ព្រឹទ្ធាចារ្យ ហុក ឈាងគីម ៖ ពេលប្រកួតកីឡាករត្រូវប្រើចិត្តមុតជាងបច្ចេកទេស

កីឡាជាតិ

ជាតិ

ព្រឹទ្ធាចារ្យ ហុក ឈាងគីម ៖ ពេលប្រកួតកីឡាករត្រូវប្រើចិត្តមុតជាងបច្ចេកទេស

16, Nov 2019 , 9:59 am

រូបភាព

ដោយ:

លោកព្រឹទ្ធាចារ្យ ហុក ឈាងគីម អនុប្រធានសហព័ន្ធកីឡាគុនល្បុក្កតោកម្ពុជា ហាក់ឲ្យតម្លៃខ្ពស់លើចិត្តជាងបច្ចេកទេស ព្រោះលោកយល់ថា ចិត្តជាអាវុធដ៏មុតស្រួចសម្រាប់កីឡាករក្នុងការផ្តួលគូប្រកួត។ ការលើកឡើងរបស់លោក ហុក ឈាងគីម បែបនេះធ្វើឡើងក្នុងពិធីជួបសំណេះសំណាលជាមួយក្រុមកីឡាករគុនល្បុក្កតោ មុនចេញទៅបោះជំរំហ្វឹកហាត់នៅហ្វីលីពីនកាលពីថ្ងៃទី៩ វិច្ឆិកា។

ចិត្តជាអាវុធដ៏មានប្រសិទ្ធិភាពក្នុងការផ្តួលគូប្រកួត។ ដូច្នេះកីឡាករត្រូវបើចិត្តឲ្យមុតជាងបច្ចេកទេសក្នុងអំឡុងពេលប្រកួតជាមួយដៃគូ។ នេះជាការជំរុញ និងផ្តាំផ្ញើរបស់លោក ហុក ឈាងគីម អនុប្រធានសហព័ន្ធកីឡាគុនល្បុក្កតោកម្ពុជា ដល់កីឡាករកីឡាការិនីគុនល្បុក្កតោ មុនចេញទៅបោះជំរំហ្វឹកហាត់នៅហ្វីលីពីន ដើម្បីត្រៀមការប្រកួតកីឡាស៊ីហ្គេម ដែលប្រព្រឹត្តទៅចាប់ពីថ្ងៃទី៣០ ខែវិច្ឆិកា ដល់ថ្ងៃទី១១ ខែធ្នូ ឆ្នាំ២០១៩ នៅប្រទេសហ្វីលីពីន។

លោក ហុក ឈាងគីម ឲ្យតម្លៃខ្ពស់លើចិត្តជាងបច្ចេកទេស។ សម្រាប់ លោក កីឡាករមានសមត្ថភាព និងបច្ចេកទេសតែមុខមិនគ្រប់គ្រាន់នោះទេ គឺទាមទារឲ្យពួកគេត្រូវមានចិត្តក្លាហានក្នុងការប្រកួត។ ព្រឹទ្ធាចារ្យក្បាច់គុនរូបនេះបានលើកឡើងដូច្នេះថា៖«ដែលលឺគេនិយាយថា ចិត្តមុតទេ? ចិត្តមុតជាងកាំបិតទៅទៀត។ ដូច្នេះយើងប្រយុទ្ធត្រូវប្រើចិត្ត កុំប្រើតែបច្ចេកទេស ព្រោះចិត្តមុតទម្លុះធ្លុះពីទ្រូងម្ខាងទៅទ្រូងម្ខាង ហេតុនេះកីឡាករពេលប្រកួតត្រូវប្រើចិត្តឲ្យមុត»។

តែយ៉ាងណា អនុប្រធានសហព័ន្ធរូបនេះ ជំរុញឲ្យកីឡាករខិតខំប្រឹងប្រែងប្រកួតឲ្យអស់ពីសមត្ថភាព ក្នុងការស្វែងរកជ័យជម្នះពីការប្រកួតកីឡាស៊ីហ្គេមជូនជាតិមាតុភូមិ។ ក្រៅពីផ្តល់ដំបូន្មាន លោក ដាស់តឿនឲ្យកីឡាករចៀងវាងប្រព្រឹត្តអំពើទាំងឡាយដែលនាំឲ្យប៉ះពាល់ដល់កិត្តិយសជាតិ៕