កីឡាជាតិ
ជាតិ
ពីរឆ្នាំក្រោយការចាកចេញ កុក បូរីស ត្រឡប់មករួមរស់ជាមួយភ្នំពេញក្រោនសាជាថ្មី កីឡាករ កុក បូរីស ត្រឡប់មកចូលរួមជាមួយភ្នំពេញក្រោនសាជាថ្មី, រូបភាពពីក្លិបភ្នំពេញក្រោន
× កីឡាករខ្សែការពារកូនកាត់ខ្មែរ-បារាំង កុក បូរីស បានត្រឡប់មកចូលរួមជាមួយក្លិបភ្នំពេញក្រោន ដែលខ្លួនធ្លាប់ចំណាយពេលរួមរស់៥ឆ្នាំសាជាថ្មី ក្រោយចាកចេញអស់រយៈពេល២រដូវកាល។ តាមរយៈកិច្ចសន្យាថ្មីនេះ កុក បូរីស នឹងជួយភ្នំពេញក្រោនប្រជែងក្នុងដណ្តើមជើងឯកក្នុងពានរង្វាន់សម្តេច ហ៊ុន សែន និងក្របខណ្ឌមិត្តហ្វូនខេមបូឌានលីគរដូវកាលឆ្នាំ២០២០។ បូរីស អះអាងថា មានក្លិបនៅកម្ពុជាជាច្រើនបានទាក់ទងរូបគេ តែគេសម្រេចជ្រើសរើសយកក្លិបភ្នំពេញក្រោន។
ក្រោយចាកចេញអស់រយៈពេលរដូវកាលនៅឆ្នាំ២០១៨ និង ២០១៩ ខ្សែការពារកណ្តាល កុក បូរីស ដែលរួមរស់ជាមួយភ្នំពេញក្រោនចន្លោះពីឆ្នាំ២០១២-២០១៧ បានត្រឡប់មកចូលរួមជាមួយក្លិបនេះសាជាថ្មី។ សម្រាប់ការរួមរស់រយៈពេលពីរឆ្នាំនៅបារាំង បូរីស មិនបានទៅប្រកបអាជីពជាមួយក្លិបណានោះទេ ក្រោយចាកចេញពីភ្នំពេញក្រោន។ កីឡាករខ្មែរ-បារាំងរូបនេះ បានជួយឲ្យភ្នំពេញក្រោនលើកពានលីគកំពូលបាន២លើក គឺនៅឆ្នាំ២០១៤ និង ២០១៥។
កីឡាករវ័យ២៨ឆ្នាំរូបនេះ បានចូលប្រឡូកក្នុងវិស័យកីឡាបាល់ទាត់ដំបូងដោយធ្វើជាយុវជនថ្នាក់នៅ Association Sportive Nancy-Lorraine នៅប្រទេសបារាំង។ បន្ទាប់មកនៅឆ្នាំ២០០៧-២០០៨ រូបគេបានផ្លាស់ទៅចូលរួមជាមួយក្លិប Jarville JF ដែលបច្ចុប្បន្នលេងក្នុងក្របខណ្ឌលំដាប់ទី២នៅប្រទេសបារាំង។ ក្រោយមកទៀតរូបគេចូលរួមជាមួយ US Vandœuvre-lès-Nancy, FC Toul, Nancy Olympique មុនផ្លាស់មកភ្នំពេញក្រោននៅឆ្នាំ២០១២។
ក្រោយចុះកិច្ចសន្យាជាមួយភ្នំពេញក្រោនសម្រាប់រដូវកាលឆ្នាំ២០២០ ខ្សែការពារកណ្តាលរូបនេះអះអាងថា មានក្លិបជាច្រើននៅកម្ពុជាទាក់ទងទៅរូបគេ ប៉ុន្តែរូបគេសម្រេចជ្រើសរើសយកភ្នំពេញក្រោន។ កីឡាករខ្មែរ-បារាំងរូបនេះអះអាងថា ភ្នំពេញក្រោនជាក្លិបតែមួយគត់នៅកម្ពុជា ដែលគេស្រលាញ់។ រូបគេសង្កត់ធ្ងន់ថា គេនិយាយបែបនេះមិនមែនរើសអើងក្លិបផ្សេងៗនោះទេ។
ក្លិបបាល់ទាត់ភ្នំពេញក្រោននៅថ្ងៃទី១៤ វិច្ឆិកា បានប្រកាសចែកផ្លូវជាមួយកីឡាករ៣រូប រួមមានកីឡាករ Shane Booysen, នៅ សុខសិលា និង ពុំ តុលា។ ខ្សែប្រយុទ្ធអាហ្វ្រិកខាងត្បូង Booysen បានចូលរួមជាក្លិបនេះនៅពាក់កណ្តាលរដូវកាលឆ្នាំ២០១៩ ដោយរកបាន៧គ្រាប់។ ចំណែកកីឡាករ នៅ សុខសិលា និង ពុំ តុលា បានចូលរួមនៅដើមឆ្នាំ២០១៩៕
Tag:
បាល់ទាត់
ភ្នំពេញក្រោន
កុក បូរីស
© រក្សាសិទ្ធិដោយ thmeythmey.com