អន្តរជាតិ
×![]()
ដោយ: ធីតា
ខោធម្មតា អាវយឺត សម្រាប់អាពាហ៍ពិពាហ៍គឺសមរម្យបំផុតហើយសម្រាប់កូនកម្លោះ Glen Maxwell និងកូនក្រមុំ Rebecca។ តាមការផ្សាយរបស់ Metro UK គូស្នេហ៍វ័យក្មេងអង់គ្លេសនេះ ចង់បង្ហាញថា ការចំណាយលុយដ៏ច្រើនសន្ធឹកសន្ធាប់លើសម្លៀកបំពាក់ មិនមែនជាប្រភពនៃសុភមង្គលពិតប្រាកដឡើយ ផ្ទុយទៅវិញ គឺទឹកចិត្តដែលស្រឡាញ់គ្នាទើបរក្សាចំណងអាពាហ៍ពិពាហ៍យូរអង្វែង។
Glen អាយុ៣០ឆ្នាំ និង Rebecca អាយុ២៦ឆ្នាំ បានភ្ជាប់ពាក្យតាំងពីពាក់កណ្តាលឆ្នាំ២០១៦មក ហើយទើបតែសម្រេចចិត្តរៀបការកាលពីពេលថ្មីកន្លងមកនេះ បន្ទាប់ពីពួកគេមានកូនស្រី [Eleanor] ដ៏ស្រស់ស្អាតម្នាក់។ ពិធីអាពាហ៍ពិពាហ៍របស់ពួកគេមានភ្ញៀវ៤០នាក់ហើយសុទ្ធតែស្លៀកពាក់ខោជើងវែង និងអាវយឺត ដូចៗគ្នា។
ការចំណាយថវិកា និងការគិតគូរើសឈុតអាពាហ៍ពិពាហ៍ពិតជាស្មុគស្មាញ និងឈឺក្បាលខ្លាំង។ ថ្ងៃមួយ Glen បាននិយាយប្រាប់ទៅ Rebecca ថា៖ «យើងគ្រាន់តែស្លៀកពាក់ខោវែង និងអាវយឺតទៅបានហើយនៅពេលរៀបការ ហើយបងនៅតែស្រឡាញ់អូន»។
Rebecca ក៏មិនយល់ទាស់អ្វីនោះដែរ ហើយអ្នកទាំងពីរក៏បានចូលរួមកាត់បន្ថយការឈឺក្បាលរបស់ភ្ញៀវផងដែរ ដោយស្នើឲ្យពួកគេមិនចាំបាច់ស្លៀកពាក់ឆើតឆាយនោះឡើយ ដោយគ្រាន់តែខោវែង និងអាវយឺត ជាការស្រេច។
ដំបូងឡើយពួកគេមានគម្រោងរៀបការចំអំឡុងពេលណូអែល ដែលត្រូវចំណាយប្រមាណ១៤០០០ផោន ប៉ុន្តែក្រោយពួកគេសម្រេចទៅរៀបចំនៅតំបន់ Darlington វិញ ដោយមានភ្ញៀវ៤០នាក់ ហើយភាគច្រើនជាគ្រួសារសាច់ញាតិសងខាង។
ពួកគេចំណាយលើកម្មវិធីត្រឹមតែ២៥០ផោនប៉ុណ្ណោះ រីឯម្ហូបអាហារចំណាយអស់៤០០ផោន នំខេក ៣៥ផោន ខោអាវ១៥០ផោន ផ្កា២០០ផោន និងថ្លៃផាត់មុខ Rebecca ៧០ផោន។ និយាយរួមក្នុងពិធីទាំងមូល អ្នកទាំងពីរចំណាយក្នុងរង្វង់ត្រឹម១ ១០៥ផោនប៉ុណ្ណោះ។
Rebecca បានបង្ហាញអារម្មណ៍ថា ថ្ងៃដ៏ពិសេសមិនមែនផ្តោតលើសម្លៀកបំពាក់ឡូយឆាយនោះឡើយ ប៉ុន្តែជាសេចក្តីស្រឡាញ់គ្នាទៅវិញទៅមក៕
© រក្សាសិទ្ធិដោយ thmeythmey.com
