អន្តរជាតិ
ក្រុមស៊ើបអង្កេតអន្តរជាតិ៖ ករណីធ្លាក់យន្តហោះ MH17 មានពាក់ព័ន្ធជាមួយមន្ត្រីជាន់ខ្ពស់រុស្ស៊ី យន្តហោះម៉ាឡេស៊ីMH17 ដែលត្រូវបានគេបាញ់ទម្លាក់នៅក្នុងទឹកដីអ៊ុយក្រែន
× ក្រុមស៊ើបអង្កេតដែលស្វែងរកពីមូលហេតុនៃការធ្លាក់យន្តហោះ MH17 ក្នុងប្រទេសអ៊ុយក្រែន នៅថ្ងៃទី១៤ ខែវិច្ឆិកា បានបញ្ចេញខ្សែទូរសព្ទមួយចំនួន ដែលបង្ហាញពីការពាក់ព័ន្ធរវាងមន្ត្រីជាន់ខ្ពស់រុស្ស៊ីជាមួយចលនាផ្តាច់ទឹកដី ។
តាមរយៈការស៊ើបអង្កេតជាអន្តរជាតិ ខ្សែទូរសព្ទមួយចំនួន ត្រូវបានចោទឡើងជាសំណួរថា អាចនឹងទាក់ទង ទៅនឹងមន្ត្រីជាន់ខ្ពស់រុស្ស៊ី ពីរឿងបាញ់មីស៊ីលទម្លាក់យន្តហោះម៉ាឡេស៊ី MH17 នៅក្នុងឆ្នាំ ២០១៤។ ទន្ទឹមនេះ ការស៊ើបអង្កេតក៏បានបង្ហាញផងដែរ ពីទំនាក់ទំនងយ៉ាងជិតស្និត មិនគួរឲ្យជឿរវាងមន្ត្រីជាន់ខ្ពស់រុស្ស៊ី និងក្រុមផ្តាច់ទឹកដី Donetsk People's Republic (DPR) នៅភាគខាងកើតអ៊ុយក្រែន។
វាស្ទើរតែមានការហៅទូរសព្ទ ជារៀងរាល់ថ្ងៃ រវាងមេដឹកនាំ DPR ជាមួយនឹង ប្រព័ន្ធទូរសព្ទនៅក្នុងសហព័ន្ធរុស្ស៊ី។ នេះបើតាមលើកឡើងរបស់ក្រុមស៊ើបអង្កេត ដែលដឹកនាំដោយជនជាតិហូឡង់ នៅក្នុងសេចក្តីថ្លែងការណ៍នៅថ្ងៃទី១៤ ខែវិច្ឆិកា។ ក្នុងន័យនេះ ក្រុមស៊ើបអង្កេតបានចង្អុលបង្ហាញថា ក្រុមក្រុមបះបោរ បាននិយាយទូរសព្ទ នៅក្នុងទឹកដីគ្រីមៀ ក្បែរព្រំដែនជាមួយអ៊ុយក្រែន។ ភាគច្រើនជនសង្ស័យទាំងនោះ និយាយទូរសព្ទតាមប្រព័ន្ធសន្តិសុខ ដែលត្រូវបានផ្តល់ដោយសេវាសន្តិសុខរុស្ស៊ី។
ក្នុងចំណោមមន្ត្រីជាន់ខ្ពស់រុស្ស៊ី ក្រុមស៊ើបអង្កេតដែលមានមូលដ្ឋាននៅក្នុងប្រទេសហូឡង់មួយនេះ បានដាក់ការសង្ស័យលើលោក Vladislav Surkov ជំនួយការដ៏សំខាន់ម្នាក់របស់លោក វ្ល៉ាឌីមៀ ពូទីន និង Sergei Shoigu រដ្ឋមន្ត្រីការពារជាតិ។ កន្លងមក តាមការរកឃើញរបស់ក្រុមស៊ើបអង្កេត មានប្រព័ន្ធទូរសព្ទជាច្រើន បានហៅចូលមកមនុស្សសំខាន់ទាំងពីខាងលើ ពាក់ព័ន្ធទៅនឹងការធ្លាក់យន្តហោះ MH17។
ដើម្បីដាក់បន្ទុកលើមន្ត្រីជាន់ខ្ពស់រុស្ស៊ីបន្ថែមទៀត ក្រុមស៊ើបអង្កេត បានស្នើដាក់សាក្សី ៤នាក់បន្ថែមទៀត មុនពេលមានការកាត់ទោសក្នុងប្រទេសហូឡង់នៅថ្ងៃទី៩ ខែមីនា ឆ្នាំ២០២០ខាងមុខ។ សាក្សីទាំងនោះ មាន៣នាក់ ជាជនជាតិរុស្ស៊ី និងមួយនាក់ទៀត ជាជនជាតិអ៊ុយក្រែន។ ចំណែកជនសង្ស័យ ដែលត្រូវប្រឈមនឹងការកាត់ទោស មានដូចជា Igor Girkin អតីតទីភ្នាក់ងារចារកិច្ចរុស្ស៊ី, លោក Sergei Dubinski, លោក Oleg Pulatov, លោក Leonid Kharchenko។ ប៉ុន្តែពួកទាំងអស់ ត្រូវគេរំពឹងថា នឹងកាត់ទោសដោយកំបាំងមុខ។
សូមបញ្ជាក់ថា យន្តហោះអ្នកដំណើរ MH17 បានហោះពីទីក្រុងអាំស្ទែដាំ ទៅគូឡាឡាំពួ ប៉ុន្តែត្រូវបានបាញ់ទម្លាក់ដោយមីស៊ីលដែលផលិតដោយរុស្ស៊ី BUK ក្នុងឆ្នាំ ២០១៤ ក្នុងលំហអាកាសអ៊ុយក្រែន។ ឧបទ្ទវហេតុមួយនេះ បានបង្កឲ្យមនុស្សប្រមាណ២៩៨នាក់ ស្លាប់ ។ តាមរយៈហេតុការណ៍មួយនេះ ក្រុមស៊ើបអង្កេត បានលើកឡើងថា មីស៊ីលដែលបាញ់នោះ ត្រូវបានគេដឹកចេញពីរុស្ស៊ី ទៅអ៊ុយក្រែន៕
Tag:
រុស្ស៊ី
ម៉ាឡេស៊ី
MH17
© រក្សាសិទ្ធិដោយ thmeythmey.com