ជាតិ
សេដ្ឋកិច្ច
អង្គការ Gret នាំអ្នកកាសែត៩ស្ថាប័ន ស្វែងយល់ពី«បច្ចេកទេសកសិកម្មអភិរក្ស»នៅបាត់ដំបង
×![]()
ដោយ: ថ្មីៗ
បាត់ដំបង៖ អ្នកសារព័ត៌មានជាតិចំនួន១៤រូប មកពីស្ថាប័នចំនួន៩ មកទស្សនកិច្ច «បច្ចេកទេសកសិកម្មអភិរក្ស» នៅស្រុករតនមណ្ឌល ខេត្តបាត់ដំបង នាថ្ងៃទី១៥ វិច្ឆិកា ឆ្នាំ២០១៩ តាមរយៈអង្គការ Gret ។ បើតាមលោក ប៉ាត សុវណ្ណ មន្ត្រីបច្ចេកទេសកសិកម្មនៃអង្គការ Gret ក្នុងដំណើរទេស្សនកិច្ចនេះ អ្នកសារព័ត៌មានទាំងនោះ នឹងស្វែងយល់អំពីវិធីសាស្ត្រកសិកម្មបន្ស៊ាំនឹងការប្រែប្រួលអាកាសធាតុ, ការរក្សាសំណើមដី, ការការពារសំណឹកដី និងការកែលំអរដីឱ្យមានគុណភាព។ 
លោក ប៉ាត សុវណ្ណា ប្រាប់សារព័ត៌មានThmeyThmey25 ថា ក្នុងដំណើរទស្សនកិច្ចរយៈពេលមួយថ្ងៃពេញនៅបាត់ដំបងនេះ អ្នកសារព័ត៌មានក្រៅពីយល់ដឹងបច្ចេកទេសកសិកម្មអភិរក្សហើយនោះ នឹងទទួលបានចំណេះដឹង និងព័ត៌មានបច្ចេកទេសថ្មីៗ រួមជាមួយនឹងបញ្ហានានានៃវិស័យកសិកម្ម តាមរយៈអ្នកជំនាញកសិកម្ម និងកសិករផ្ទាល់តែម្តង។ មន្ត្រីកសិកម្មនៃអង្គការ Gret រូបនេះ បានបញ្ជាក់ដូច្នេះ៖«កសិកម្មអភិរក្ស ដែលកសិករខេត្តបាត់ដំបងកំពុងអនុវត្ត គឺជាបច្ចេកទេសកសិកម្មថ្មីមួយជួយដល់កសិករដែលកំពុងជួបប្រទះនឹងការប្រែប្រួលអាកាសធាតុ ដោយនៅពេលមានភាពរាំងស្ងូត បច្ចេកទេសកសិកម្មថ្មីនេះ នឹងធ្វើឱ្យដំណាំយើងធន់នឹងការប្រែប្រួលអាកាសធាតុ តាមរយៈការដាំដំណាំគម្របដី»។
លោកបានបន្ថែមទៀតថា កសិកម្មបន្ស៊ាំនឹងការប្រែប្រួលអាកាសធាតុលើបច្ចេកទេសកសិកម្មអភិរក្ស គឺជាការអនុវត្តរបស់នាយកដ្ឋានកសិកម្ម និងនាយកដ្ឋានកែលំអរគុណភាពនៃក្រសួងកសិកម្ម រុក្ខាប្រមាញ់ និងនេសាទ។ សូមជំរាបថា អ្នកសារព័ត៌មាន១៤រូប មកពីស្ថាប័នចំនួន៩ ដែលអញ្ជើញមកពីរាជធានីភ្នំពេញ និងបណ្តាខេត្តនានា ដែលដឹកនាំដោយអង្គការ Gret នោះមាន៖ សារព័ត៌មានអេឡិចត្រូនិកថ្មីៗ (ThmeyThmey), សារព័ត៌មាន Click News, ទូរទស្សន៍អប្សរា, វិទ្យុជាតិនៅរាជធានីភ្នំពេញ និងខេត្តរតនគិរី, វិទ្យុយុវជនជំនាន់ថ្មី, វិទ្យុកម្សាន្តខេត្តកំពង់ធំ, វិទ្យុមណ្ឌលគិរី និងវិទ្យុ WVC ខេត្តក្រចេះ៕
Tag:
ដំណាំ
កសិកម្មអភិរក្ស
ការប្រែប្រួលអាកាសធាតុ
អង្គការ Gret
© រក្សាសិទ្ធិដោយ thmeythmey.com
