តអគ្គិសនី ឆក់ស្លាប់នៅក្នុងផ្ទះ បន្ទាប់ពីបុរសចំណាស់ម្នាក់នេះ ព្យាយាមបូមទឹកចេញពីផ្ទះរបស់ខ្លួន។ បន្ថែមពីលើនេះ ទឹកកខ្វក់ បានជន់លិច នៅក្នុងព្រះវិហារកាតូលិក Basilica និងបំផ្លិចបំផ្លាញទ្រព្យសម្បត្តិ អស់ជាច្រើនលានដុល្លារ។
សូមបញ្ជាក់ថា គម្រោងហេដ្ឋារចនាសម្ព័ន្ធដ៏ធំមួយ ឬMOSE បានចាប់ផ្តើមសាងសង់តាំងពីឆ្នាំ ២០០៣ មកម្ល៉េះ ដើម្បីឈប់ស្កាត់ទឹកសមុទ្រជោរ និងការពារទីក្រុង Venice។ ប៉ុន្តែគម្រោងមួយនេះ ជួបបញ្ហាជាច្រើនដូចជា ប្រើប្រាស់លុយច្រើនពេក អំពើពុករលួយ និងការពន្យាពេលសាងសង់ជាដើម។ ការណ៍នេះ បណ្តាលឲ្យមានការត្អូញត្អែរពីប្រជាជនយ៉ាងខ្លាំង ជាពិសេស គឺការខ្វះវិធានការទប់ស្កាត់ទឹកលិចទីក្រុង៕
© រក្សាសិទ្ធិដោយ thmeythmey.com