អន្តរជាតិ
អាមេរិក បបួលកូរ៉េខាងជើងចរចាម្ដងទៀតនៅខែក្រោយ តែព្យុងយ៉ាងដាក់លក្ខខណ្ឌ ប្រធានក្រុមចរចានុយក្លេអ៊ែរកូរ៉េខាងជើង គីម ម្យុងគីល (កណ្ដាល) នាសន្និសីទសារព័ត៌មានមួយនៅស៊ុយអែត។ រូបភាព AP
× សហរដ្ឋអាមេរិក បានបបួលកូរ៉េខាងជើងរៀបចំការចរចាថ្នាក់ក្រុមការងារម្ដងទៀតនៅខែក្រោយដើម្បីដោះស្រាយបញ្ហានុយក្លេអ៊ែរ។ នេះបើតាមការលើកឡើងរបស់ប្រមុខចរចាកូរ៉េខាងជើង គីម ម្យ៉ុងគីល (Kim Myong-gil) នៅថ្ងៃទី១៥ ខែវិច្ឆិកា។ ប៉ុន្តែកូរ៉េខាងជើង មិនទាន់ផ្ដល់ចម្លើយអ្វីឡើយទៅនឹងការសំណើនេះ តែចង់ឲ្យអាមេរិកបញ្ចេញផែនការថ្មីស្រឡាងដើម្បីដោះស្រាយបញ្ហា ជាជាងប្រើយុទ្ធសាស្ត្រចាស់ ដែលមិនអាចជួយអ្វីបាននោះ។
ប្រធានក្រុមចរចានុយក្លេអ៊ែរកូរ៉េខាងជើង គីម ម្យ៉ុងគីល បានបញ្ចេញសំណើរបស់អាមេរិកដែលបានហៅកូរ៉េខាងជើងចូលតុចរចាឡើងវិញ បន្ទាប់ពីការចរចានៅស៊ុយអែតដែលបរាជ័យ។ បើតាមការផ្សាយរបស់ទីភ្នាក់ងារព័ត៌មានកូរ៉េខាងជើង KCNA លោក គីម អះអាងថា ថ្មីៗនេះ សមភាគីអាមេរិករបស់លោក គឺលោក ស្ទីវិន ប៊ីហ្កាន់ ចង់ជួបចរចាជាថ្មីនៅប្រទេសទីបីក្នុងខែធ្នូខាងមុខ។ ប៉ុន្តែព្យុងយ៉ាងបានដាក់លក្ខខណ្ឌ។
ទីភ្នាក់ងារព័ត៌មាន KCNA បានស្រង់សម្ដីលោក គីម ថា កូរ៉េខាងជើងត្រៀមចរចាជាមួយអាមេរិកគ្រប់ទីកន្លែង និងគ្រប់ពេលវេលា បើលទ្ធផលនៃការចរចាអាចកើតមាននោះ ប៉ុន្តែអាមេរិកក៏ត្រូវមានដំណោះស្រាយថ្មីដាក់លើតុពេលចរចាដែរ។ ប្រេសិតរូបនេះក៏បានព្រមានក្រុងវ៉ាស៊ីនតោនចំៗទៀតថា លោក គ្មានឆន្ទៈចរចាអ្វីទាំងអស់ បើអាមេរិកចង់យកការចរចាដើម្បីតែអូសបន្លាយពេលឱសានវាទដែលកូរ៉េខាងជើងបានកំណត់ដូចធ្លាប់ធ្វើនៅក្នុងការចរចានៅទីក្រុងស្តុកខុលកាលពីដើមខែតុលានោះ។
និយាយពីឱសានវាទនេះ ប្រមុខដឹកនាំកូរ៉េខាងជើង គីម ជុងអ៊ុន បានកំណត់ត្រឹមដំណាច់ឆ្នាំ២០១៩ នេះ ឲ្យអាមេរិកដាក់ចេញយុទ្ធសាស្ត្រថ្មីជំនួសមធ្យោបាយចាស់ដែលកូរ៉េខាងជើងមិនពេញចិត្ត។ បើហួសឱសានវាទនេះ ក្រុងវ៉ាស៊ីនតោនមិនបញ្ចេញអ្វីថ្មីទេ ក្រុងព្យុងយ៉ាងនឹងមានវិធានការធំសម្បើមមិនខាន តែមិនបានបញ្ជាក់ច្បាស់ពីអ្វីឡើយ។
ទន្ទឹមនឹងប្រាប់ឲ្យអាមេរិកបញ្ចេញយុទ្ធសាស្ត្រថ្មី លោក គីម ក៏បន្តប្រាប់រដ្ឋបាលលោក ត្រាំ កុំចង់គិតគូរពីលទ្ធផលមុនការចរចាឲ្យសោះ។ ត្រង់នេះ មន្ត្រីចរចាកូរ៉េខាងជើងលើកឡើងថា លទ្ធភាពដោះស្រាយបញ្ហា នឹងមិនមានឡើយ បើអាមេរិកចង់ជជែកពីបញ្ហាស្ថិតក្នុងរបៀបវារៈទីពីរដូចជាការបញ្ចប់ជាផ្លូវការសង្គ្រាមកូរ៉េ ឬការបង្កើតការិយាល័យទំនាក់ទំនងអ្វីនោះ។
«ខ្ញុំមានអារម្មណ៍ថា អាមេរិកមិនទាន់ត្រៀមខ្លួនផ្ដល់ចម្លើយគួរឲ្យពេញចិត្តនៅឡើយទេ ហើយសំណើសុំចរចាទៀតសោត គ្រាន់តែជាល្បិចដើម្បីកេងពេលតាមរយៈការរៀបចំជំនួបអាមេរិក-កូរ៉េខាងជើង។» នេះជាសម្ដីរបស់លោក គីម ដែលជាអតីតអគ្គរដ្ឋទូតប្រចាំទីក្រុងហាណូយ។
ទាក់ទងបញ្ហានេះ អាមេរិកមិនទាន់មានការឆ្លើយតបជាក់លាក់ឡើយ តែអះអាងពីឆន្ទៈបន្តការចរចាដដែល។ អ្នកនាំពាក្យក្រសួងការបរទេសអាមេរិកប្រាប់ទីភ្នាក់ងារព័ត៌មាន Yonhap ថា ប្រធានាធិបតី ដូណាល់ ត្រាំ នៅតែរក្សាការប្ដេជ្ញាចិត្តដើម្បីបោះជំហានតាមជំនួបនៅសិង្ហបុរីដើម្បីកែប្រែទំនាក់ទំនងទ្វេភាគី ស្ថាបនាសន្តិភាពយូរអង្វែង និងការរំសាយនុយក្លេអ៊ែរទាំងស្រុង៕
Tag:
កូរ៉េខាងជើង
អាមេរិក
Kim Myong-gil
© រក្សាសិទ្ធិដោយ thmeythmey.com