ភ្នំពេញ៖ ខុសពីនិស្សិតជាច្រើន នៅពេលរៀនចប់ពួកគេចូលទៅធ្វើការក្នុងម៉ាស៊ីនត្រជាក់ តែលោក សាន ដារ៉ាវីត ដែលទើបបញ្ចប់អនុបណ្ឌិតនៅប្រទេសថៃ បែរជាបានប្រមែប្រមូលយុវជនដែលមានគំនិតដូចគ្នា ធ្វើសកម្មភាពប្រមូលសំរាមនៅប្រឡាយបឹងត្របែករហូតទទួលបានការគាំទ្រយ៉ាងច្រើនសន្ធឹកសន្ធាប់ពីមហាជន។ បើតាម លោក សាន ដារ៉ាវីត បេសសកម្មដ៏លំបាកនេះ គឺដើម្បីឲ្យរាជធានីភ្នំពេញជាក្រុងគ្មានសំរាម។
សូមស្តាប់សេចក្តីរាយការណ៍លម្អិតពីលោក រ៉ឹម ភារី នៃសារព័ត៌មានថ្មីៗដូចតទៅ៖
ក្លិនស្អុយដែលចេញពីប្រឡាយលូបឹងត្របែក បានធ្វើ លោក សាន ដារ៉ាវីន រង្គៀសចិត្តជាខ្លាំង ។ ទើសភ្នែកផង និងពិបាកទ្រាំនឹងក្លិនស្អុយចេញពីលូនេះផង ទើបយុវជន ដារ៉ាវីន ដែលគ្រានោះទើបត្រឡប់ពីសិក្សានៅប្រទេសថៃ បានប្រមូលគ្នីគ្នាមកប្រមូលសំរាមគ្រប់ប្រភេទលើប្រឡាយបឹងត្របែក កាលពីអំឡុងខែមីនា ឆ្នាំ២០១៩។ សកម្មភាពនេះ ចាប់ផ្តើមដោយមានយុវជនតែបីបួននាក់ប៉ុណ្ណោះ ដែលជាមិត្តភក្តិរបស់ដាវីត ប៉ុន្តែក្រោយមក សកម្មភាពនេះ បានលេចលឺដល់យុវជនដទៃទៀត សាធារណជន រួមទាំងបណ្តាញសារព័ត៌មាននានាផង។
រូបភាពពីទំព័រហ្វេសប៊ុកយុវជនសំរាម
ពីទីស្នាក់ការយុវជនសំរាម ដែលមានដំបូលប្រកស័ង្គសី និងមានរបស់ប្រើប្រាស់សុទ្ធតែកែច្នៃពីសំរាម លោក សាន ដារ៉ាវីត រំឭកដូច្នេះ៖«ដំបូងឡើយ ខ្ញុំជិះកាត់ ហើយធុំក្លិនស្អុយមែនទែន។ ខ្ញុំក្រឡេកមកឃើញសុទ្ធប្លាស្ទិក អត់ឃើញទឹកពណ៌ខ្មៅទេ។ ខ្ញុំក៏គិតថា ប្រមូលគ្នាបួនប្រាំនាក់ មករើសសំរាម។ បើរើសមិនអស់ទេ មិនបាច់ឈប់ទេ។ ពេលនោះ ក៏មានអ្នកមានទំនួលខុសត្រូវលើបញ្ហាហ្នឹង មកចូលរួមជាមួយយើង ដោយសង្ឃឹមថាវានឹងអស់ ដើម្បីកុំឲ្យបង្កក្តីព្រួយបារម្ភដល់ពលរដ្ឋ។ ពលរដ្ឋរស់នៅក្បែរហ្នឹង គាត់ស៊ាំនឹងច្រមុះ ចឹងគាត់មិនដឹងថា វាប៉ះពាល់ស្អីខ្លះ។ នៅម្តុំនេះ អ្នកក្រច្រើន គាត់មានលុយតិចតួច គាត់ទៅធ្វើព្យាបាលជំងឺជាញឹកញាប់។ ខ្ញុំព្រួយបារម្ភពីប្រភពជំងឺរាតត្បាតផ្សេងៗ។ ពេលធ្វើបានប្រហែលមួយសប្តាហ៍ ស្រាប់តែមានសមត្ថកិច្ច អាជ្ញាធរ ក្រសួងពាក់ព័ន្ធ អ្នកសារព័ត៌មានចុះមក ចឹងខ្ញុំក៏សប្បាយចិត្ត ព្រោះមានការចូលរួម»។
រូបភាពពីទំព័រហ្វេសប៊ុកយុវជនសំរាម
តាមពិតទៅ ការងារប្រមូលសំរាម មិនមែនជាបំណងរបស់យុវជនរូបនេះឡើយ ដ្បិតរូបគេ ក៏ចង់ធ្វើការងារស្របតាមជំនាញគ្រប់គ្រងពាណិជ្ជកម្ម ដែលបានពីសាកលវិទ្យាល័យជូឡាឡុងកន ប្រទេសថៃរបស់ខ្លួនដែរ។ ប៉ុន្តែ បញ្ហាសំរាមពាសវាលពាសកាលនៅភ្នំពេញ និងមិនទាន់មានដំណោះស្រាយ បានធ្វើឲ្យ លោក ដារ៉ាវីត ទុកចោលការងាររបស់ខ្លួនមួយឡែក ហើយងាកមកផ្តោតលើគំនិផ្តួចផ្តើម ប្រមូលសំរាមជាគំរូ និងជាសារដាស់តឿនពលរដ្ឋទូទៅ។
សូមទស្សនាវីដេអូខាងក្រោមនេះ៖
ក្រៅពីចង់ប្តូរឥរិយាបថពលរដ្ឋខ្មែរ លោក សាន ដារ៉ាវីត កែប្រែឲ្យភ្នំពេញគ្មានសំរាម
សម្រាប់ លោក សាន ដារ៉ាវីត សំរាមនៅរាយប៉ាយតាមផ្លូវសាធារណៈ សួនច្បារ ក្នុងលូ និងស្ទើរគ្រប់ទីកន្លែងនៅក្នុងក្រុងភ្នំពេញ មិនត្រឹមតែប៉ះពាល់សុខភាពពលរដ្ឋនោះទេ ប៉ុន្តែវាបានធ្វើឲ្យអ្នកទេសចរបរទេស វាយតម្លៃមិនល្អចំពោះមុខមាត់ប្រទេសកម្ពុជាទៀតផង។ លោកអះអាងថា ទម្លាប់ចោលសំរាមផ្តេសផ្តាសរបស់ពលរដ្ឋជាច្រើន បានក្លាយជាបញ្ហាចម្បង ដែលលោកចង់កែប្រែ ដើម្បីឲ្យភ្នំពេញមានបរិស្ថានស្អាត។
រូបភាពពីទំព័រហ្វេសប៊ុកយុវជនសំរាម
លោកពន្យល់យ៉ាងដូច្នេះថា៖ «យុវជន យើងផ្សព្វផ្សាយទៅកាន់យុវជនគ្នាយើង។ យើងរើសសំរាមឲ្យគាត់ឃើញថា សំរាមមិនគួរនៅកន្លែងហ្នឹងទេ។ យើងបានបង្កើនអ្នករើសសំរាម ឲ្យច្រើនជាងអ្នកបោះចោល។ មកដល់សព្វថ្ងៃ គឺមានការផុសផុលច្រើនមែនទែន នៅក្នុងការរើសសំរាមនៅតាមទីសាធារណៈនានា។ រូបភាពទាំងអស់នេះ បានជ្រាបដល់ពលរដ្ឋច្រើនមែនទែន តាមរយៈបណ្តាញសង្គមហ្វេសប៊ុក តាមកាសែត និងទូរទស្សន៍។ ដូច្នេះប្រហែលជាកន្លះឆ្នាំហ្នឹង ឃើញថា ពលរដ្ឋមានការផ្លាស់ប្តូរឥរិយាបថច្រើន អំពីការព្រួយបារម្ភពីបរិស្ថាន»។
រូបភាពពីទំព័រហ្វេសប៊ុកយុវជនសំរាម
ស្លៀកខោខូវប៊ូវ ពាក់អាវយឺត យុវជនវ័យ២៩ឆ្នាំ ដែលបានបំពេញការងារយ៉ាងសស្រាក់សស្រាំ ក្នុងការប្រមូលសំរាម រយៈពេល៨ខែមកនេះ ហាក់រីករាយ ព្រោះបានឃើញពីការប្រែប្រួលជាវិជ្ជមានក្នុងការចោលសំរាមរបស់ប្រជាពលរដ្ឋក្នុងរាជធានី។ បើតាមលោក ដារ៉ាវីត ការធ្វើសកម្មភាពប្រមូលសំរាម គឺជាសារដ៏មានសារសំខាន់បំផុត ដើម្បីឲ្យពលរដ្ឋមើលឃើញ និងភ្ញាក់រលឹក លែងបោះចោលសំរាមក្រៅធុង និងចេះរៀបចំទុកដាក់សំរាមឲ្យបានត្រឹមត្រូវ។
ជាកូនច្បងក្នុងចំណោមបងប្អូន៣នាក់ ក្នុងគ្រួសារជីវភាពមធ្យមនៅក្រុងភ្នំពេញ ដារ៉ាវីត និងសមាជិកក្រុម នៅតែបន្តសកម្មភាពប្រមូលសំរាម និងរៀបចំក្រុមធ្វើបំពង់បឺតបរិស្ថាន ដែលទទួលបានការឧបត្ថម្ភពីសប្បុរសជននានា។
រូបភាពពីទំព័រហ្វេសប៊ុកយុវជនសំរាម
តែយ៉ាងណាក៏ដោយ ការប្រឹងប្រែងធ្វើជាគំរូសម្រាប់យុវជន និងពលរដ្ឋផ្សេងទៀត មិនទាន់គ្រប់គ្រាន់នោះទេ។ លោក សាន ដារ៉ាវីត ចង់ឲ្យអាជា្ញធរអនុវត្តន៍វិធានការ ពិន័យអ្នកចោលសំរាមមិនត្រឹមត្រូវ។ បើតាមយុវជនរូបនេះ ការចូលរួមពីភាគីពាក់ព័ន្ធលើបញ្ហានេះ ទើបអាចកែប្រែឥរិយាបថរបស់ប្រជាជន ឲ្យឈប់ចោលសំរាមពាសវាលពាសកាលបាន។ លោកបញ្ជាក់យ៉ាងដូច្នេះថា៖ «ខ្ញុំគិតថា បញ្ហានេះ បណ្តាលមកពីទាំងអស់គ្នា។ បើសិនយើងចែកកំហុសម្នាក់បន្តិចៗ បើសិនជាអាជ្ញាធរ គាត់យកចិត្តទុកដាក់ បើប្រមូលសំរាមទាន់ពេលវេលា ហើយចុះពន្យល់ណែនាំគ្នាគាត់ថា បងដាក់សំរាមអ៊ីចេះ ដើម្បីឲ្យស៊ីនទ្រីស្រួលប្រមូល មិនមែនចូកចាក់ៗ ធ្វើឲ្យធ្លាយរប៉ាត់របាយពេញហ្នឹង។ ដូច្នេះ យើងគួរតែទទួលកំហុសនេះម្នាក់បន្តិចៗ ដើម្បីកែប្រែទម្លាប់របស់គាត់ គាត់នឹងកែហើយ ខ្ញុំជឿថាគាត់នឹងកែ តែបើមិនកែយើងចាត់វិធានការផ្សេងៗ ដាក់សម្ពាធ និងដាក់កំហិត គាត់នឹងកែហើយ»។
លោកសង្កត់ធ្ងន់ថា ការងាររបស់ខ្លួនគ្រាន់តែជាចំណែកតួចមួយ នៃដំណោះស្រាយបញ្ហានេះ ប៉ុន្តែការអប់រំពលរដ្ឋអំពីបរិស្ថាន និងទុកដាក់សំរាមឲ្យបានត្រឹមត្រូវ គួរតែត្រូវបានធ្វើឡើងតាំងពីថ្នាក់មតេ្តយ្យមកម្ល៉េះ។
បន្ទាប់ពីធ្វើការងារនេះបានមួយរយៈ លោក សាន ដារ៉ាវីត បានចាត់ទុកថា ការងាររបស់ខ្លួនបានទទួលលទ្ធផលបណ្តើរៗនោះ។ ហើយអ្វីដែល លោក សាន ដារ៉ាវីត ដែលមានរូបរាងស្តើងសម្បុរស្រអែមរូបនេះ ចង់បាន គឺប្រែក្លាយជារាជធានីភ្នំពេញ ឲ្យក្លាយជាទីក្រុងគ្មានសំរាម៕